Сримски Карловци, 15. май – Предсидатель Скупштини АП Войводини Балинт Югас и подпредсидателє Скупштини AПВ Неманя Завишич и Борис Новакович присуствовали нєшка у Сримских Карловцох на шветочним означованю 176. рочнїци Майскей скупштини, у орґанизациї Влади Републики Сербиї.
Пред початком шветочней академиї, найвисши делеґациї Народней скупштини Републики Сербиї, Влади Републики Сербиї, Скупштини АП Войводини, Покраїнскей влади, Городу Нового Саду и други, положели венци на памятну таблу на будинку Маґистрату у Сримских Карловцох.
Предсидатель Скупштини АП Войводини Балинт Югас визначел же у шицких, за европску историю, преламних рокох, сербски и мадярски народ дзелєли и дзеля нє лєм заєднїцку историю, алє и заєднїцки живот у остатнїх тисяч рокох.
«Требало же би прешли скоро 160 роки од револуцийного 1848. року и 70 роки од законченя Другей шветовей войни, же би
ше у Сербиї порушали процеси историйного помиреня, же би ше заварло отворени, за обидва заєднїци боляци историйни питаня и же би ше дзекуюци политичней мудросци и розумносци предсидателя Скупштини АП Войводини Иштвана Пастора и тедишнього предсидателя Влади Александра Вучича демонстровало способносц зочованя зоз власну прешлосцу», гварел предсидатель Югас.
Вон додал же праве остатня децения потвердзенє же зме як дружтво, политична заєднїца и народи напредовали у ситуацийох кед политична мудросц и розумносц надвладали политики виключносци и нєтолеранциї.
«И праве остатня децения потвердзенє же лєм заєднїцка пошвеценосц ґарантує витворенє високо поставених цильох. И як цо зме по теди, стратеґийно и солидарно будовали заєднїцку будучносц, прешвечени сом же драга политичного сотруднїцтва єдини одвит на шицки спокуси нашого часу», поручел предсидатель Югас.
Бешедуюци присутним, предсидателька Покраїнскей влади Мая Ґойкович гварела же Майска скупштина єдна зоз найзначнєйших подїйох у нашей историї, бо зоз ню нєдвосмислово виказане виковне намаганє и жаданє шлєбоди сербского народу Войводини и його зєдиньованє зоз братами зоз Сербиї.
«Серби оталь гласно скричали же жадаю шлєбоду свойого язика и виросповиданя, право школовац ше и утаргованє феудализму. Велї численши, материялно богатши и кадрово орґанизованши народи Европи того часу нє мали шмелосци и нє були порихтани рушиц по тей драги», визначела предсидателька Ґойкович.
Пред присутнима бешедовал и министер за роботу, обезпечованє роботи, борецки и социялни питаня Неманя Старович.
На шветочносци уручени припознаня Покраїнскей влади «Милутин Миланкович» у обласци науки професорови емеритусови Проф. др Божови Далмациї, а награда «Павле Йованович» у обласци уметносци, власнїкови уметнїцкей лївальнї «Станишич» Александрови Станишичови.
У рамикох означованя Майскей скупштини, предполадньом, отримани и церемониї
покладаня венцох и отримани спомин визначним особом Майскей скупштини и сербскей историї.
Подпредсидателє Скупштини АП Войводини Неманя Завишич и Борис Новакович у Панчеве, у мено Скупштини АП Войводини, положели венєц на памятнїк першому войводови Сербскей Войводини Стеванови Шуплїкцови и присуствовали на спомину хтори отримани у манастире Крушедол.
Подпредсидателє Завишич и Новакович положeли вeнєц и на памятнїк вождови Дьордьови Стратимировичови у церкви Святих апостолох Петра и Павла у Сримских Карловцох и на гробе вожда Дьордя Стратимировича, у манастире Воведениє Пресвятей Богородици у Сримских Карловцох, дзе служени и спомин вождови Дьордьови Стратимировичови и митрополитови Йосифови Раячичови.