Нови Сад, 23. октобер – У Новим Садзе нєшка отримана заєднїцка схадзка Влади Републики Сербиї и Покраїнскей влади на хторей бешедоване о енерґетики, польопривреди, защити околїска, инфраструктурних проєктох и унапредзеню сотруднїцтва.
На заєднїцкей схадзки, на поволанку предсидательох двох Владох, присуствовал и предсидатель Скупштини АП Войводини Балинт Югас.
Предсидателька Покраїнскей влади Мая Ґойкович гварела на конференциї за медиї же ше на схадзки бешедовало о политичней и економскей ситуациї у Сербиї.
"Догварели зме ше озбильно приступиц ґу формованю буджету за 2025. рок, закончиц заєднїцки проєкти и же би шицки проєкти цо плануєме порушац у будучносци були лєм проєкти хтори унапрямени на хасен и злєпшанє животного стандарду гражданох и гражданкох Автономней покраїни Войводини", визначела Мая Ґойкович.
Предсидатель Влади Републики Сербиї Милош Вучевич визначел же у цеку барз значни инвестициї у шицких часцох Войводини и же циль ровномирни розвой цалей держави. Вон додал и же 1,55 милиярди евра вредносц проєктох хтори у пририхтованю як будуци инвестициї у АПВ.
Вучевич виражел наздаванє же ше и у наступних периодох будзе отримовац таки заєднїцки схадзки, же би републични министрове и покраїнски секретарове мали нагоду у нєпоштредней комуникациї бешедовац о шицких темох цо важни за тоту часц держави и предложел же би ше таки схадзки орґанизовало кажди шейсц мешаци.