Салцбурґ/Нови Сад, 21. октобер – Предсидатель Скупштини АП Войводини Балинт Югас участвовал нєшка у Салцбурґу на ювилейним 20. Самиту Европи у орґанизациї Институту европских реґийох (ИРЕ), хтори ше того року отримує под назву „ЕУ: Нєт будучносци без реформи“.
Под час зашеданя, предсидатель Югас ше зишол зоз предсидательом и сновательом Институту европских реґийох (ИРЕ) проф. др Францом Шаусберґером. Констатуюци заєднїцку намиру предлужиц и унапредзиц потерашнї длугорочни партнерски одношеня медзи АП Войводину и Институтом европских реґийох (ИРЕ), предсидатель Югас и др Шаусберґер бешедовали о можлївосцох за нови заєднїцки активносци.
„Потримовка яку Институт европских реґийох роками давал нашей покраїни, заєднїцке
участвованє и орґанизованє конференцийох на тему реґионалного повязованя, за нас и надалєй барз драгоцина. Професор Шаусберґер ше децениями зоз пошвеценосцу закладал за приблїжованє Републики Сербиї и цалого реґиону Заходного Балкану ґу ЕУ и барз охрабрує його намира же би тото и надалєй робел“, гварел Югас и визначел же вредносци Институту европских реґийох: повязованє людзох, промоция диялоґу и моцнєнє реґийох, платформа у якей АП Войводина препознава потенциял за дальше сотруднїцтво и партнерство.
Зоз цильом дальшого унапредзеня сотруднїцтва и прецизованя заєднїцких активносцох, предсидатель Югас поволал професора Шаусберґера же би у наступним периодзе нащивел АП Войводину и покраїнски парламент, хтори тоту поволанку зоз задовольством прилапел.
Проф. др Шаусберґер уручел предсидательови Югасови сертификат овласценя за представянє АП Войводини у ИРЕ, наглашуюци же є прешвечени до дальшого плодоносного сотруднїцтва. Окрем предсидателя Югаса, на Самиту присуствовала и ґенерални конзул Републики Сербиї у Салцбурґу Вера Вукичевич.
Институт европских реґийох (ИРЕ) вчера вечар шветочно означел 20 роки снованя, а на нєшкайшим 20. Самиту Европи участвовали числени високи представителє европских и жемох Заходного Балкану, як и представителє европскей администрациї и Австриї, як жеми домашнєй.
На нєшкайшим панелу хтори пошвецени будучносци Европи, пред численима учашнїками зашеданя бешедовали предсидатель Влади Сиверней Македониї Християн Мицкоски, министер вонкашнїх дїлох Мадярскей Петер Сиярто, бувши предсидатель Словениї Борут Пахор, европски комесар за буджет Йоганес Ган и числени високи функционере ЕУ, Нємецкей, Австриї, Ческей, Польскей и других жемох. Под час зашеданя бешедовало ше и о темох преширеня ЕУ, економских и привредних рушаньох, енерґетских спокусох, а за ютре наявене и викладанє министерки рударства и енерґетики у Влади Републики Сербиї Дубравки Дєдович Ханданович.
Институт европских реґийох (ИРЕ) основани 2004. року у Салцбурґу, з цильом промовованя реґионалного сотруднїцтва у Европи и моцнєня улоги европских реґионох и локалних власцох у европских процесох приношеня одлукох. Институт то и платфома за черанку искуствох и найлєпших праксох медзи реґиями, городами, општинами и рижнима привреднима секторами.