Нови Сад, 6. юлий – Предсидатель Скупштини АП Войводини Балинт Югас присуствовал нєшка у Новим Садзе на шветочносци з нагоди додзельованя наградох «Капура успиху» за квалитет услугох у погосцительней и туристичней привреди, хтору традиционално додзелює Привредна комора Войводини.
Тоту награду ше уж 32 роки додзелює тим хтори на найлєпши способ промовую туристични потенцияли АП Войводини и доприноша формованю войводянских туристичних вредносцох.
Того року, награда «Капура успиху» у катеґориї културно-историйного туризму додзелєна Музею «Тера» зоз Кикинди, у катеґориї городского туризму Хотелу «Пупин» зоз Нового Саду, у катеґориї манифестацийного туризму манифестациї «Днї пива» хтора ше отримує у Зренянину, у катеґориї винского туризма Винариї Винчич зоз Ердевику и у катеґориї руралного туризму Вили «Вико» зоз Ченею.
Специялне припознанє за унапредзенє и афирмацию рецептивного туризму и промоцию АП Войводини як туристичней дестинациї додзелєне Данкови Денешови зоз Суботици, власнїкови Аґенциї «Alpha travel SEE».
После шветочносци, предсидатель Скупштини АП Войводини Балинт Югас виражел задовольство же ше з рока на рок ґранїцу туристичних потенциялох у Войводини дзвига на висши уровень и винчовал тогорочним лауреатом.
«Вельке задовольство видзиц людзох хтори свойо локални заєднїци през туристични субєкти представяю на найлєпши можлїви способ и зоз своїм знаньом, искуством, упартосцу и пошвецену роботу доприноша привредному росту, а на таки способ и твореню лєпшей вкупней слики о нашей покраїни. Ище векше задовольство же сом зоз даєднима мал нагоду и особнє сотрудзовац, наприклад зоз паном Денешом, хтори у велїм допринєсол представяню Войводини и Сербиї як атрактивней туристичней дестинациї, насампредз на мадярским тарґовищу, алє и на тарґовищох других сушедних жемох, Блїзкого Востоку и Китаю», гварей предсидатель Югас.
Тогорочним лауреатом награди су додзелєли предсидателька Покраїнскей влади Мая Ґойкович и предсидатель Привредней комори Войводини Бошко Вучуревич.