Нови Сад, 16. юлий – Предсидатель Скупштини АП Войводини Балинт Югас зишол ше нєшка зоз покраїнску защитнїцу гражданох – омбудсманку доц. др Драґану Чорич и бешедовал зоз ню о значносци институциї Покраїнского защитнїка гражданох – омбудсмана з цильом защити людских правох.
На схадзки, на хторей участвовал и заменїк Покраїнского защитнїка гражданох – омбудсмана за защиту правох националних меншинох Михаль Нїлаш, бешедовало ше о хвильковей ситуациї у обласци защити правох дзецка, националних меншинох, хаснованю мацеринского язика и писма, як и о механїзмох защити людских правох и законских рамикох за їх витворйованє.
«Функция покраїнского защитнїка гражданох барз одвичательна и важна, бо почитованє и защита елементарних людских правох основа за проґрес у гоч хторей обласци. Ми маме барз добру законску реґулативу и на нас же бизме ю ефикаснєйше и лєпше запровадзовали у пракси», гварел предсидатель Югас.
Кед слово о праву на хаснованє мацеринского язика и писма, Югас гварел же Скупштина АП Войводини, дзе ше службено хаснує шейсц язики, зоз своїм прикладом указує на яки способ тоти права можу буц витворени и же як найвисша институция у покраїни тото обчекує и од других.
Омбудсманка Чорич упознала предсидателя Югаса зоз активносцами тей институциї яки по тераз запровадзени, як и зоз тима цо су у цеку и яки ше планує, насампредз визначуюци винїмково добре сотруднїцтво зоз националнима совитами националних заєднїцох у обласцох у хторих ше крижаю потреби националних заєднїцох и компетенциї омбудсмана.