Нови Сад/Морахалом, 7.септембер – Предсидатель Скупштини АП Войводини Балинт Югас присуствовал нєшка у Морахалому шветочносци з нагоди 35. рочнїци од кеди тото мадярске место достало статус городу.
З нагоди ювилею, барз значного за Морахалом и його гражданох, предсидатель Югас послал найсердечнєйши винчованки городоначалнїкови Золтанови Ноґрадийови, оценююци же Морахалом и цала Жупания Чонґрад од винїмковей важносци за АП Войводину з оглядом на длугорочне сотруднїцтво, партнерски и приятельски одношеня.
Предсидатель Югас наглашел же, попри тим же представя актрактивну туристичну дестинацию, Морахалом за гражданох Войводини важни и зоз економского аспекту з оглядом на факт же ма розвиту индустрийну зону дзе роботу нашли и гражданє з погранїчней часци нашей покраїни.
«Зоз найсердечнєйшима винчованками и жаданьом за дальши економски, туристични, културни розвой и просперитет того городу виражуєм надїю и прешвеченє же Морахалом и городи и општини зоз Войводини предлужа пестовац свойо одношеня и унапредзовац сотруднїцтво на взаємни хасен своїх гражданох», поручел предсидатель Югас, визначуюци вельку улогу хтору Морахалом ма у прейґгранїчним сотруднїцтве Мадярска-Сербия, а хтора по тераз дала вельки резултати, як и намиру же би ше тото сотруднїцтво предлужело, и зоз тим городом, алє и зоз другима мадярскима городами и жупаниями. 
Попри преслави 35. рочнїци означене и 60 роки иснованя Купелї Свята Елизабета, а на шветочносци бешедовали и представнїки Влади Мадярскей, министер за управу и урбанизем Тибор Наврачич и заменїк министра польопривреди Шандор Фаркаш.