Нови Сад/Сента, 18. юний – Предсидатель Скупштини АП Войводини Балинт Югас присуствовал нєшка у Сенти на пущаню до роботи городскей студнї за подмирйованє зоз воду за пице, єдним зоз барз значних инфраструктурних проєктох у тим месце, хтори финансовали Покраїнска влада, Општина Сента и компания Japan Tobacco International (JTI).
Бешедуюци о значносци того проєкту, предсидатель Скупштини АПВ Балинт Югас визначел же слово о позарядовим прикладзе доброго сотруднїцтва покраїнского и локалного уровня власци и привреди у ришованю озбильних проблемох гражданох.
“Зоз вибудову и пущаньом до роботи городскей студнї за подмирйованє зоз воду за пице у Сенти оможлївене нєзавадзане подмирйованє з воду за пице за 11 тисячи ґаздовства того городу, а зоз заєднїцкима моцами превозидзени проблем подмирйованя з воду зоз яким ше жителє Сенти по тераз зочовали, насампредз у лєтнїх мешацох. Вибудов додатней водней инфраструктури финансовали Покраїнска влада зоз 6 милиони динарами, општина Сента и компания Japan Tobacco International (ЈTI). Вкупна вредносц инвестициї, до якей уключене и будованє и опреманє студнї, як и повязованє цивоводох, виношела вецей як 10 милиони динари”, визначел Югас.
Дзекуюци амбасадорови Япону Акири Имамури и японскому народу на приятельстве, дошлїдней потримовки и укладаньох до нашей жеми, предсидатель Югас здогаднул и на тото же тарґовинска черанка медзи Сербию и Японом прешли рок виношела 330 милиони евра. Вон наглашел же у АП Войводини дїлую 6 компаниї зоз тей жеми хтори даваю моцни допринос локалней економиї и заєднїцом у Сенти, Сримских Карловцох, Новим Садзе, Руми и Индїї.
Предсидатель Югас визначел и же остатнї штири роки Покраїнска влада уложела 613 милиони динари до проєктох у Сенти, дзекуюци хторим, медзи иншим, обновени и вибудовани школски обєкти, драгова инфраструктура и асфалтовани улїчки, ревитализовани студнї и вибудована канализацийна мрежа.
Предсидатель Югас окреме подзековал компаниї JTI, єдней зоз найуспишнєйших иножемних компанийох у жеми и найважнєйшим тарґовищним актеру у Сенти на датей и дошлїдней дружтвеней одвичательносци и потримовки у реализациї числених проєктох у локалней заєднїци. Вон здогаднул на тото же ше, од уходзеня на сербске тарґовище 2006. року, тей компаниї за 18 роки удало постац часц заєднїци, лидер на тарґовищу зоз учасцу 28,8 одсто, утройнїсциц число занятих, обезпечиц еґзистенцию 3000 фамелийом и аж дзевец раз буц преглашена як найлєпши роботодавец у жеми.
Амбасадор Япону у Сербиї Його екселенция Акира Имамура наглашел же як найвекши роботодавец у доганскей индустриї Сербиї, JTI мал ключну улогу у тим проєкту.
”У Япону дружтвено одвичательне дїлованє часц главних цекох активносцох приватних компанийох, а нє додатна терха хтору ше муши зношиц. JTI приклад такей пошвеценосци зоз своїм проактивним анґажованьом у проєктох з якима ше потримує заєднїцу. Таки инициятиви нє лєм же ришую моментални потреби алє и будую драгу за моцнєйши, одпорнєйши заєднїци и тирваце злєпшанє живота людзох“, визначел амбасадор и додал же нєдавна нащива сербскей привредней делеґациї Япону додатно наглашує нарастаюци вязи медзи нашима двома жемами.
Директор фабрики JTI у Сенти Александар Живков здогаднул же компания JTI реализовала велї активносци хтори унапрямени на злєпшанє квалитету живота людзох и унапредзенє локалней заєднїци. У Сенти, дзе ше находзи JTI фабрика, компания помогла реконструкцию театру и городскей фонтани, полєшованє побрежя рики Тиси, обновйованє городского базену, як и снованє Дньового центру за инвалидох войни. Як цо гварел, компания JTI уж 17 роки потримує гуманитарну орґанизацию Каритас з донациями з якима ше оможлївює хасновательом Народней кухнї у Сенти достац цепле єдзенє у жимских мешацох.
На шветочним отвераню присуствовали и подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот, заменїк покраїнского секретара за польопривреду, водопривреду и лєсарство Золтан Тот, державни секретар у Министерстве финансийох Йожеф Керекеш, директор корпоративних роботох и комуникацийох у компаниї JTI за Заходни Балкан Ґоран Пекез, директор за японски дїла JTI у шедзиску компаниї у Женеви Уриу Ватару, и представителє Општини Сента.