Кленак/Нови Сад, 18. октобер – Предсидатель Скупштини АП Войводини Балинт Югас присуствовал нєшка у Кленку на шветочносци з нагоди 150. рочнїци першей административней защити природних вредносцох Обедскей бари, хтору орґанизовало ЯП «Войводиналєси».
Привитуюци присутних на означованю того велького ювилею, предсидатель Югас визначел же у предходних 150 рокох, без розлики на дружтвено– политични контекст и шицки пременки хтори тот простор дожил, защита природних вредносцох Обедскей бари нїґда нє приводзена до питаня, цо достаточно гутори о значеню того резервату природи.
«У шветлє приступних прегваркох и отвераня прегваряцких поглавйох з Европску унию и винїмково важного поглавя 27 хторе ше одноши на защиту животного штредку, тот датум потвердзенє же постої административна култура и институционални капацитети защити и управяня з резерватами природи. Вон потвердзенє же ше можеме усоглашиц з правнима здобутками и правну културу Европскей униї. Уж зме були и часц зме европскей административней култури», поручел предсидатель Югас.
Вон здогаднул же у авґусту 2023. року Скупштина Войводини принєсла Покраїнску скупштинску одлуку о приношеню Просторного плану подруча окремней наменки специялного резервату природи «Обедска бара», трецу по шоре у остатнїх 20 рокох и з тим предлужела традициюинституционалней защити природного окруженя.
«Обедска бара виписує фамелийне стебло и родословиє Войводини. На тим подручу будовани населєня од праисторийного часу, неолиту, бронзового часу, римского периоду, штреднього вику, периоду отоманских освойованьох… Ту рижни племена и народи жадали жиц и видзели будучносц за себе и свойо дзеци», гварел предсидатель Югас и наглашел же Обедска бара положена под административну защиту лєм два роки после того як америцки власци положели под защиту национални парк Yellowstone.
Директор подприємства ЯП «Войводиналєси» Роланд Кокаи подзековал шицким институцийом и поєдинцом хтори потримую роботу того подприємства и визначел же до Обедскей бари остатнї 15 роки уложени 2,2 милиони евра, од хторих 80 одсто з власних средствох, цо резултовало з преширеньом на 50 гектари новей поверхносци, чистима плїваюцима платформами, после чого ше после велїх рокох знова зявели даєдни защицени рошлїнски и животиньски файти.
У рамикох означованя ювилею Обедскей бари додзелєни подзекованя поєдинцом и институцийом, а отримани и презентациї у вязи зоз историятом, управяньом, културним и историйним нашлїдством и новим просторним планом.