Нови Сад, 5. септембер – Предсидатель Скупштини АП Войводини Балинт Югас, подпредсидателє Скупштини АПВ Дамир Зобеница, Александра Малетич, Неманя Завишич и Борис Новакович, вєдно зоз представителями шейсц скупштинских одборох, отримали нєшка схадзку зоз делеґацию китайскей провинциї Джедянґ, хтора пребува у урядовей нащиви нашей жеми.
Визначуюци задовольство пре ище єден крочай ґу приблїжованю АП Войводини и китайских провинцийох, предсидатель Югас визначел же стратеґийне партнерство Републики Сербиї и Народней Републики Китай дава стимуланс у моцнєню одношеньох яки би требало вихасновац у полним потенциялу. Вон наглашел же нєшкайша нащива представя одличне предусловиє за повязованє зоз Джедянґом, и же то од винїмковей значносци же би ше тота провинция придружела лїстини од осем провинцийох зоз Китаю, зоз хторима Войводина уж ма запровадзени блїзки партнерства и подписани спорозуменя о сотруднїцтве.
«За АП Войводину Джедянґ приклад як єдна за китайски нагоди менша провинция може буц винїмково успишна, економски розвита и напредна. Попри иншим, повязую нас, насампредз, обласци ИТ индустриї и польопривреди, и сотруднїцтво у тих секторох би було од винїмковей значносци и взаємни хасен», гварел Югас.
Предсидатель покраїнского парламента упознал госцох зоз Китаю зоз орґанизацию и роботу Скупштини АП Войводини, специфичносцами покраїни як мултикултуралней и вецейязичней реґиї, як и зоз найзначнєйшима конарами и потенциялами привреди и туризму, польопривреди и образованя.
Подпредсидатель Скупштини АПВ Дамир Зобеница визначел значносц челїчного приятельства и всеоблапююцого партнерства двох жемох, як и велького приятельства медзи предсидателями Републики Сербиї Александромом Вучичом и предсидательом НР Китай Си Дїпинґом.
«Наша держава ше находзи медзи Востоком и Заходом и намага ше же би зоз шицкима розвивала добре сотруднїцтво, алє факт же зме ключни проєкти хтори стратеґийно важни за нашу жем зверели китайским партнером. Кед слово о АП Войводини, у тей хвильки китайски компаниї робя на вибудови гайзибанскей драги Беоґрад – Суботица, на найвекшим транспортним проєкту «Ошмих Войводини», на источасней вибудови двох мостох на Дунаю, як и на вибудови тунелу през Фрушку гору. Шицко тото указує на силу и моц наших одношеньох», гварел Зобеница и здогаднул на моцни, дошлїдни и принципиєлни политични одношеня двох жемох, стратеґийни економски инвестициї и вельку китайску помоц у кризних часох, як цо то пандемия Корони вирусу.
Делеґация Джедянґа, хтору творя члени Стаємного комитету Народного конґресу тей китайскей провинциї задлужени за розлични обласци од польопривреди по културу и образованє, указала делеґациї Скупштини АПВ же є окреме заинтересована за запровадзованє блїзших одношеньох и конкретних формох сотруднїцтва.
Провинция Джедянґ, хтора ше пресцера коло побрежя Восточного китайского моря, зоз вецей як 60 милиони жительох, и попри тим же ше находзи на 26. месце по велькосци и на дзешатим по числу жительох медзи китайскима покраїнами, може ше похвалїц штвартим найвекшим бруто домашнїм продуктом (БДП), а лем Ґуанґдонґ, Дянґсу и Шандонґ даваю векши стимуланс националней економиї.
На схадзки зоз китайску делеґацию участвовали и ґенерални секретар Скупштини АПВ Сандра Стойкович, предсидатель Одбору за предписаня Саша Левнаїч, предсидатель Одбору за привреду Желька Милошевич, предсидатель Одбору за здравство, социялну политику, роботу, демоґрафску политику и дружтвену бриґу о дзецох Станислава Хрняк, предсидатель Одбору за културу и явне информованє Йована Меденица, заменїк предсидателя Одбору за польопривреду Роберт Коня и заменїк предсидателя Одбору за образованє и науку Дарко Бадьок.