Нови Сад, 4. юний – Стратеґийне партнерство Републики Сербиї и Мадярскей засноване на моцних фундаментох приятельства и почитованя, а обидва жеми моцно опредзелєни же би ше сотруднїцтво и далєй преглїбйовало и моцнєло, оценєне на нєшкайшей схадзки предсидателя Скупштини АП Войводини Балинта Югаса и амбасадора Мадярскей у Сербиї Йожефа Мадяра.
Предсидатель Югас и амбасадор Мадяр бешедовали у Скупштини АП Войводини о улоги и доприношеню хторе мадярска национална заєднїца у Войводини дава тому сотруднїцтву.
«Мадярска национална заєднїца у Войводини то мост хтори нєрозтаргуюцо повязує два жеми. З розуменьом и потримовку Републики Сербиї войводянски Мадяре маю и хасную шицки можлївосци хтори доприноша очуваню и змоцньованю їх идентитету, а Мадярска през програми економскей помоци дава моцну подпорку социялному благостану и твореню лєпших условийох живота», визначел предсидатель Югас.
Предсидатель Югас и амбасадор Мадяр визначели вельке значенє и потенциял у тим же Мадярска од 1. юлия того року превежнє предшедованє зоз Совитом Европскей униї (ЕУ) и же Република Сербия сиґурно достанє сиґурного и пошвеценого партнера у своїм процесу придружованя ґу ЕУ.
«Прешвечени сом же Мадярска под час свойого предшедованя уложи напруженє же би ше на найлєпши способ прецизовало, плановало и витворело потреби и прейґгранїчни проєкти хтори, зоз помоцу предприступних фондох ЕУ, значно можу злєпшац живот гражданох Републики Сербиї и пошвидшац процес евроинтеґрацийох», гварел Югас.
Значну часц схадзки предсидатель Югас и амбасадор Мадяр пошвецели розпатраню можлївосцох и инициятивох хтори би допринєсли швидшому транспорту на гранїчних преходох медзи двома жемами, оценююци же ше роби о теми хтора од ключней важносци за повязованє двох жемох, як за привреду, так и за гражданох.
На схадзки ше бешедовало и о важносци факту же мадярска заєднїца, после закончених локалних виберанкох у Републики Сербиї, будзе у можлївосци опредзелїц ше и активно участвовац у креированю локалних политикох, насампредз у штредкох у хторих жиє процентуално векше число припаднїкох мадярскей заєднїци.
Бешедоване и о значних актуалних проєктох хтори вєдно запровадзую Сербия и Мадярска, як цо то вибудов швидкей гайзибанскей драги Беоґрад – Будимпешта, як и о можлївосцох за ище интезивнєйше прейґгранїчне сотруднїцтво и заєднїцке апликованє у прейґгранїчних програмох. Вєдно оценєне же, и попри одличного сотруднїцтва, и далєй постої огромни потенциял за моцнєнє економских вязох, повязованє привреднїкох, як и за унапредзованє вязох у обласци култури и образованя.
На схадзки у Скупштини АП Войводини присуствовали и Естер Чалокези, ґенерални конзул Мадярскей у Суботици и Жолт Сакалаш, заменїк ґенералного секретара Скупштини АПВ.