Сента/Нови Сад, 16. юлий – Предсидатель Скупштини АП Войводини Балинт Югас присуствовал нєшка у Сенти на шветочному подписованю спорозуменя о сотруднїцтве медзи Заводом за културу войводянских Мадярох и Националней библиотеки «Сеченї» зоз Будапешту.
Бешедуюци присутним на шветочносци, предсидатель Югас визначел же за Завод за културу войводянских Мадярох, алє и за вкупну мадярску заєднїцу у Войводини, подписованє того спорозуменя велька и важна подїя, хтора за ищє єден крочай унапредзи розвой мадярскей култури у АП Войводини.
«Горди зме на подписованє спорозуменя о сотруднїцтве зоз националну библиотеку Мадярскей и сиґурни сом же ше барз швидко укажу и конкретни резултати хтори виду зоз тей драгоциней синерґиї. Як сом информовани, Национална библиотека «Сеченї» зоз Будапешту нам помогнє диґитализовац документи хтори ше находза при нїх, а окреме су важни зоз локално-историйного аспекту за войводянски реґион и за очуванє мадярского културного нашлїдства», гварел Югас.
Вон, як окреме важну, оценєл инициятиву хтора ше реализує зоз того спорозуменя, а то диґитализация архиви часопису
«Торонтал», часопису зоз длугорочну историю и традицию значну за мадярску заєднїцу. Вон визначел же на тот способ драгоцини аривни материял, хтори часц историї мадярскей заєднїци у Банату и ширше, конєчно будзе доступни шицким заинтересованим, насампредз науковим роботнїком, историчаром и хронїчаром.
Присутним бешедовал и Арпад Фремонд, предсидатель Националного совиту мадярскей националней меншини, соснователя Заводу за културу войводянских Мадярох.
На шветочносци у Сенти була присутна и делеґация Националней библиотеки «Сеченї», Националного совиту и Заводу за културу войводянских Мадярох, и представнїки войводянских библиотекох и установох клтури.