Канїжа/Нови Сад, 22. юлий – Предсидатель Скупштини АП Войводини Балинт Югас присуствовал нєшка шветочному отвераню скулптури «Пасовач» опрез Войводянскей академиї за пасованє у Канїжи.
Предсидатель Югас наглашел значносц пасовацкого спорту на тим просторе, з оглядом на факт же ма глїбоко укоренєну традицию и же праве зоз Войводини походзеньом даєдни зоз найлєпших и найуспишнєйших пасовачох европского и шветового ранґу.
«У Войводини, алє и у войводянскей мадярскей заєднїци, пасованє нє лєм спорт. То и способ живота. Горди зме на тото же пасованє бул и остал єден зоз найпопуларнєйших спортох на тих просторох. Скулптура хтора нєшка отворена муши буц здогаднїк на тото же витирвалосц и борба вше приноша резултат», поручел предсидатель Югас.
Предсидатель Югас указал на символичне значенє же ше тоту статуу отвера на нєшкайши дзень кед 22. юлия 1456. року мадярске и сербске войско застановели отоманске войско у битки при Беоґраду, тедишнї Нандорфехервар. На чолє зоз Яношом Гунядийом, односно Янком Сибинянином, Серби и Мадяре теди заєднїцки одбранєли свойо отечество и застановели ширенє отоманского царства на тих просторох за наступни 70 роки, оможлївююци период миру и всеоблапююцого розвою заходней часци Европи.
Скулптура «Пасовач» дїло уметнїка Саболча Ваша зоз Малого Идьошу и прикраши двор Войводянскей академиї за пасованє у Канїжи, хтора отворена 2021. року зоз потримовку влади Мадярскей. Снователє того спортского центру то Општина Канїжа, Мадярски национални совит и Мадярска академия за пасованє «Козма Иштван».
На отвераню скулптури присуствовали и предсидатель Пасовацкого союзу Мадярскей Силард Немет, народни посланїк и шеф посланїцкей ґрупи Балинт Пастор и Желько Трайкович, помоцнїк министра у Министерству спорта.