Нови Сад, 16. октобер – Члени Дзецинского совиту Покраїнского защитнїка гражданох - омбудсмана нащивели нєшка Скупштину АП Войводини, упознали ше з єй роботу и бешедовали з предсидательом Скупштини АП Войводини Балинтом Югасом.
Визначуюци вельке задовольство пре нєшкайшу нащиву, предсидатель Югас оценєл же барз важна отвореносц покраїнского парламенту спрам гражданох, та зоз тим и спрам дзецох хтори би дом у хторим ше приноши найважнєйши одлуки у вязи зоз животом гражданох покраїни, требали тримац и за свой дом.
«На основи медзинародних конвенцийох, основне дзецинске право то право на виражованє думаня и партиципацию, а институция Покраїнского защитнїка гражданох – омбудсмана то барз добре препознава и прето треба похвалїц формованє Дзецинского совиту чий сом, на вельке задовольство, почесни член. Окреме ми важна нєшкайша нащива и як предсидательови Скупштини, алє и як оцови трох дзецох. Ґете гварел же найвекши людзе вше оставаю дзеци и то треба же би нас здогадло же треба зачувац дзецински дух и любопитлївосц. Тото нам ше уда лєм кед их слухаме и кед зме у нєпреривним контакту з нїма», гварел предсидатель Югас.
Предсидатель покраїнского парламенту, вєдно зоз покраїнску защитнїцу гражданох - омбудсманку доц. др Драґану Чорич и заменїцу покраїнского омбудсмана за защиту права дзецка Йоланд Корору, зоз дзецми бешедовал о важносци їх участвованя у процесу приношеня одлукох хтори ше дотикаю защити права дзецох, унапредзеня образованя, здравстеней защити и других важних обласцох.
Покраїнска защитнїца гражданох - омбудсманка Драґана Чорич гварела же ше на дзецински права и дзецински обовязки найчастейше патри з очми одроснутих и же прето важни глас членох Дзецинского совиту, же би указали на шицко тото цо одроснути препущую.
«Нашо сотруднїцтво з першим зволаньом Дзецинского совиту барз задоволююце и наисце зме горди на резултати хтори вони посцигли. Шицки дзеци напредовали як особи, постали вельо самоуверенши, вельо информованши и буду прави амбасадоре защити людских правох у своїх штредкох. Ценїме потримовку и Скупштини АП Войводини и Покраїнскей влади и подзековни зме предсидательови Югасови же нас нєшка погосцел», визначела омбудсманка Чорич.
Покраїнски защитнїк гражданох – омбудсман 2023. року запровадзел Дзецински совит як стаємне роботне цело тей институциї. З участвованьом у роботи и активносцох Дзецинского совиту, 15 членїци и члени того цела, возросту од 13 по наполнєни 18 роки, маю можлївосц информовац Омбудсмана о потупеню правох дзецка, дац думанє, совити и предкладаня за унапредзенє права дзецка, участвовац у орґанизованю едукативних активносцох о правох дзецка и участвовац у реализациї виглєдованя о стану права дзецка.