04. 10. 2024.Предсидатель Югас нащивел 55. Медзинародни сайми „ЛОРИСТ“ на Новосадским саймe

Нови Сад, 4. октобер – Предсидатель Скупштини АП Войводини Балинт Югас, вєдно зоз ґенералним директором Новосадского сайму Николом Ловричом, нащивел нєшка 55. Медзинародни сайми „Лорист“ – Саям лову и риболову и Саям еколоґиї.

По нащиви штандох домашнїх и странских викладачох, медзи хторима и ресорни покраїнски секретарияти и явни подприємства чий снователь Скупштина АПВ, предсидатель Югас визначел же „Лорист“ и того року потвердзел же є найзначнєйша саямска манифестация тaкей файти у реґиону.

„Лорист з рока на рок потвердзує свою доминацию, а тото потвердзує и велька нащивеносц заинтересованих, як з нашей жеми, так и зоз ширшого реґиону. Тота манифестация представя и часц туристичного понукнуца Войводини, а и сами викладаче прицагую туристох презентуюци свойо понукнуца“, гварел Югас.

Бешедуюци о значносци Сайму еколоґиї, Югас як важне оценєл тото же ше до фокусу кладзе защита животного штредку и врацанє ґу природи, як и дзвиганє свидомосци о примарним селектованю одпаду. 

„Барз ми мило же ше водзи рахунку о дзвиганю еколоґийней свидомосци. Город Нови Сад едукує наймладших согражданох як треба водзиц рахунку о очуваню животного штредку и глїбоко сом прешвечени же нам ше уда свидомосц о тей важней теми дзвигнуц на висши уровень“, гварел Югас и додал же и ловаре и риболовци маю свою улогу у очуваню животного штредку исто так як и други гражданє.

Ґенерални директор Новосадского сайму Никола Ловрич гварел же Скупштина АП Войводини и Новосадски саям маю винїмково добре сотруднїцтво и же Скупштина дава потримовку отримованю саямских манифестацийох. Вон окреме подзековал предсидательови Югасови на тим же помогнул же би на наступним Медзинародним сайме туризма Мадярска була жем партнер.

Предсидатель Югас и директор Ловрич нащивели, медзи иншим, штанди Покраїнского секретарияту за урбанизем и защиту животного штредку, Городскей управи за защиту животного штредку Городу Нового Саду, ЯП „Войводиналєси“, компанийох „Capriolo“ и „Wagner“, як и виставу ловней фауни Републики Сербиї. Тогорочни Медзинародни сайми „Лорист“ шветочно отворени 2. октобра и буду тирвац по нєдзелю, 6. октобер.