Нови Сад, 15. октобер – Предсидатель Скупштини АП Войводини Балинт Югас нєшка приял ґенералного секретара Мадярскей ректорскей конференциї др Золтана Дубеция, зоз хторим бешедовал о предстояцим зашеданю тей орґанизациї, хторе ше 14. и 15. новембра отрима у Суботици и Новим Садзе.
На схадзки виражене взаємне задовольство же ше зашеданє Мадярскей ректорскeй конференциї, на хторим ше зазберує ректорох универзитетох и високих школох у Мадярскей, знова отрима у АП Войводини, як и же ше на други дзень зашеданя у Новим Садзе отрима заєднїцки мадярско-сербски ректорски форум.
„Маме вельку чесц же Мадярска ректорска конференция знова вибрала Войводину буц домашнї того зашеданя. To ище єдно потвердзенє же тому целу, хторе ма барз важну улогу у креированю образовних политикох у Мадярскей, барз важни и сонароднїки хтори нє жию у матичней держави. Будзе нам чесц у АП Войводини угосциц ректорох зоз числених мадярских универзитетох, а сиґурни сом же Учительски факултет у Суботици, хтори домашнї перши дзень зашеданя, на високим уровню обезпечи шицку потребну лоґистичну помоц“, визначел Югас на схадзки, на хторей присуствоал и проф. др Саболч Галаши, позарядови професор и продекан за медзинародне сотруднїцтво Учительского факултету на мадярским наставним язику у Суботици.
Предсидатель Югас виражел и вельке задовольство же ше на други дзень зашеданя у Новим Садзе, у Ректорату Универзитету у Новим Садзе, отрима заєднїцки сербско-мадярски ректорски форум.
„На прешлотижньовим стретнуцу з ректором Универзитету у Новим Садзе проф. др Деяном Мадичом, взаємно зме виражели задовольство зоз нагоди предстояцого зашеданя и одличного, продуктивного и партнерского сотруднїцтва Универзитету у Новим Садзе зоз универзитетами у Мадярскей“, гварел Югас. 
Мадярска ректорска конференция (МРК) то орґанизация хтора зазберує ректорох универзитетох и високих школох у Мадярскей, зоз главним цильом промововац сотруднїцтво медзи високошколскима установами, дзе ше унапредзує квалитет образованя, дава платформу за диялоґ о ключних темох у високим образованю и заступа интереси универзитетох и других високошколских институцийох пред владу и медзинароднима орґанизациями. Тота орґанизация ма ключну улогу при формованю и моцнєню системи високого образованя у Мадярскей, зоз промовованьом сотруднїцтва и черанки знаня медзи универзитетами, алє и медзи академску заєднїцу и привреду.