Нови Сад, 15. юлий – Предсидатель Скупштини АП Войводини Балинт Югас бул нєшка у Науково-технолоґийним парку у Новим Садзе на шветочним отвераню Восточноевропскей лєтнєй школи машинского ученя (ЕЕМL), хтору орґанизує Институт за штучну интелиґенцию Сербиї, у сотруднїцтве зоз Факултетом технїчних наукох у Новим Садзе и зоз тимом науковцох зоз компаниї Google Deep Mind.
У присустве числених госцох и учашнїкох, Восточноевропску лєтню школу машинского ученя шветочно отворел предсидатель Влади Републики Сербиї Милош Вучевич.
Учашнїки лєтнєй школи машинского ученя то млади виглєдоваче и фаховци зоз 24 жемох швета. Вони седем днї буду слухац преподаваня и буду участвовац у роботньох же би виглєдовали найновши тренди, технїки и алати хтори формую будучносц штучней интелиґенциї, а преподавац им буду найпознатши шветово науковци зоз тей обласци.
ЕЕМЛ найуспишнєйша школа штучней интелиґенциї у восточней Европи на хторей преподаваня тримаю познати преподаваче зоз Оксфорду, универзитету у Нюйорку, Монтреалу и Беоґраду, як и преподаваче зоз компаниї Microsoft.
Медзи 250 учашнїкох вельо их приходи зоз Сербиї, та лєтня школа винїмкова нагода же би млади фаховци дзвигли свой уровень знаня зоз обласци штучней интелиґенциї, зоз цильом же би Сербию указали як реґионални и ґлобално релевантни центер фаховосци.
На отвераню були присутни и предсидателька Покраїнскей влади Мая Ґойкович, министерка науки, технолоґийного розвою и иновацийох Єлена Беґович, покраїнски секретар за високе образованє и науково-виглєдовацку дїялносц Бранко Маркоски, городоначалнїк Нового Саду Милан Дюрич и други.