Нови Сад, 26. юний – Предсидатель Скупштини АП Войводини Балинт Югас приял нєшка министерку за европски интеґрациї Таню Мищевич, з хтору бешедовал о значносци процесу европских интеґрацийох Републики Сербиї и актуалних темох у вязи з процесом придружованя.
Министерка Мищевич упознала предсидателя Югаса з деталями закончуюцей часци роботи на Реформскей аґенди, хтора по ратификованю оможлїви нашей жеми хасновац средства з Инструментох за реформи и рост за Заходни Балкан ЕУ, за период по 2027. рок.
„Як и по тераз, Скупштина АП Войводини и покраїнски институциї порихтани зробиц шицко цо потребне же би ше процес европских интеґрацийох пошвидшал, як и участвовац у максималним капацитету у потримовки ЕУ и прейґгранїчних проєктох локалних самоуправох и цивилного дружтва, же би вони були ище конкретнєйши и квалитетнєйши“, визначел Югас.
Предсидатель Югас и министерка Мищевич бешедовали и о значносци факту же пошвидко Мадярска будзе предшедовац зоз Совитом ЕУ, оценююци же приятельска и партнерска потримовка тей жеми Републики Сербиї сиґурно пошвидша можлїви доступни крочаї на нашей драги ґу ЕУ. Вони окреме наглашели значносц и бенефити яки проєкти, хтори финансує Европска уния, маю на живот гражданох и указали на потребу моцнїц капацитети хтори нам оможлївя ище моцнєйшу абсорпцию средствох.
Югас и Мищевич бешедовали и о потреби за флуїднєйшим и швидшим обтоку на гранїчних преходох, як и о доприношеню, яке национални заєднїци хтори жию у АП Войводини даваю и яке можу дац на европскей драги нашей жеми.