Нови Сад, 8. май – На нєшкайшей схадзки Скупштини АП Войводини зоз векшину гласох вибрана нова Покраїнска влада, а за предсидательку Покраїнскей влади у новим мандату вибрана Мая Ґойкович.
У своїм експозеу, Мая Ґойкович представела плани, основни напрямки, приоритети и цилї роботи новей Покраїнскей влади. Медзи иншим, наявела континуитет у реализациї розвойних проєктох зоз фокусом на обласцох привреди, транспорту, комуналней инфраструктури, култури и социялней защити.
«У шицких предстояцих проєктох хтори чечуци, капитални и розвойни, у шицких обласцох своєй компетенциї, Покраїнска влада ше будзе руководзиц з интересами шицких гражданох Автономней покраїни Войводини, їх благостаном и просперитетом. На таки способ вєдно и зоз порушованьом шицких потенциялох и ресурсох, уложиме вельку усиловносц же бизме витворели зарисовани цилї и превозишли шицки спокуси хтори стоя пред Автономну покраїну Войводину и Републику Сербию», наглашела предсидателька Ґойкович и визначела же Покраїнска влада у наступним периодзе представени рамик будзе виполньовац зоз конкретнима проєктами, мирами и шицкима другима активносцами, у найлєпшим можлївим интересу шицких гражданкох и гражданох Войводини и подзековала на потримовки и указаним довирию.
Попри предсидательки Ґойкович, Покраїнску владу творя и:
Сандра Божич, вибрана за подпредсидательку Покраїнскей влади;
Отот Роберт, вибрани за подпредсидателя Покраїнскей влади и покраїнского секретара за образованє, предписаня, управу и национални меншини – национални заєднїци;
Владимир Ґалич, вибрани за подпредсидателя Покраїнскей влади и покраїнского секретара за польопривреду, водопривреду и лєсарство;
Др Милан Попов, вибрани за подпредсидателя Покраїнскей влади и покраїнского секретара за здравство;
Неманя Ерцеґ, вибрани за покраїнского секретара за урбанизем и защиту животного штредку;
Ненад Иванишевич, вибрани за покраїнского секретара за привреду и туризем;
Предраґ Вулетич, вибрани за покраїнского секретара за социялну политику, демоґрафию и ровноправносц полох;
Александар Софич, вибрани за покраїнского секретара за реґионални розвой, медзиреґионалне сотруднїцтво и локалну самоуправу;
Александра Чирич Бошкович, вибрана за покраїнского секретара за културу, явне информованє и одношеня зоз вирскима заєднїцами;
Смилька Йованович, вибрана за покраїнску секретарку за финансиї;
Проф. др Бранко Маркоски, вибрани за покраїнского секретара за високе образованє и наукововиглєдовацку дїялносц;
Дане Баста, вибрани за покраїнского секретара за спорт и младеж;
Боян Вранькович, вибрани за покраїнского секретара за енерґетику, будовательство и транспорт.
После вибору, предсидателька, подпредсидателє и члени новей Покраїнскей влади пришагали у Скупштини АП Войводини. Новей Покраїнскей влади винчовали предсидатель, подпредсидателє и посланїки Скупштини, хтори им пожадали успишну роботу и добре сотруднїцтво.
Скупштина АП Войводини меновала Жолта Сакалаша за заменїка ґенералного секретара Скупштини Автономней покраїни Войводини.