Нови Сад, 23. юлий – Предсидатель Скупштини АП Войводини Балинт Югас и предсидателька Покраїнскей влади Мая Ґойкович нєшка нащивели Палич, дзе обишли Водотурню и Аква-парк, як и други туристични змисти хтори остатнї даскелї роки збудовани або обновени зоз средствами републичного, покраїнского и буджету Городу Суботици.
Предсидатель Скупштини АП Войводини Балинт Югас визначел же Палич ма потенциял постац туристична дестинация европского уровня, и же до того верел и бувши предсидатель Иштван Пастор, хтори ше барз закладал за дальши розвой Паличу.
“Тото цо зме нєшка нащивели то його дїло, бо вон нєпреривно починал проєкти и глєдал партнерох за їх реализацию. Дзекуюци йому, Палич после штерацец рокох ма аква-парк хтори тижньово нащивя коло дзешец тисячи туристи. Закладал ше зачувац нашлїдство, та прето и реконструована водотурня хтора символ Паличу и Суботици, реконструована Велька тераса, збудована пешацка дражка,
почало ше розчисцовац викенд-населєнє… Прешвечени сом же би ше вон нєшка барз цешел зоз тим”, гварел пресидатель Югас, виражуюци подзекованє предсидательови Сербиї Александрови Вучичови на потримовки, як и бувшому предсидательови Покраїнскей влади Иґорови Мировичови, городоначальнїкови Суботици Стеванови Бакичови и предсидательки Покраїнскей влади Маї Ґойкович, хтора зоз своїм присуством нєшка указала пошвеценосц дальшому розвою Паличу.
Предсидатель Югас гварел и же остали ище питаня яки треба ришиц, як цо то квалитет води самого озера и звекшанє туристичного капацитету.
“Вибудов швидкей гайзибанскей драги Беоґрад – Будапешт, блїзкосц Беоґраду и гранїци допринєше же бизме з Паличу направели европску туристичну дестинацию, яку заслужуєме”, поручел предсидатель Югас.
Предсидателька Покраїнскей влади Мая Ґойкович виражела задовольство пре законченє обнови водотурнї, историйного здания зоз початку 20. вику и визначела же при аква-парку вибудовани паркинґ хтори ма приходни драги за нащивительох и реконструована дражка за пешакох на тей часци побрежя озера, яка постала паличка променада.
„Цешиме ше з тим як ушорени и опремени Вельки парк на Паличу, як очувани його биодиверзитет и ревитализоване богате културне нашлїдство у форми сецесийних обєктох и як усоглашена инфраструктура зоз випатрунком парку хтори представя защицену културно-историйну цалосц“, наведла Ґойковичова.
Валерия Денч, директорка подприємства Парк Палич хторе управя зоз тоту значну туристичну дестинацию, упознала предсидателя Скупштини АПВ и предсидательку Покраїнскей влади зоз деталями найзначнєйших закончених проєктох, а у нащиви присуствовали и покраїнски секретар за урбанизем и защиту животного штредку Неманя Ерцеґ, городоначальнїк Суботици Стеван Бакич, предсидатель Скупштини Городу Суботици Даниел Дїванович, предсидатель Скупштини подприємства Парк Палич Имре Керн, члени Городскей ради Суботици и покраїнски посланїки.