Улм/Нови Сад, 6. юлий – Предсидатель Скупштини АП Войводини Балинт Югас и подпредсидатель Скупштини АПВ Борис Новакович участвовали нєшка у нємецким городзе Улм на форуме яки пошвецени дунайскому сотруднїцтву, у составе 13. Медзинародного фестивалу дунайских городох и реґийох, хтори орґанизовали городоначальнїки Улму и Нового Улму, Мартин Ансбагер и Катрин Албштайґер и державни секретар за европске и реґионалне сотруднїцтво покраїни Баден-Виртемберґ Флориян Хаслер.
На початку форуму, городоначальнїк Улму Мартин Ансбагер замодлєл присутних же би з минуту цихосци одали почесц бувшому предсидательови Скупштини АП Войводини Иштванови Пасторови, хтори, по його словох, бул вельки приятель городу Улм и дунайского сотруднїцтва. Бешедуюци о Пасторових заслугох у рамикох дунайского сотруднїцтва, Ансбагер гварел же за Пастора Дунай нє бул „лєм рика и вода“, алє символ повязованя и приятельства, як и же жил у духу заєднїцтва подунайских реґионох.
Предсидатель Югас подзековал на сердечних словох городоначальнїкови Улма, и наглашел же наша покраїна уж вецей як два децениї активно и пошвецено участвує у доступних инициятивох, програмох и стратеґийох з якима ше промовує сотруднїцтво длуж Дунаю, як и же иснує подписане институционалне сотруднїцтво з покраїну Баден-Виртенберґ яке ше преширело и на сотруднїцтво скупштинских одборох и сотруднїцтво у обласци польопривреди, привреди и образованя.
„Повязованє з державами, городами и реґиями з якима нас злучує рика Дунай ма вельку значносц за нашу жем, як и за АП Войводину. Порихтани зме и далєй потримовац шицки инициятиви яки маю за циль партнерство, умреженосц и заєднїцки проєкти, з якима ше доходзи директно по наших гражданох“, гварел Югас.
Прето, предсидатель Югас знова порушал инициятиву же би ше у доглядним чаше у Новим Садзе отримало дунайско-савску конференцию, на якей би ше зишли шицки заинтересовани реґиї и городи хтори повязую тоти два рики.
„Жаданє нам предлужиц робиц на промоциї европских интеґрацийох Републики Сербиї, алє и цалого Заходного Балкану. Тиж, жадаме реализовац инициятиву предсидателя Иштвана Пастора обновиц дунайско-савске сотруднїцтво. Прето вас поволуєме же бизме у Новим Садзе отримали конференцию на якей розпатриме можлївосци унапредзованя сотруднїцтва у обласци польопривреди и информацийних технолоґийох, як и предлужиц шицки активносци на яких ше робело пред пандемию“, гварел предсидатель Югас.
На концу того форму, учашнїки заєднїцки подписали за тоту нагоду окреме обдуману заставу Медзинародного фестивалу дунайских городох и реґийох, хтора наволана „Белава вяза приятельства“. На тей символичней застави виписани текст: „Белава вяза приятельства! Моцнїме Белаву вязу приятельства! Пренайдзме тото цо нас злучує! Гайде, робме вєдно за мир, у шлєбодней, зєдинєней и демократскей Европи!“. 
Медзинародни фестивал дунайских городох и реґийох у Улму ше отримує кажди други рок, а нащивя го вецей як дзешец тисячи людзе. Представителє АПВ Войводини, як єдей зоз реґийох хтора на самим початку иницировала сотруднїцтво дунайских городох и реґийох, традиционално участвую на политичних и фахових конференцийох, як и на схадзкох зоз представителями других дунайских реґийох.