Нови Сад, 3. юлий – Предсидатель Скупштини АП Войводини Балинт Югас присуствовал нєшка на Европским першенстве у пасованю за кадетох и юниорох у Новим Садзе и додзелєл медалї побиднїком нєшкайшого змагательного дня у катеґориї до 67 килограми.
Винчуюци шицким учашнїком хтори, по його словох, на тим першенстве указали цо значи упартосц, дисциплина и фер-борба, предсидатель Югас виражел задовольство же млади и надалєй пошвецени и заинтересовани за тот индивидуални спорт хтори у нашей держави ма длугоку традицию.
„З оглядом на факт же Войводина по тераз дала винїмкових пасовачох хтори посцигли и посцигую вельки успихи на европским и шветовим уровню, тримам же нєобходне тим младим людзом дац кажду файту особней и институционалней потримовки, та сом щешлїви же нєшка мам нагоду уручиц медалї нашим омладинцом, хторих, щиро верим, чека винїмкова спортска кариєра у будучносци“, гварел предсидатель Югас.
Вон додал же барз значне за пасовацки спорт и тото же пред трома роками, з потримовку Влади Мадярскей, отворена Войводянска пасовацка академия, чийо снователє Општина Канїжа, Мадярски национални совит и Мадярска пасовацка академия „Козма Иштван“ з Будапешту, у хторей, у найлєпших условийох вирастаю будуци шампионє. Югас виражел задовольство и же селекция Републики Сербиї витворела замерковани резултат освоююци вецей медалї, медзи хторима були и змагателє з Войводянскей пасовацкей академиї.
Европске першенство у пасованю за кадетох и юниорох почало 24. юния у Новим Садзе и тирва по 7. юлий, а участвую екипи зоз 39 европских жемох.