Нови Сад, 18. май – Зоз шветочну академию у Городскей концертней сали нєшка означена 64. рочнїца од снованя и 50. рочнїца назви Факултету технїчних наукох у Новим Садзе и з тей нагоди предсидательови Скупштини АП Войводини Балинтови Югасови уручена Повеля за успишне сотруднїцтво и винїмкове доприношенє розвою Факултету технїчних наукох.
Дзекуюци на тим припознаню, предсидатель Скупштини АП Войводини Балинт Югас визначел же ФТН углови камень нашей унивезитетскей заєднїци, у найшветлєйшим смислу, заєднїци студентох и професорох.
«Знанє хторе ФТН дава студентом конкурентне нє лєм у наших и реґионалних рамикох, алє и у медзинародним окруженю, а потвердзенє тому то и успих наших студентох у програмох медзинародного чераня ЕРАЗМУС як и успих хтори посцигую на мастер и докторских студийох у иножемстве. И прето на гордосц и нашей науковей заєднїци и Автономней покраїни Войводини, же на ФТН-у, тим дияманту хтори ше обрабя уж 64 роки, нашо студенти здобуваю знанє хторе конкурентне часу и нє муша одходзиц студирац до иножемства, а здобуте знанє можу вихасновац на общу добробут нашей заєднїци», поручел предсидатель Югас.
Вон визначел и же зме у длугшим часовим периодзе були шведкове «одлїву мозґох» и одлїву роботней моци, алє и же тот тренд спомалшени, а тому шведочи факт же вше вецей млади приноша одлуку же би ше заш лєм врацели до жеми.
«Млади, фахови кадри зоз знаньом хторе доставаю ту цалком оспособени же би були конкурентни своїм колеґом зоз цалого швета у ИТ индустриї хтора найшвидше рошнє и хтора найдинамичнєйша. Праве тоти млади окремни людзе, дзекуюци своїм ментором и професором високо позиционовали Нови Сад на ИТ мапи швета. Вельочислени, винїмково успишни компаниї основани у Новим Садзе, дзекуюци хторим млади людзе нє муша вецей роздумовац о тим до хторей жеми емиґрую, алє треба же би роздумовали у хторей успишней компаниї найду роботу», гварел предсидатель Югас окреме наглашуюци прешвеченє же и у деценийох пред нами мисия Факултету технїчних наукох же би бул чувар знаня и же би непреривно поцаговал гранїци технолоґийного напредованя.
Министер будовательства, транспорту и инфраструктури у Влади Републики Сербиї Ґоран Весич наглашел же час у хторим жиєме то час константного и динамичного розвою нових технолоґийох, а порушуюцу моц того часу творя факултети технїчних наукох хтори представяю ключну моц економского и дружтвеного розвою. Вон поволал студентох и професорох же би предлужели стимуловац розвой, участвовали у вельких проєктох и же би вєдно зоз Владу Републики Сербиї направели лєпше место за живот шицких гражданох.
Проф. др Борис Думнич, о.д. декана Факултету технїчних наукох здогаднул же тот факултет младим виглєдовачом и сотруднїком вше обезпечовал усовершованє у жеми и иножемстве и моцно стимуловал мобилносц и студентох и занятих. Вон подзековал шицким хтори зоз свою роботу и потримовку допринєсли тому же би после 64 рокох факултет технїчних наукох бул єден зоз найугляднєйших, на хторим вирастаю нови ґенерациї винїмкових фаховцох.
На шветочносци бешедовали и ректор Универзитету у Новим Садзе проф. др Деян Мадич як и други добитнїки Повелї за успишне сотруднїтво и винїмкове доприношенє розвою Факултету технїчних наукох: городоначалнїк Нового Саду Милан Дюрич, покраїнски секретар за високе образованє и наукововиглєдовацку дїялносц проф. др Бранко Маркоски и викар Епископа бачкого, Епископ Мохачки Дамаскин.
Додзелєни и награди за посцигнути винїмково резултати, як и подзекованє за успишне сотруднїтво и значне доприношенє розвою и унапредзеню наставного и виглєдовацкого капацитету ФТН компаниї «Schneider Electric d.o.o. Novi Sad».
Шветочна академия возвелїчана и зоз музичнима виводзенями познатого виолинисти Стефана Миленковича и хора Ґимназиї «Йован Йованович Змай» зоз Нового Саду.