Нови Сад, 11. юлий – Предсидатель Скупштини АП Войводини Балинт Югас ше нєшка зишол у Привредней комори Войводини зоз предсидательом тей институциї Бошком Вучуревичом и сотруднїками, и з тей нагоди му презентовани рушаня макроекономских индикаторох у АП Войводини за перши квартал 2024. року.
Предсидатель Югас наглашел же Привредна комора Войводини ма нєвимерлїву значносц за войводянску привреду и же би детальни анализи и информациї о привредних цекох зоз якима Комора розполага мали буц драгоказ, як самим привредним дружтвом, так и институцийом хтори им даваю потримовку у роботи.
Югас оценєл же Скупштина АП Войводини и Привредна комора Войводини по тераз барз цесно и успишно сотрудзовали, як цо заєднїцке орґанизованє Реґионалного дїловного форуму и других активносцох и наглашел же му намира же би ше тоти два институциї и у будучносци операли єдна на другу з цильом даваня потримовки поднїмательному сектору и твореня позитивней привредней клими.
Предсидатель Скупштини АПВ наглашел и значносц отримованя и участвованя привреднїкох на конференцийох и саямских манифестацийох, бо вони представяю барз важну платформу за унапредзенє дїлованя и витворйованє нових контактох.
Предсидатель Привредней комори Войводини Бошко Вучуревич упознал предсидателя Югаса зоз актуалносцами у роботи ПКВ, наступнима конференциями и форумами, инициятивами и програмами яки ше моментално запровадзує, як и зоз витворенима сотруднїцтвами зоз привреднима коморами у жеми, реґиону, Европи и ширше.
Окрем анализи привредних рушаньох за перши квартал у тим року, на схадзки презентовани и просек стану у секторох Привредней комори Войводини, здруженю польопривреди, здруженю индустриї и здруженю услугох.