Нови Сад, 27. юний – Скупштина Автономней покраїни Войводини, на своєй штвартей схадзки, принєсла Покраїнску скупштинску одлуку о Закончуюцим рахунку буджету Автономней покраїни Войводини за 2023. рок. Уводне обгрунтованє з нагоди наведзеней покраїнскей скупштинскей одлуки на схадзки поднєсла Смилька Йованович, член Покраїнскей влади и покраїнски секретар за финансиї.
Скупштина на нєшкайшей схадзки розпатрела Рочни звит Покраїнского защитнїка гражданох – омбудсмана за 2023. рок и на таки способ ше упознала з роботу тей институциї у предходним року. Рочни звит на схадзки представела доц. др Драґана Чорич, Покраїнски защитнїк гражданох – омбудсман.
У предлуженю схадзки, Скупштина розпатрела Звит о управяню и розполаганю з явну власносцу Автономней покраїни Войводини за 2023. рок и по розпатраню, принєсла Заключенє хторе з нагоди наведзеного звиту предложела Покраїнска влада.
На схадзки Скупштини АПВ розпатрени и прилапени: Звит о дїлованю Фонду «Европски роботи» Автономней покраїни Войводини за 2023. рок и Звит о роботи и финансийним дїлованю Фонду за вибеженцох, розселєни особи и за сотруднїцтво зоз Сербами у реґиону за 2023. рок.
Тиж, Скупштина АП Войводини принєсла Одлуку о менованю члена Совиту Универзитету у Новим Садзе и Одлуку о менованю члена Совиту Економского факултету у Суботици. На схадзки принєшена и Одлука о вименкох Одлуки о виборе предсидательох и членох одборох Скупштини Автономней покраїни Войводини.