Нови Сад, 20. май – Предсидатель Скупштини АП Войводини Балинт Югас нащивел нєшка 91. медзинародни польопривредни саям у Новим Садзе дзе, вєдно зоз ґенералним директором Новосадского сайму Николом Ловричем, бешедовал зоз представителями институцийох, компанийох и продуковательох хтори участвую на тей найзначнєйшей аґро-бизнис подїї у реґионє.
У бешеди медийом, предсидатель Югас визначел подполну порихтаносц и одлучну намиру же би ше потерашнє добре сотруднїцтво Скупштини АП Войводини и Новосадского сайму предлужело и додатно унапредзело.
«Мило ми же саям польопривреди манифестация хтора знова напредує и звекшує число викладачох и присутних жемох. Тот саям представя швето нашей польопривреди и на нїм зоз гордосцу можеме указац же зме способни продуковац польопривредну механїзацию шветовей класи, же маме винїмково квалитетни продукти поживовей и прерабяцкей индустриї у польопривреди», визначел предсидатель Югас.
Вон наглашел же Новосадски саям место привредного сотруднїцтва и твореня синерґиї знаня, злучованя польопривривреди, привреди и науки и креированя нових вредносцох.
«Тримам же значне и тото же того року Европска уния (ЕУ) перши раз партнер тей манифестациї и наздавам ше же то злєпша дальше сотруднїцтво АП Войводини и других европских реґийох», наглашел Югас.
На схадзки хтора отримана пред обиходзеньом викладачох тогорочного сайму, предсидатель Югас и директор Ловрич бешедовали о порушованю инициятиви же би Мадярска була жем партнер предстояцого Сайму туризма на Новосадским сайму, у децембру того року.
«Бешедовал сом зоз директором Ловричом и о тим же на яки способ можеме змоцнїц сотруднїцтво Мадярскей и Новосадского сайму и взаємно промововац туристични потенцияли. Прилапел сом идею пробовац реализовац намиру же би Мадярска була партнер предстояцого Сайму туризма и будземе ше намагац тото вєдно витвориц», гварел Югас.
Ґенерални директор Новосадского сайму Никола Ловрич виражел задовольство пре нащиву предсидателя Югаса на тогорочним сайму и пре предлужованє длугого успишного сотруднїцтва зоз Скупштину АП Войводини.
Вон визначел и же Мадярска вше була сиґурни и активни партнер Новосадского сайму и же обчекує же би ше тота синерґия предлужела на хасен дальшого розвою АП Войводини и Републики Сербиї.
Югас и Ловрич вєдно обишли штанди Покраїнского секретарияту за польопривреду, водопривреду и лєсарство и других покраїнских институцийох, Министерства польопривреди Републики Сербиї, Привредней комори Войводини, компаниї КИТЕ д.о.о., як и других викладачох на тогорочним сайме.
Медзинародни польопривредни саям, 91. по шоре, тирва од 18. по 23. май, а на нїм участвую вецей як 1200 викладаче зоз Сербиї и ище 40 жемох.