Нови Сад, 2. юлий – Предсидатель Скупштини АП Войводини Балинт Югас приял нєшка министра за людски и меншински права и дружтвени диялоґ Томислава Жиґманова, зоз хторим бешедовал о предлуженю сотруднїцтва двох институцийох, як и о положеню и витворйованю правох меншинских националних заєднїцох у АП Войводини и Републики Сербиї.
Предсидатель Югас визначел же досцигнути уставни и законски рамик у вязи зоз витворйованьом правох националних заєднїцох у нашей жеми репрезентативни, же може послужиц як приклад, и же твори добри нормативни рамик за очуванє културного идентитету, службене хаснованє язикох и писмох, афирмацию образованя и информованя на мацеринским язику.
„Виталну улогу у унапредзеню меншинских правох маю национални совити националних заєднїцох и думам же добри момент, после шейсцох рокох од прилапйованя вименкох и дополнєньох Закона о националних совитох националних меншинох, заєднїцки розпатриц и сумировац посцигнути резултати и ефекти“, гварел Югас и виражел задовольство пре звекшанє буджетного рамику за роботу националних совитох 17 одсто, о чим бешедовал министер Жиґманов.
Предсидатель Скупштини АПВ оценєл же би, зоз цильом усоглашованя зоз прегваряцким поглавйом 23. у процесу европских интеґрацийох Републики Сербиї, до фокусу требало положиц и ревидованє Акцийного плану за витворйованє правох националних меншинох, же би ше прецизовало стратеґийни опредзелєня унапредзеня институционалного и законодавного рамику у обласци основних людских и меншинских правох и шлєбодох.
Югас и Жиґманов бешедовали и о важносци уважованя специфичносцох каждей националней заєднїци окреме, як и о значносци збачованя и ришованя економских, социялних и других окремносцох и потребох.
„Часто ше пове же Войводина Европа у малим, а наш заєднїцки задаток посцигнуц уровень складного соживота и промоциї рижнородносци хтора нас збогацує, пестовац ю далєй и унапредзовац“, гварел Югас.
На схадзки у Скупштини АПВ виражена и взаємна заєднїцка намира и дзека за дальшим добрим сотруднїцтвом покраїнских институцийох и компетентного министерства.