Сеґедин/Нови Сад, 7. септембер – На поволанку ректора Универзитету у Сеґедину проф. др Ласла Ровоа, Предсидатель Скупштини АП Войводини Балинт Югас присуствовал нєшка на шветочней схадзки Сенату тей престижней високошколскей институциї, з нагоди отвераня академского 2024/2025. року.
Универзитет у Сеґедину єден зоз найвекших и найугляднєйших образовних центрох у Мадярскей и ма 12 факултети хтори понукаю квалитетне образованє у найширшим спектру високого образованя. По словох ректора, на тим Универзитету, хтори посцигує одлични резултати на рижних медзинародних ранґ лїстинох високошколских установох, вецей як 22 тисячи студентох, учишлююци скоро пейц тисячи медзинародних студентох, збогацує свойо знанє и здобува реномовани компетенциї за будучносц.
Виражуюци задовольство пре присуство на тей шветочносци, предсидатель Югас визначел же ше склада з оцену же, попри образовней, Универзитет у Сеґедину, як єдна зоз найвекших академских институцийох, ма барз активну и значну улогу у вкупним дружтвеним, економским и културним розвою цалого реґиону.
«Вельке число гражданох АП Войводини ше образовало праве на Универзитету у Сеґедину. Вони познєйше, хаснуюци барз квалитетне знанє хторе здобули под час студийох, допринєсли своєй заєднїци и штредку у хторим жию хаснуюци го у своїх професионалних кариєрох», визначел предсидатель Югас и наглашел же Скупштина АП Войводини, як и по тераз, будзе потримовац вецейрочне, барз плодне сотруднїцвто Универзитету у Новим Садзе и Универзитету у Сеґедину.
У рамикох церемониї, шветочно отворена обновена стаємна поставка вистави под назву «Драга Каталини Кариковей ґу Нобеловей награди и далєй», а присутних привитал министер за европски роботи у Влади Мадярскей Янош Бока.