Нови Сад, 15. октобер – Предсидатель Скупштини АП Войводини Балинт Югас присуствовал нєшка на шветочним подписованю контракту о участвованю Мадярскей як Жеми партнера на предстояцим 55. медзинародним Сайме туризму хтори ше отрима на Новосадским сайме, од 28. по 30. новембер.
Контракт подписали ґенерални директор Новосадского сайму Никола Ловрич и заменїца ґенералного директора Мадярскей аґенциї за промоцию вивозу (ХЕПА) Андреа Нестор, а предсидатель Югас виражел вельке задовольство же мал нагоду поштредовац у тим же би Мадярска була жем партнер тогорочного Сайму туризму.
«Винїмково добри одношеня двох державох даваю добру подлогу же би ше их пренєсло и на дальши розвой економских одношеньох, та так и на польо туризму. Кед вежнєме до огляду розвой туризму у Мадярскей як цо то баньски, вински, бициґлистични и други, вец ше Войводина ма на цо спатрац и вельо того можеме научиц од наших сушедох. З другого боку, попри Беоґраду и других часцох Сербиї, нашо цильове тарґовище то Мадярска пре блїзкосц гранїци, алє и други жеми, бо нам циль поставиц Войводину на висши уровень на мапи европского и шветового туризму», гварел предсидатель Югас.
Вон додал же у Войводини вельо того поробене по питаню капацитетох за змесценє и їх квалитету и же тото будзе представене на предстояцим Сайме. Предсидатель Югас подзековал Министерству вонкашнїх дїлох и вонкашнєй тарґовини Мадярскей и аґенциї ХЕПА же прилапели инициятиву и препознали значносц Сайму туризму.
Ґенерални директор Новосадского сайму Никола Ловрич подзековал предсидательови Югасови же помага у реализациї идеї же би Мадярска була жем партнер Сайму туризму.
«З тим подписом ми доказуєме предлужованє добросушедских одношеньох и предлужованє сотруднїцтва Мадярскей и Новосадского сайму. Мадярска и пред двома роками була наш партнер на Сайме польопривреди, так же тот Саям лоґични шлїд подїйох», гварел Ловрич додаваюци же Новосадски саям пред ище єдним виволаньом бо ма намиру же би и тоту манифестацию подзвигнул на висши уровень и з тим дал потримовку найвекшей шветовей манифестациї хтору ше 2027. року отрима у Сербиї, Специялизованей вистави «ЕXPO 2027 БЕОҐРАД».
Заменїца ґенералного директора (ХЕПА) Андреа Нестор гварела же Министерство вонкашнїх одношеньох и вонкашнєй тарґовини зоз задовольством прилапело же би Мадярска була жем партнер Сайму туризму, пре дальши розвой добрих одношеньох двох жемох.
Традиционални Саям туризму на Новосадским сайме єдна зоз найзначнєйших подїйох у обласци туризму у реґионє хтора на єдним месце збера привреднїкох, туристични аґенциї, готелиєрох и роботнїкох у туризме. Тот саям представя идеалну платформу за промоцию нових туристичних понукнуцох и трендох, черанку искуствох през числени тематични конферециї и панели, як и зберанє нових дїловних сотруднїцтвох.