Батуми/Нови Сад, 13. юния – Предсидатель Скупштини АП Войводини Балинт Югас и подпредсидателє Дамир Зобеница и Александра Малетич участвую на 8. Чарноморским самиту у Батумию у Ґрузиї, хтори ше отримує у рамикох Ґенералного зашеданя Скупштини европских реґийох (АЕР), чий АП Войводина длугорочни активни член.
Тема на тогорочним Чарноморским самиту то преширенє Европскей униї и чарноморски реґион, а учашнїки самиту розправяли о важносци европских интеґрацийох жемох Чарноморского реґиону за политичну стабилносц и унапредзенє економиї, тарґовини, енерґетики, безпечносци, култури и образованя у тей обласци.
Предсидатель Скупштини АП Войводини Балинт Югас оценєл же преширенє Европскей униї на жеми Чарноморского реґиону хтори ище нє членїци ЕУ може мац конкретни бенефити и за держави того реґиону, алє и за саму Европу.
„Кед слово о сотруднїцтве знука Чарноморского реґиону, воно може буц ключне за унапредзенє стабилносци, розвою и просперитету у державох коло Чарного моря, алє и державох як цо наша, през хтору прецека Дунай, хтори ше улїва до Чарного моря, цо нас директно вяже за тот реґион. Тоти жеми маю богате културне, историйне и економске нашлїдство хторе може буц добра основа за успишне сотруднїцтво“, гварел предсидатель Югас.
Подпредсидатель Скупштини АП Войводини Дамир Зобеница, хтори и подпредсидатель АЕР задлужени за реґионални економски розвой, визначел же економски потенциял Чарноморского реґиону барз вельки, пре його стратеґийну локацию, природни ресурси и инфраструктурни можлївосци.
„Сотруднїцтво у обласцох як цо привреда, енерґетика, туризем и инфраструктура може буц на хасен шицким державом у тим подручу. Їх приблїжованє ґу ЕУ би отворело нови тарґовища и без огляду на шицки розлики и розиходзеня по одредзених питаньох дзепоєдних жемох, їх векша повязаносц би допринєсла нє лєм унапредзеню квалитету живота гражданох, алє и ґу общей политичней стабилносци“, гварел подпредсидатель Зобеница хтори участвовал и на прешлим Чарноморским самиту у Одеси, хтори отримани 2018. року, а хтори бул пошвецени синерґиї Чарного моря и Дунаю.
Самит отворел предсидатель АЕР Алберт Кастеланос Мадуел, а у уводней часци бешедовали и предсидатель Автономней Републики Аджариї Торнике Ризхвадже, предсидатель Скупштини АР Аджариї Давит Ґабаидже, як и представителє Министерства вонкашнїх дїлох Ґрузиї и Министерства финансийох и економиї АР Аджариї.
У предполадньових годзинох, на Ґенералней скупштини АЕР, прилапени и даскелї стратеґийни документи, медзи хторима и Стратеґия АЕР за период 2024-2031. хтора ше одноши и на закладанє тей орґанизациї за розвой демократиї и звекшанє уключеносци гражданох до процесу приношеня одлукох, унапредзенє солидарносци и справедлївосци, отримуюцого розвою и когезиї, иновацийох и реґионалного сотруднїцтва.
Скупштина европских реґийох (АЕР), чия АП Войводина членїца од 2002. року, найвекша нєзависна мрежа у ширшей Европи, хтора зазберує реґиї зоз 35 жемох, од Норвежскей по Турску и од Ґрузиї по Портуґал. АЕР присутни на европском континенту, як знука так и звонка Европскей униї, а з реґиями членїцами представя глас реґионалних власцох ище од 1985. року и ма ключну улогу у препознаваню реґийох як опредзелююцих актерох у креированю европскей политики.
Делеґация Скупштини АП Войводини пребува у ґрузийским городзе Батуми у Покраїни Аджариї, дзе участвує у роботи Ґенералней скупштини АЕР и 8. Чарноморским самиту хтори ше отримує у рамикох Ґенералней скупштини.