Салзбурґ/Нови Сад, 20. октобер – Предсидатель Скупштини АП Войводини Балинт Югас присуствовал нєшка у Салзбурґу на шветочней церемониї означованя 20 рокох як основани Институт европских реґийох.
Винчуюци сновательови и предсидательови Институту европских реґийох др Францови Шаусберґови на вельким ювилею, предсидатель Югас здогаднул на длугорочну повязаносц и партнерски одношеня АП Войводини и тей орґанизациї зоз шедзиском у Австриї, хтора ше през свойо активносци и инициятиви заклада за реґионализацию, децентрализацию и повязованє европских реґионох.
«Институт европских реґийох и АП Войводина сотрудзую од самого снованя тей европскей орґанизациї, пестуюци роками партнерске и отворене одношенє. Присуство високих урядових особох з числених жемох и домашнього Австриї на означованю двох деценийох роботи Институту, ясни указатель значносци и уплїву з якима ше ИРЕ з дводеценийну роботу надрилєл як значни и уплївни партнер у обласци промовованя реґионалного сотруднїцтва и стимулованя реґионалного розвою», визначел Югас.
На шветочносци означованя велького ювилею ИРЕ, попри др Шаусберґа, бешедовали и ґувернере австрийских союзних покраїнох Салзбурґ, Тирол и Горня Австрия, а присутних з видео-порученьом привитал и предсидатель Австриї Александер ван дер Белен.
Наютре предсидатель Югас будзе участвовац на ювилейним 20. Самиту Европи яки ше отрима у орґанизациї Институту европских реґийох, и на хторим ше през числени панели будзе бешедовац о терашньосци и будучносци Европскей униї, реґионалней политики, преширеню ЕУ, енерґетики.
Институт европских реґийох (ИРЕ) основани 2004. року у Салзбурґу, з цильом промовованя реґионалного сотруднїцтва у Европи и моцнєня улоги европских реґионох и локалних власцох у европских процесох приношеня одлукох. Институт то и платфома за черанку искуствох и найлєпших праксох медзи реґиями, городами, општинами и розличнима привреднима секторами.