Нови Сад, 11. октобер – Предсидатель Скупштини АП Войводини Балинт Югас бешедовал нєшка зоз ректором Универзитету у Новим Садзе проф. др Деяном Мадичом и проректором за медзинародне сотруднїцтво проф. др Отилию Седлак.
На схадзки бешедоване о потерашнїм добрим сотруднїцтве Скупштини АПВ и Универзитету у Новим Садзе, о програмох и проєктох з обласци медзинародного и реґионалного сотруднїцтва, як и о инициятивох за дальше змоцньованє образованя и накововиглєдовацкей роботи.
Визначуюци же Универзитет у Новим Садзе и покраїнска администрация маю за циль творенє лєпшей будучносци за студентох и цале дружтво, предсидатель Югас визначел важносц образованя и покладаня приємних испитох на мацеринским язику.
Бешедоване и о винїмкових партнерским одношеньох медзи Универзитетом у Новим Садзе и универзитетских центрох и факултетох у Мадярскей, а предсидатель Югас и ректор Мадич виражели окремне задовольство же дводньова Мадярска ректорска конференция будзе отримана у Суботици и Новим Садзе и же представителє новосадского Универзитету буду госци учашнїки тей конференциї.
Универзитет у Новим Садзе ма коло 50 тисячи студентох и пейц тисячи занятих и єден є з найвекших наукових и образовних центрох у Централней Европи и облапя скоро шицки обласци науки и високого образованя. 
У рамикох Универзитету ше реализує коло 350 акредитовани студийни програми на уровню основних, мастер, специялистичних и докторских студийох, а його факултети и институти ше находза у штирох городох у АП Войводини: Новим Садзе, Суботици, Зомборе и Зренянину.