Рабе/Нови Сад, 25. май – Предсидатель Скупштини АП Войводини Балинт Югас присуствовал нєшка на традиционалней шветочносци отвераня гранїцох на тромеджи Сербиї, Мадярскей и Румуниї. Гранїчни преход медзи трома жемами знова дочасово отворени того викенду, у орґанизациї Еврореґиї Дунай-Криш-Мориш-Тиса (ДКМТ), зоз богату културну и спортску програму хтора того року будзе орґанизована у румунским погранїчним населєню Беба Веке.
Зоз оцену же тота традицийна шветочносц и стретнуце на тромеджи представяю потвердзенє длугорочного сотруднїцтва и приятельских одношеньох трох сушедних жемох, предсидатель Югас визначел же ше нєшка означує швето двацецседемрочного еврореґионалного сотруднїцтва хторе, медзи иншим, приведло и до отвераня тей гранїци и уплївовало на животи гражданох хтори тераз, же би пришли до векших реґионалних центрох преходза драгу длугоку дзешец километри, место потерашнєй хтора мала пейдзешат.
«Triplex Confinium (тройнїста гранїца) нє лєм ґеоґрафска характеристика, то символ нашей зложеней заєднїцкей историї, а тиж
так и символ културней рижнородносци и добросушедского сотруднїцтва. Мировна конференция приведла до того же би шейдзешат милиони людзе достали свою державу, алє тиж так и же би двацец и пейц милиони людзе заспали у єдней держави и же би ше рано пребудзели у другей. То наша заєднїцка история и наша заєднїцка судьба», поручел предсидатель Югас.
Цитируюци стару присловку хтора гвари же кед дує витор пременкох, дахто одлучи вибудовац мури, а дахто будує витерняки, предсидатель Югас гварел же учашнїки ДКМТ сотруднїцтва вибрали будовац витерняки и же тоти витерняки транспортна, туристична и културна инфраструктура хтора директно уплївує на злєпшанє квалитету живота людзох хтори жию у погранїчним подручу.
«Я прихильнїк идеї и думаня пана Иштвана Пастора хтори гуторел же будуюци власну будучносц можеме буц успишни лєм теди кед у тим успишни и нашо сушеди. Прето вас поволуєм же бизме вєдно предлужели и далєй робиц на тим. Щешлїви вам дзень Еврореґиї!», поручел предсидатель Югас.
Представитель Жупаниї Чонґрад – Чанад Полнар Урш наглашел же зоз рока на рок ДКМТ сотруднїцтво вше баржей напредує и виражел задовольство же у плану отверанє ище єдного гранїчного преходу, як конкретного резултату того сотруднїцтва. Вон виражел надїю же ше пошвидко почнє реализовац инициятиву повязованя Кикинди, Сеґедину и Темишвару зоз гайзибанским транспортом.
Национални координатор ДКМТ за Румунию и представитель Жупаниї Тимиш Виорел Коифан, хтори єден зоз сновательох ДКМТ сотруднїцтва гварел же вельке число людзох роками укладало огромну усиловносц и енерґию же би нєшка мали конкретни резултати хтори доприноша лєпшому животу гражданох у тим подручу. Вон оценєл як барз значне лєпшу и векшу преходносц людзох и роби и визначел прешвеченє же будзе ище вельо заєднїцки проєкти у будучносци.
На шветочносци бешедовал и подпредсидатель Жупаниї Бач Кишкун Корнел Мак.
На шветочносци отвераня присуствовал и подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот, помоцнїца покраїнского секретара за реґионални розвой, медзиреґионалне сотруднїцтво и локалну самоуправу Видосава Ендерич, представителє министерствох у Влади Републики Сербиї и локалних самоуправох.
После привитних бешедох, отримане и традиционалне прейґгранїчне крос обегованє, на хторим участвовали дзеци зоз трох
околних валалох у Сербиї, Мадярскей и Румуниї. Шветочносц орґанизована при памятнїку Triplex Confinium (тройнїста гранїца), каменю гранїчнїку на тромеджи, хтори представя моцни символ зложеней историї, културней рижнородносци и интезивного сотруднїцтва медзи трома жемами.
После шветочного отвераня, у Вельким Семиклушу у румунскей Жупаниї Тимиш, почала схадзка Ґенералней скупштини ДКМТ, на хторей ше бешедовало о витворених и предстояцих проєктох у рамикох того еврореґионалного сотруднїцтва.