Сента/Нови Сад, 26. септембер – Предсидатель Скупштини АП Войводини Балинт Югас нєшка у Сенти присуствовал на сайму образованя „Suliexpo“, на хторим ше будуцим школяром и їх родичом представело ґимназиї и штреднї школи зоз АП Войводини, дзе ше наставу трима на мадярским язику.
После сайму „Eduexpo“, на хторим вчера участвовали високошколски установи зоз Войводини на хторих ше студира у цалосци, або часточнє на мадярским язику, нєшкайша образовна вистава наменєна школяром 8. класи.
У своєй бешеди присутним, предсидатель Скупштини АПВ Балинт Югас, наглашел значносц и важносц школованя на мацеринским язику и оценєл же саямски манифестациї у Сенти иделна нагода на єдним месце будуцих штредньошколцох упознац зоз шицкима можлївосцами дальшого образованя и афирмацию.
„Глїбоко ше складам зоз словами познатого мадярского нобеловца Сент Дєрдї Алберта хтори гварел же нам будучносц
будзе така, яка нам нєшка школа. Саям „Suliexpo“ идеална нагода школярох закончуюцих класох нєпостредно упознац зоз широку палету опцийох за предлужованє школованя на мадярским язику“, гварел Югас и виражел задовольство же нащивителє годни упознац 29 штреднї школи и ґимназиї зоз наставу на мадярским язику.
Предсидатель Югас визначел же образованє на мацеринским язику, окрем же доприноши ґу очуваню идентитету, язика и култури, оможлївює школяром здобуц вельо фундаменталнєйше знанє и лєпше розумиц материю.
Саямски манифестациї „Eduexpo“ и „Suliexpo“ орґанизує Национални совит мадярскей националней меншини, у сотруднїцтве з Учительским факултетом на мадярским наставним язику у Суботици, у партнерстве зоз Општину Сента.