Батуми/Нови Сад, 12. юний – Делеґация Скупштини АП Войводини у хторей предсидатель Балинт Югас и подпредсидателє Дамир Зобеница и Александра Малетич, участвує на Ґенералним зашеданю Скупштини европских реґийох (АЕР), хторе ше отримує у ґрузийским городзе Батуми, у покраїни Аджара.
Нєшка, предсидатель Югас и подпредсидатель Зобеница хтори и подпредсидатель АЕР задлужени за реґионални економски розвой, участвовали на схадзки Бироа АЕР, вивершним целу тей орґанизациї, на хторей ше розпатрало политични приоритети АЕР за период 2024-2031.
Предсидатель Скупштини АП Войводини Балинт Югас визначел же покраїнски парламент и у тим мандату предлужи
пошвецено и активно участвовац у шицких програмох и проєктох Скупштини европских реґийох з якима ше може допринєсц ґу предлуженю твореня позитивней слики о АП Войводини и Републики Сербиї у европских кругох, як и у тих хтори нашим гражданом принєшу конкретни бенефити.
„Як цо то бул случай и по тераз, останєме сиґурни партнер тей велькей мрежи европских реґионох. Од велькей значносци и факт же подпредсидатель Зобеница длугорочни подпредсидатель АЕР, задлужени за реґионални економски розвой, бо економски розвой вшелїяк єден з приоритетох и слупох политики нашей покраїнскей администрациї“, гварел предсидатель Югас и наглашел же АПВ предлужи пестовац и шириц мрежу сотруднїцтва и партнерства з реґионами зоз цалей Европи.
Подпредсидатель Дамир Зобеница наглашел же, без огляду на шицки спокуси з якима ше Европа тераз зочує, вони би нє требали пресудно уплївовац на медзиреґионалне и економске сотруднїцтво хторе ма за циль просперитет реґионох и унапредзенє квалитету живота гражданох.
„Потенциял за дружтвену, економску и еколоґийну трансформацию нєвичерпни, и кед го вихаснуєме, можеме отвориц нови, отримуюци роботни места, оможлївиц векшу социялну справедлївосц и збудовац просперитетнєйшу будучносц за шицки реґиони ширцом Европи“, оценєл подпредсидатель Зобеница, хтори членїци АЕР информовал о тим же у цеку пририхтованя за VII Реґионални дїловни форум, хтори ше традиционално отрима на єшень у Новим Садзе, у орґанизациї Скупштини АПВ, АЕР, Привредней комори Войводини и других.
Участвуюци на схадзки Вивершного одбору, вон здогаднул членїци АЕР на потерашнї успишни резултати тей значней дїловней подїї у Новим Садзе и поволал их же би вихасновали нагоду представиц свой инвестицийни и дїловни потенциял и свойо идеї, пренашли и черали искуства зоз компаниями и институциями на тей подїї хтора ма медзинародни характер.
„Прешвечени сом же єст вельо нєвихаснованого простору хтори би членїци АЕР требали додатно виполнїц зоз конкретнима
змистами и АП Войводина порихтана буц партнер шицким тим хтори маю подобни амбициї“, наведол Зобеница.
Наютре, делеґация Скупштини АП Войводини будзе участвовац и на 8. Чарноморским самиту на тему преширеня Европскей униї и Чарноморского реґиону, як и на Ґенералней скупштини АЕР.
АП Войводина ище од 2002. року активно участвує у роботи Скупштини европских реґийох, мрежи хтора зазберує вельке число реґийох и медзинародних орґанизацийох.
През свою роботу у рамикох АЕР, Войводина реализовала вельке число заєднїцких проєктох зоз рижних обласцох хтори допринєсли ґу политичному, економскому, образовному и културному сотруднїцтву з реґионами зоз цалей Европи.