Нови Сад, 4. септембер – Предсидатель Скупштини АП Войводини Балинт Югас бешедовал нєшка учашнїком конференциї «Змоцньованє приправнїкох през VET поднїмательство», яку ше отримує у рамикох дворочного проєкту «Grow-in VET», хтори потримани од Европскей комисиї.
Конференцию орґанизує «MeOut» орґанизация у сотруднїцтве зоз Привредну комору Войводини, зоз цильом розвою системи фахового образованя у жемох Заходного Балкану, чийо представителє учашнїки тей подїї.
Виражуюци вельке задовольство прето же АП Войводина участвує у програми яка облапя цали Заходни Балкан, предсидатель Югас визначел же попри прейґгранїчних проєктох, значне участвовац и сотрудзовац и у рамикох ширшого, реґионалного сотруднїцтва.
«Унапредзенє системи фахового образованя важна тема и заєднїцки циль за шицки жеми Заходного Балкана. Тиж, тото нагода и же бизме заєднїцки послали моцне порученє Европскей униї на тему преширйованя, же знаме, жадаме сотрудзовац и маме цо указац», наглашел Югас.
«Проєкт «Grow-in VET» потримала Европска комисия и верим же ключ успиху таких подїйох оможлївиц институцийом нашого реґиону, уключуюци и Войводину, вихасновац можлївосци и добри пракси о яких будзе слово же би ше злєпшало здобуванє искуства и знаня при младих», визначел Югас и додал же потримує визию орґанизаторох о моцнєню фахового оспособйованя у жемох реґиону же би ше злєпшало оспособйованє професионалцох хтори буду конкурентни у своїм локалним окруженю и ширше.
«Же бизме тото посцигли мушиме нєпреривно робиц на модернизациї образовней системи и присподобйованю сучасним цеком. Або, як то гварел познати мадярски нобеловац Сент Дєрдї Алберт «Будучносц нам будзе така, яка нам нєшка школа»», гварел Югас и наглашел же образованє, преношенє знаня и моцнєнє фаховосци при младих людзох ключно уплївує на будучносц.
Предсидатель покраїнского парламенту наглашел же за АП Войводину тота конференция ма окремне значенє бо нам дава нагоду за додатне позиционованє у обласци фахового образованя и мобилносци.
«Зоз уключованьом поднїмательних елементох до VET (vocation, education and training), приправнїки годни розвиц ключни компетенциї як цо то креативносц, иновативне роздумованє и ришованє комплексних ситуацийох. Тоти елементи на опредзелююци способ уплївую на розвой способносцох и самодовирия приправнїкох, пририхтуюци их за поднїмательни швет», гварел Югас.
Як визначели орґанизаторе єден зоз главних цильох тей подїї то и приблїжованє иновацийох и дїловного швета сектору фахового образованя и преношенє прикладох добрей пракси за потримовку сектору образованя на тарґовищу роботи.
Учашнїком конференциї бешедовал и покраїнски секретар за образованє, предписаня, управу и национални меншини – национални заєднїци Роберт Отот, як и числени фаховци зоз обласци фахового образованя, менаджменту и бизнису.