Батуми/Нови Сад, 13. юний – Предсидатель Скупштини АП Войводини Балинт Югас и подпредсидатель Скупштини АПВ Дамир Зобеница бешедовали нєшка у ґрузийским городзе Батуми зоз предсидательом Верховного совиту Автономней Републики Аджариї Давитом Ґабаидзеом о можлївосцох запровадзованя сотруднїцтва АП Войводини зоз тоту ґрузийску републику.
Як цо наглашене на схадзки, приятельски и партнерски одношеня Републики Сербиї и Ґрузиї винїмкове спонукнуце за розвиванє блїзших партнерских одношеньох АП Войводини и Аджариї, а потенциялу за сотруднїцтво єст у рижних обласцох, од польопривреди по науку и туризем.
Аджария єдна з найрозвитших реґийох у Ґрузиї, хтора ше пресцера коло Чарного моря, а єй главни город Батуми ключне пристанїще за тарґовину на Чарним морю и луксузна туристична дестинация. Як цо поведзене на схадзки, у прешлим року тоту туристичну перлу Ґрузиї нащивели вецей як 4 милиони людзе.
Предсидатель Югас, подпредсидатель Зобеница и ґувернер Ґабаидзе виражели задовольство пре взаємно указани намири и жаданя за повязованьом наших реґийох, до хторого би, по їх оцени, попри твореня институционалного рамику за сотруднїцтво, требало уключиц и привредни субєкти и институциї, образовно-науково центри и друге.
Югас и Зобеница поволали чолнїкох Аджариї же би нащивели АП Войводину, зоз цильом конкретизованя и пошвидшаня нєшкайших розгваркох.