Улм/Нови Сад, 5. юлий – Предсидатель Скупштини АП Войводини Балинт Югас и подпредсидатель Скупштини АПВ Борис Новакович нєшка, у нємецким городзе Улм, присуствую на шветочним отвераню 13. Медзинародного фестивалу дунайских городох и реґийох, хтори ше традиционално отримує кажди други рок, а хтори орґанизує город Улм и Нови Улм и Дунайски биро.
Пред отвераньом традиционалного стретнуца городох и реґийох яки повязує рика Дунай, предсидатель Югас и подпредсидатель Новакович ше зишли зоз делеґацию городу Улм, зоз яким АП Войводина пестує вецейдеценийну приятельску и партнерску повязаносц.
„Сотруднїцтво АП Войводини и городу Улм през децениї розвило и помогло нашо сотруднїцтво зоз покраїну Баден-Виртемберґ, повязало нашо городи и людзох, праве так як цо нас и Дунай повязує. Як цо наглашене и при остатнєй нащиви делеґациї Улма и Нового Улма Новому Саду, тото цо нашо сотруднїцтво зоз Улмом твори як окремне и єдинствене то установене приятельство, особни контакти и безусловне довириє“, гварел Югас на схадзки зоз заменїком городоначальнїка Улма Мартином Бенделом и сотруднїками.
Предсидатель Югас з делеґацию Улма и представителями Дунайского бироа бешедовал и о можлївих дальших крочайох у рамикох Дунайско-савского сотруднїцтва хторе иницироване 2014. року, праве на отримованю Медзинародного фестивалу дунайских городох и реґийох у Улму.
Предсидатель Югас и подпредсидатель Новакович нєшка вечар буду присуствовац на шветочним отвераню 13. Медзинародного фестивалу дунайских городох и реґийох, на хторим представителє шицких подунайских жемох и реґийох буду промововац свойо културни, туристични, привредни и други потенцияли. През дзешец днї як тирва тот фестивал ше отрима вельке число конференцийох о дунайским сотруднїцтве, велї економски форуми, як и провадзаци културно-уметнїцки и музични змисти.