Нови Сад, 25. април – Скупштина Автономней покраїни Войводини у предлуженю Першей схадзки принєсла Одлуку о виборе предсидателя Скупштини АП Войводини, Одлуку о виборе подпредсидательох Скупштини и Одлуку о менованю ґенералного секретара Скупштини. На схадзки принєшена и Одлука о виборе предсидательох и членох Одборох Скупштини Автономней покраїни Войводини.
За предсидателя Скупштини Автономней покраїни Войводини, з векшину гласох посланїкох, вибрани покраїнски посланїк Балинт Югас.
После вибору на место предсидателя Скупштини АП Войводини, Балинт Югас пред посланїками пришагал:
«Пришагам же будзем почитовац Устав и закон Републики Сербиї, Статут Автономней
покраїни Войводини и же длужносц предсидателя Скупштини Автономней покраїни Войводини будзем окончовац совисно, нєпристрасно и одвичательно, руководзаци ше зоз демократскима началами, интересами гражданох и интересами Автономней покраїни Войводини и же будзем чувац угляд Скупштини».
У своєй першей бешеди як предсидатель Скупштини, Балинт Югас винчовал шицким покраїнским посланїком верификацию мандата и пожадал им успишну роботу и добре сотруднїцтво.
Подзековал на указаним довирию и визначел же ма вельку чесц и одвичательносц вєдно зоз посланїками предлужиц робиц на очуваню и дальшим унапредзеню високого уровня толеранциї, културного диялогу, медзисобного почитованя, сотруднїцтва и ефикасносци, як фундамента добрей пракси у скупштинскей роботи и у предходних мандатох.
Зоз членом 13. Покраїнскей скупштинскей одлуки о Скупштини Автономней покраїни Войводини и членом 22. Дїловнїка о роботи Скупштини АП Войводини, утвердзене же при каждим конституованю, Скупштина на предкладанє предсидателя, з окремну одлуку утвердзує число подпредсидательох. Скупштина одлучела же у тим мандату будзе мац штирох подпредсидательох.
За подпредсидательох Скупштини Автономней покраїни Войводини вибрани: Александра Малетич, Дамир Зобеница, Неманя Завишич и Борис Новакович.
Подпредсидателє Скупштини пред ступаньом на длужносц, на основи члена 27. Дїловнїка о роботи Скупштини Автономней покраїни Войводини, приьагали пред Скупштину, а по тим им предсидатель сердечно винчовал и пожадал успишну роботу.
У предлуженю зашеданя, Скупштина за ґенералного секретара Скупштини Автономней покраїни Войводини меновала др
Сандру Стойкович, доктора правних наукох. После менованя, др Сандри Стойкович винчовали предсидатель и подпредсидателє Скупштини.
На концу зашеданя, Скупштина принєсла Одлуку о виборе предсидательох и членох одборох Скупштини Автономней покраїни Войводини.