Нови Сад, 4. октобер – Вельки проєкт реновираня главного будинку Мадяр соа у Новим Садзе давно почала, а предсидатель Скупштини АП Войводини Балинт Югас, городоначалнїк Нового Саду Милан Дюрич и народни посланїк Балинт Пастор нєшка обишли закончени просториї новосадского оддзелєня Мадярскей предшколскей установи и вежбальнї «Vackor».
После того як 2023. року зоз шедзиска Мадяр соа до новей гали преселєна друкарня Форум, почали роботи на реконструкциї того обєкту, у хторим ше по проєкту, попри редакациї найстарших и єдиних дньових новинох на мадярским язику, будзе находзиц и уж закончена дзецинска заградка и дзецинске бавилїще. У цеку роботи на вибудови модерней конферeнцийней сали и ґалерийного простору, музею новинох и друкованя и кнїжкарнї кафеу.
Визначуюци же тот проєкт од велькей значносци за мадярску националну заєднїцу, предсидатель Скупштини АПВ Балинт Югас гварел же з пренаменку будинку Мадяр соа до мултифункционалного простору, тот будинок достава додатну вредносц и ширши змист за вельке число людзох.
«Мадяр со нє лєм институция алє и когезийна моц мадярскей националней заєднїци и тот проєкт то доказує. Кед пошвидко будзе закончени, на лєпше ше пременї животи людзох хтори жию у Новим Садзе и околини. Места у дзецинских заградкох нєт досц и то барз добре препознал, насампредз, Иштван Пастор хтори ше од самого початку закладал и пренаходзел способи же би ше тот проєкт реализовало. Тото доказ же вєдно можеме вельо вецей и зоз здруженима моцами и заєднцким финансованьом можеме зробиц вельки ствари», гварел предсидатель Югас.
Городоначалнїк Нового Саду Милан Дюрич виражел задовольсто з нащиву и фактом же город будзе мац ище єдни нови и барз
красни дзецински яшелька, за яшелькови и предшколски возрост.
«Будземе ше намагац потримац роботу тих нових дзецинских яшелькох, а окреме бим визначел сотруднїцтво Городу зоз Националним совитом мадярскей националней меншини на вершинским уровню. Вєдно зме зробели барз значни проєкти, як цо то реновиранє и опреманє Мадярского културного центру «Петефи Шандор» на Телепу. Барз значне же мадярска национална заєднїца, як и шицки други, ма условия за пестованє своєй традициї, бо шицки вєдно твориме препознатлїви колорит нашого городу», гварел Дюрич, винчуюци Мадяр соу вельки ювилей, 80 роки постояня.
Народни посланїк Балинт Пастор визначел же Мадяр со институция од значносци за цалу АП Войводину и Републику Сербию и виражел задовольство же ше городоначалнїк Нового Саду з нєшкайшу нащиву могол упознац з роботами и проєктом хтори, кед буду готови, збогаца понукнуце городу з новима змистами.
«Тот проєкт вредзи 4,5 милиони евра. Од тей суми три штварцини средствох обепечела Влада Мадярскей а остаток АП Войводина. Тоти средства ше одноша на закончованє вкупного проєкту а роботи ше швидко одвиваю. Тот проєкт найлєпше презентує сотруднїцтво медзи Сербами и Мадярами, двома державами, двома владами, уключуюци и локални и покраїнски орґани», визначел Пастор.
На нєшкайшим обиходзеню присуствовали и покраїнски секретар за образованє, предписаня, управу и национални меншини/национални заєднїци Роберт Отот и предсидатель Националного совиту Мадярскей националней заєднїци Арпад Фремонд.
Директорка Мадяр соа Едвина Ердеди подзековала присутним на потримовки, од самей идеї по початок роботох и обезпечованя средствох и виражела обчекованє дже дзецинска заградка, з максималним капацитетом за 80 дзеци, барз швидко почнє з роботу.
Тот проєкт ше реализує се у координациї Мадяр соа и Националного совиту мадярскей националней заєднїци, зоз финансийну потримовку Влади Мадярскей и Покраїнскей влади, вкупна сума обезпечених средствох за инвестициї виноши 581 милион динари, од чого 160 милиони динари обезпечени з буджету АП Войводини за вибудов конференцийней сали.