Беоґрад/Нови Сад, 25. юний – Предсидатель Скупштини АП Войводини Балинт Югас присуствовал нєшка у Беоґрадзе на шветочним приєму з нагоди 75 роки снованя Совиту Европи.
На шветочносци, хтора була орґанизована з нагоди велького ювилею, бешедовали Янош Бабич, шеф Канцелариї Совиту Европи у Беоґрадзе и Таня Мищевич, министерка за европски интеґрациї у Влади Републики Сербиї и ґенерална секретарка Совиту Европи Мария Пейчинович Бурич, прейґ видео-порученя.
Як цо наглашене у викладаньох, Совит Европи ше през свою длугу историю, намагал запровадзиц и очувац правни стандарди у обласци людских правох, демократиї и владавини права, з цильом же би 46 держави членїци жили у мире и безпечносци.
У року означованя ювилею, у цалей Европи як и Републики Сербиї, орґанизовани велї програми и проєкти хтори маю за циль промововац и унапредзиц вредносци за хтори 
ше три штварцини вику заклада Совит Европи.
Република Сербия членїца Совиту Европи од 2003. року, а Канцелария Совиту Европи у Беоґрадзе у сотруднїцтве зоз Владу Републики Сербиї и другима компетентнима институциями окреме анґажована до процесу реформи, окреме у промовованю демократиї и доброго управяня и унапредзеня и защити людских правох и владавини права, з цильом сполньованя условийох за членство у ЕУ.