Покраїнску скупштинску одлуку o вименкох и дополнєньох покраїнскей скупштинскей одлуки о покраїнскей управи
("Сл. новини АП Войводини", число 37/2016)
На основи члена 31. пасус 1. алинея 2. и члена 55. пасус 3. Статута Автономней Покраїни Войводини («Службини новини АПВ», число 20/14),
Скупштина Автономней Покраїни Войводини, на схадзки хтора отримана 20. юния 2016. року, принєсла
ПОКРАЇНСКУ СКУПШТИНСКУ ОДЛУКУ О
ВИМЕНКОХ И ДОПОЛНЄНЬОХ ПОКРАЇНСКЕЙ СКУПШТИНСКЕЙ ОДЛУКИ О
ПОКРАЇНСКЕЙ УПРАВИ
Член 1.
У Покраїнскей скупштинскей одлуки о покраїнскей управи («Службини новини АПВ», число 37/14 и 54/14 ‒ др. одлука; у дальшим тексту: Одлука) член 32. ше меня и вон глаши:
«Покраїнски секретарияти тоти:
1. Покраїнски секретарият за польопривреду, водопривреду и лєсарство;
2. Покраїнски секретарият за образованє, предписаня, управу и национални меншини ‒ национални заєднїци;
3. Покраїнски секретарият за културу, явне информованє и одношеня з вирскима заєднїцами;
4. Покраїнски секретарият за здравство;
5. Покраїнски секретарият за социялну политику, демоґрафию и ровноправносц полох;
6. Покраїнски секретарият за финансиї;
7. Покраїнски секретарият за реґионални розвой, медзиреґионалне сотруднїцтво и локалну самоуправу;
8. Покраїнски секретарият за урбанизем и защиту животного штредку;
9. Покраїнски секретарият за високе образованє и наукововиглєдовацку дїялносц;
10. Покраїнски секретарият за енерґетику, будовательство и транспорт;
11. Покраїнски секретарият за спорт и младеж;
12. Покраїнски секретарият за привреду и туризем.»
Член 2.
Наслов над членом 34. и член 34. ше меня и вони глаша:
«Покраїнски секретарият за културу, явне информованє и одношеня з вирскима заєднїцами
Член 34.
Покраїнски секретарият за културу, явне информованє и одношеня з вирскима заєднїцами, у складзе зоз законом и Статутом, окончує роботи покраїнскей управи у обласци култури, защити културних доброх, кинематоґрафиї, задужбинох, фондох и фондацийох, библиотецкей дїялносци, видаваня публикацийох, медзиреґионалного сотруднїцтва у обласци култури, як и защити правох интелектуалней власносци у обласци култури, хтори ше одноша на пририхтованє актох Скупштини або Покраїнскей влади з якима ше: снує установи у обласци култури, утвердзує потреби и интерес гражданох на териториї АП Войводини у обласци култури; ушорює потреби и интерес у обласци култури националних меншинох ‒ националних заєднїцох и обезпечує средства за їх витворйованє; снує архиви, музеї, библиотеки, театри, заводи и други установи у обласци култури и окончує сновательни права над нїма; предклада часц Стратеґиї културного розвою Републики Сербиї за територию АП Войводини; утвердзує програму културного розвою АП Войводини, у складзе зоз Стратеґию културного розвою Републики Сербиї; утвердзує награди и ушорює способ и поступок їх додзельованя за стимулованє културней творчосци у дзепоєдних обласцох култури, односно за окремне доприношенє у обласци културней творчосци; обезпечує средства за роботу, инвестицийне и чечуце отримованє, односно за финансованє часци програмох установох култури, чий снователь АП Войводина; утвердзує мерадла, критериюми и поступок додзельованя средствох за установи и орґанизациї чий снователь нє АП Войводина, а хтори доприноша ґу розвою култури и уметносци у АП Войводини, або обезпечую розвой култури националних меншинох ‒ националних заєднїцох и пририхтує акти з якима ше обезпечує средства за їх роботу, инвестицийне и чечуце отримованє и опреманє, односно програми; предписує дополнююци условия за роботу Архиву Войводини у Новим Садзе, Библиотеки Матици сербскей у Новим Садзе, Музею Войводини у Новим Садзе, Музею сучасней подобовей уметносци у Новим Садзе и Театралного музею Войводини; утвердзує сполньованє условийох за початок роботи и окончованє дїялносци установох защити култури на териториї АП Войводини.
Покраїнски секретарият за културу, явне информованє и одношеня з вирскима заєднїцами окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох зоз пасуса 1. того члена. У обласцох зоз свойого дїлокругу провадзи, надпатра и помага у роботи установом и явним службом чий снователь АП Войводина.
Покраїнски секретарият за културу, явне информованє и одношеня з вирскима заєднїцами, у обласци култури, витворює медзиреґионалне сотруднїцтво на проєктох од интереса за розвой култури на териториї АП Войводини.
Покраїнски секретарият за културу, явне информованє и одношеня з вирскима заєднїцами, у обласци защити културних доброх: порушує поступок за утвердзованє нєрухомих културних доброх на териториї АП Войводини; утвердзує условия за поднїманє мирох технїчней защити и других роботох на нєрухомих културних доброх, кед за територию АП Войводини проєкт и документацию за тоти роботи вирабя завод за защиту памятнїкох култури; обвисцує у законском термину Покраїнски завод за защиту памятнїкох култури у Новим Садзе о утвердзених условийох, кед тоти условия утвердзує завод зоз териториї АП Войводини; дава согласносц на проєкт и документацию за поднїманє мирох технїчней защити и других роботох на нєрухомих културних доброх, кед проєкт и документацию вирабя завод за защиту памятнїкох култури з териториї АП Войводини; дава думанє о нарисох просторних и урбанистичних планох за територию АП Войводини и обвисцує компетентни орґан кед план нє ма предписани змист.
Покраїнски секретарият за културу, явне информованє и одношеня з вирскима заєднїцами, у обласци защити културних доброх, кинематоґрафиї, задужбинох, фондох и фондацийох, библиотецкей дїялносци, видаваня публикацийох и защити правох интелектуалней власносци и авторских и зродних правох и поднїманя мирох процив пиратериї, у складзе зоз законом, окончує зверени роботи державней управи хтори зоз законом зверени орґаном АП Войводини.
Покраїнски секретарият за културу, явне информованє и одношеня з вирскима заєднїцами, у складзе зоз законом и Статутом, окончує роботи покраїнскей управи у обласци явного информованя и медийох хтори ше одноша на пририхтованє актох за Скупштину и Покраїнску владу з якима ше ушорює питаня од покраїнскей значносци; утвердзує явни интерес гражданох АП Войводини у обласци явного информованя и медийох и приноши стратеґию розвою у обласци явного информованя, на териториї АП Войводини, у складзе зоз републичну стратеґию у обласци явного информованя.
Покраїнски секретарият за културу, явне информованє и одношеня з вирскима заєднїцами провадзи и утвердзує стан у обласци явного информованя и окончує роботи хтори ше одноша на унапредзенє и стимулованє явного информованя на териториї АП Войводини; обезпечує средства и други условия за витворйованє явного интереса у обласци явного информованя, розпоредзує средства на основи запровадзених явних конкурсох и поєдинєчних даваньох, на основи принципу о додзельованю державней помоци и защити конкуренциї, без дискриминациї; обезпечує средства або други условия за роботу медийох хтори обявюю информациї на язикох меншинских националних заєднїцох, у складзе зоз законом; обезпечує часц средствох або други условия за нєзавадзане хаснованє правох особох з окремнима потребами пре нєзавадзане приманє информацийох хтори наменєни явносци; обезпечує часц средствох за финансованє дїялносци явного медийского сервису и то за проєкти хтори наменєни за розвой нових технолоґийох, диґитализацию архивох, проєкти диґитализациї технолоґийней опреми, розвой нових дистрибуцийних сервисох у складзе з можлївосцами хтори приноши диґитализация и други проєкти од окремней дружтвеней значносци у складзе зоз законом з яким ше реґулує явне информованє, и у складзе зоз законом, до Реґистру медийох доручує податки о сумох пенєжних средствох яки секретарият одобрел явним глашнїком.
Покраїнски секретарият за културу, явне информованє и одношеня з вирскима заєднїцами окончує роботи хтори ше одноша на обезпечованє явносци роботи покраїнских орґанох и орґанизацийох; провадзи медиї у писаней и електронскей форми, пририхтує и прави препатрунки їх змистох и прави анализи; видава публикациї о АП Войводини.
Покраїнски секретарият за културу, явне информованє и одношеня з вирскима заєднїцами окончує вивершни, фахово и розвойни роботи покраїнскей управи и окончує надпатрунок над запровадзованьом предписаньох о явним информованю и медийох, як зверену роботу.
Покраїнски секретарият за културу, явне информованє и одношеня з вирскима заєднїцами провадзи и спатра стан у обласци вирох, церквох и вирских заєднїцох, витворює сотруднїцтво з нїма и поднїма мири з якима ше помага їх дїялносц яку окончую у явним интересу, у складзе зоз законом и обезпечує средства за финансованє церквох и вирских заєднїцох, у складзе зоз законом.
Покраїнски секретарият за културу, явне информованє и одношеня з вирскима заєднїцами витворює сотруднїцтво з републичнима орґанами и орґанами локалней самоуправи и окончує други роботи, кед му тото зоз законом, покраїнску скупштинску одлуку або другим предписаньом зверене.»
Член 3.
Наслов над членом 35. Одлуки и член 35. ше меня и вони глаша:
«Покраїнски секретарият за здравство
Член 35.
Покраїнски секретарият за здравство, у складзе зоз законом и Статутом, окончує роботи покраїнскей управи у обласци здравства хтори ше одноша на пририхтованє актох за Скупштину або Покраїнску владу, з якима ше: ушорює питаня од покраїнскей значносци у здравстве и здравственим осиґураню и унапредзує защиту здравя, здравствену и фармацеутну службу на териториї АП Войводини; утвердзує мири за обезпеченє и запровадзованє здравственей защити од интереса за гражданох на териториї АП Войводини, як и мири за обезпеченє и запровадзованє дїялносци у обласци явного здравя од интереса за гражданох АП Войводини; приноши окремни програми здравственей защити за дзепоєдни катеґориї жительства, односно файти хоротох хтори специфични за АП Войводину, а за хтори нє принєшена окремна програма здравственей защити на републичним уровню; приноши окремну програму з обласци явного здравя за територию АП Войводини; снує здравствени установи (общи шпиталї, специялни шпиталї, клинїки, институти, Клинїчни центер, завод, односно Институт за явне здравє, Завод за трансфузию креви и Завод за антирабичну защиту) и окончує сновательни права над нїма; предклада план мрежи здравствених установох за територию АП Войводини; дава думанє о утаргованю, злучованю и подзелєню здравствених установох чий снователь АП Войводина; утвердзує тижньови розпорядок роботи, початок и законченє роботного часу у здравственей установи чий є снователь; утвердзує тижньови розпорядок роботи, початок и законченє роботного часу здравствених установох и приватней пракси на териториї АП Войводини под час тирваня епидемиї и одстраньованя пошлїдкох яки спричинєли елементарни и други векши нєпогоди и позарядово обставини на териториї АП Войводини; утвердзує минимум процесу роботи под час тирваня штрайку здравствених установох на териториї АП Войводини; снує Здравствени совит Войводини и Етични одбор Войводини; предклада директора Покраїнского заводу за здравствене осиґуранє и приноши мири за обезпеченє и запровадзованє дїялносци у обласци явного здравя од интереса за гражданох АП Войводини.
Покраїнски секретарият за здравство окончує вивершни, фахово и розвойни роботи покраїнскей управи, окончує надпатрунок и провадзи запровадзованє предписаньох зоз пасуса 1. того члена. У обласци зоз свойого дїлокругу, провадзи и помага у роботи здравственим установом чийо снователє орґани АП Войводини.
Покраїнски секретарият за здравство дава предкладанє министрови цо компетентни за роботи здравя за утвердзованє числа приправнїкох у здравствених установох зоз шедзиском на териториї АП Войводини хторих здравствени установи длужни прияц за окончованє приправнїцкого стажу на рочним уровню; дава предкладанє министрови цо компетентни за роботи здравя за План розвою кадрох у здравстве за установи хтори ше находза на териториї АП Войводини; дава предкладанє министрови цо компетентни за роботи здравя за утвердзованє референтних здравствених установох за дзепоєдни обласци здравственей дїялносци на териториї АП Войводини; дава думанє на предкладанє за доставанє назви примариюс за докторох медицини, докторох стоматолоґиї и дипломованих фармацеутох зоз териториї АП Войводини.
Покраїнски секретарият за здравство сотрудзує зоз гуманитарнима и фаховима орґанизациями, союзами и здруженями у обласци здравства, формує бази податкох з обласци здравства, провадзи роботу здравственей служби на териториї АП Войводини.
Покраїнски секретарият за здравство у обласци санитарного надпатрунку, у складзе зоз законом, окончує зверени роботи державней управи, хтори зоз законом зверени орґаном АП Войводини. Приноши ришенє о одредзованю зонох санитарней защити жридлох на териториї АП Войводини.
Покраїнски секретарият за здравство окончує и други роботи кед му таке зоз законом, покраїнску скупштинску одлуку або другим предписаньом зверене.»
Член 4.
После члена 35. Одлуки ше додава наслов и нови член 35а. хтори глаша:
«Покраїнски секретарият за социялну политику, демоґрафию и ровноправносц полох
Член 35а.
Покраїнски секретарият за социялну политику, демоґрафию и ровноправносц полох, у складзе зоз законом и Статутом, окончує роботи покраїнскей управи у обласци социялней защити, защити фамелиї и дзецох, ваготних женох, мацерох на положнїцким одсустве, самохраних родичох з дзецми, младежи, одроснутих и старих, правней защити фамелиї и старательства, пензийного осиґураня, борецкей и инвалидней защити и цивилних инвалидох войни хтори ше одноша на пририхтованє актох за Скупштину або Покраїнску владу, з якима ше: ушорює питаня од покраїнскей значносци у социялней защити фамелиї, дзецох, младежи, одроснутих и старих, у складзе зоз законом; ушорює, у складзе з материялнима можлївосцами, вигоднєйши условия за витворйованє социялней защити кед секретарият пред тим у буджету за тото обезпечел средства; утвердзує и обезпечує висши ступень защити фамелиї, правох дзецох, ваготних женох, мацерох на положнїцким одсустве и самохраних родичох з дзецми, у складзе з Програму демоґрафского розвою АП Войводини зоз мирами за єй запровадзованє; снує установи социялней защити на териториї АП Войводини у складзе зоз законом и актом Покраїнскей влади и окончує сновательни права над нїма; снує Покраїнски завод за социялну защиту; дава согласносц на пременку дїялносци и на статусни пременки установох социялней защити чий є снователь; дава согласносц на статут и акт о орґанизациї и систематизациї роботох установох социялней защити чий є снователь; приноши Програму за унапредзенє социялней защити; приноши Програму демоґрафского розвою АП Войводини зоз мирами за єй запровадзованє; дава думанє на предлог одлуки о мрежи установох социялней защити хтори даваю услуги змесценя у домох, социялно-здравствених установох и центрох за фамелийне змесценє и усвоєнє хтори снує Република Сербия, односно автономна покраїна, хтору утвердзує Влада Републики Сербиї, у часци хтора ше одноши на мрежу установох на териториї АП Войводини; дава согласносц на менованє директорох и окончовательох длужносци директорох центрох за социялни роботу на териториї АП Войводини; предклада директора Покраїнского фонду за пензийне и инвалидне осиґуранє.
Покраїнски секретарият за социялну политику, демоґрафию и ровноправносц полох окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох зоз пасуса 1. того члена. У обласцох зоз свойого дїлокругу, провадзи, надпатра и помага у роботи установом, фондом и явним службом чий снователь АП Войводина и сотрудзує з орґанизациями и здруженями гражданох.
Покраїнски секретарият за социялну политику, демоґрафию и ровноправносц полох провадзи применьованє конвенцийох хтори ше одноша на защиту дзецох, планованє фамелиї; обезпечує средства за реализацию Програми унапредзеня социялней защити у автономней покраїни, защити фамелиї, самохраних родичох з дзецми, за реализацию програмох и активносцох инвалидних и социялно-гуманитарних орґанизацийох и здруженьох гражданох, з якима ше доприноши ґу унапредзеню социялно-економского и дружтвеного положеня, регабилитациї и социялизациї инвалидох и других особох у стану социялней потреби, обезпечує средства за реализацию програмох роботи установох чий є снователь, окрем установох за змесценє у домох и обезпечує средства за реализацию иновацийних услугох и услугох социялней защити од окремней значносци за автономну покраїну.
Покраїнски секретарият за социялну политику, демоґрафию и ровноправносц полох утвердзує сполньованє условийох за початок роботи и окончованє дїялносци установох социялней защити за змесценє хасновательох.
Покраїнски секретарият за социялну политику, демоґрафию и ровноправносц полох провадзи стан и предклада мири у обласци обезпечованя социялней сиґурносци вибеженцох, вигнаних и розселєних особох; провадзи запровадзованє Програми демоґрафского розвою АП Войводини; поднїма активносци на планованю фамелиї и предклада мири за стимулованє народзеня дзецох у АП Войводини.
Покраїнски секретарият за социялну политику, демоґрафию и ровноправносц полох, у обласци социялней защити, правней защити фамелиї и старательства, дружтвеного стараня о дзецох, борецкей и инвалидней защити, защити цивилних инвалидох войни, у складзе зоз законом, окончує зверени роботи державней управи, хтори зоз законом зверени орґаном АП Войводини.
Покраїнски секретарият за социялну политику, демоґрафию и ровноправносц полох ришує по жалби процив ришеня инспектора социялней защити.
Покраїнски секретарият за социялну политику, демоґрафию и ровноправносц полох, у складзе зоз законом и Статутом, окончує роботи покраїнскей управи, хтори ше одноша на: пририхтованє аналитичних и других материялох у вязи зоз применьованьом предписаньох з обласци ровноправносци полох за Скупштину и Покраїнску владу; активносци за унапредзенє обласци ровноправносци полох у Покраїни; промоцию принципох єднаких можлївосцох за жени и хлопох; провадзенє стану и предкладанє мирох за унапредзенє положеня женох и витворйованє єднаких можлївосцох у Покраїни; провадзенє применьованя ратификованих конвенцийох и препорукох медзинародних орґанизацийох у тей обласци; витворйованє сотруднїцтва з нєвладовима орґанизациями, синдикатами и другима асоцияциями и медиями, предкладанє и запровадзованє мирох афирмативней акциї пре злєпшанє економского и дружтвеного положеня женох, окреме ранївих ґрупох женох, як и елиминацию насилства над женми и насилства у фамелиї; сотруднїцтво з републичнима и покраїнскима орґанами управи и орґанами єдинкох локалней самоуправи з обласци ровноправносци полох; активносци ґу интеґрованю принципох родней ровноправносци до шицких обласцох роботи покраїнских орґанох и даванє фаховей потримовки. Як зверену роботу, окончує ше надпатрунок над применьованьом Закона о ровноправносци полох на териториї АП Войводини.
У Покраїнском секретарияту за социялну политику, демоґрафию и ровноправносц полох, окончує ше роботи покраїнскей управи хтори ше одноша на: имплементацию и применьованє стратеґийох за интеґрацию Ромох и реализацию акцийних планох на териториї Покраїни; координацию розличних проєктох за интеґрацию Ромох на териториї Покраїни; витворйованє координациї з ромскима совитами у Покраїни и з одвитуюцима орґанизациями и орґанами на медзинародним уровню; потримованє и унапредзенє женских и людских правох Ромох и Ромкиньох на териториї Покраїни; пририхтованє аналитичней документациї за планованє и програмованє активносцох у вязи зоз интеґрацию Ромох у Покраїни; витворйованє сотруднїцтва и консултацийох з владовима и нєвладовима орґанизациями и орґанами у обласци интеґрациї Ромох и унапредзеня їх положеня; реализацию проєктох хтори засновани на цильох яки дефиновани у стратеґийох и акцийних планох, координованє применьованя и витворйованя домашнїх и медзинародних програмох за интеґрацию и унапредзенє положеня Ромох; информацийно-документацийну дїялносц и водзенє евиденцийох у поглядзе интеґрациї Ромох на териториї Покраїни; провадзенє и зберанє информацийох у вязи з мирами яки ше у Републики Сербиї и других жемох поднїма пре унапредзованє фаховей роботи у поглядзе интеґрациї Ромох, як и провадзенє оспособйованя и усовершованя фаховцох у обласци интеґрациї Ромох.
Покраїнски секретарият за социялну политику, демоґрафию и ровноправносц полох окончує и други роботи кед му таке зоз законом, покраїнску скупштинску одлуку або другим предписаньом зверене.»
Член 5.
У члену 37. пасус 5. Одлуки ше слова: «церквох и вирских заєднїцох» сцера.
Пасус 10. з истого члена ше сцера.
Член 6.
Наслов над членом 38. Одлуки и член 38. ше меня и вони глаша:
«Покраїнски секретарият за реґионални розвой, медзиреґионалне сотруднїцтво и локалну самоуправу
Член 38.
Покраїнски секретарият за реґионални розвой, медзиреґионалне сотруднїцтво и локалну самоуправу, у складзе зоз законом и Статутом, окончує роботи покраїнскей управи у обласци реґионалного розвою, а хтори ше одноша на пририхтованє актох за Скупштину и Покраїнску владу, з якима ше: ушорює и обезпечує ровномирни реґионални розвой, снує орґанизациї хтори ше занїмаю зоз запровадзованьом ровномирного реґионалного розвою и окончує сновательни права над нїма; утвердзує и приноши стратеґийни и други документи реґионалного розвою.
Покраїнски секретарият за реґионални розвой, медзиреґионалне сотруднїцтво и локалну самоуправу провадзи запровадзованє програмох, мирох и активносцох за ровномирни реґионални розвой; предклада єдного члена тендерскей и аукцийней комисиї кед субєкт приватизациї з териториї АП Войводини; участвує у пририхтованю стратеґийних документох и акцийних планох з якима ше утвердзує начала, цилї и приоритети розвою електронских комуникацийох у Републики Сербиї; участвує у приношеню Плану наменки радио-фреквенцийних обсягох и Плану розподзельованя радио-фреквенцийох; участвує у утвердзованю способу хаснованя обсягу радио-фреквенцийох цо остал, а хтори наменєни за жемову диґиталну радиодифузию, як и у даваню широкопоясових сервисох (диґитална дивиденда).
Покраїнски секретарият за реґионални розвой, медзиреґионалне сотруднїцтво и локалну самоуправу, у складзе зоз законом, Статутом и у рамикох вонкашнєй политики Републики Сербиї, окончує роботи покраїнскей управи хтори ше одноша на медзиреґионалне сотруднїцтво и отримованє одношеньох АП Войводини з одвитуюцима териториялнима заєднїцами других державох; иницированє и отримованє членства у европских и шветових здруженьох реґионох; пририхтованє, заключованє и провадзенє запровадзованя спорозуменьох з одвитуюцима териториялнима заєднїцами других державох; пририхтованє нащивох представительох териториялних заєднїцох и других формох автономиї других державох; пририхтованє участвованя представительох АП Войводини на конференцийох европских и шветових здруженьох реґионох; виробок, призберованє, чуванє и обявйованє информацийох о сотруднїцтве з одвитуюцима териториялнима заєднїцами других державох; пририхтованє звитох и информацийох и предкладанє програмох и планох розвою зоз свойого дїлокругу; координованє активносцох шицких покраїнских орґанох управи у процесу програмованя инструментох Европскей униї; творенє условийох за реализацию проєктох хтори ше финансує зоз фондох Европскей униї, донацийох и других формох розвойней помоци; участвованє у пририхтованю и запровадзованю макрореґионалних стратеґийох; участвованє у формованю окремних єдинкох у рамикох дипломатично-конзуларних представительствох Републики Сербиї, у складзе зоз законом, хтори буду представяц и унапредзовац привредни, образовни и туристични капацитети АП Войводини; провадзенє витворйованя дипломатичних и конзуларних активносцох на териториї АП Войводини; учасц у стараню о ровномирним розвою на териториї АП Войводини, у складзе зоз законом.
Покраїнски секретарият за реґионални розвой, медзиреґионалне сотруднїцтво и локалну самоуправу, у складзе зоз законом и Статутом, окончує роботи покраїнскей управи у обласци локалней самоуправи хтори ше одноша на: пририхтованє предлогох актох за Покраїнску владу з якима ше Влади Републики Сербиї предклада розпущиц скупштину єдинки локалней самоуправи на териториї АП Войводини; пририхтованє звитох и информацийох за Покраїнску владу и Скупштину и предкладанє програмох и планох розвою з дїлокругу секретарияту; даванє предходней согласносци скупштини єдинки локалней самоуправи на териториї АП Войводини, при утвердзованю шветох и одлучованю о назвох улїцох, площох, городских квартох, валалчикох и других часцох населєних местох на териториї єдинки локалней самоуправи; унапрямованє и потримовку єдинком локалней самоуправи и месней самоуправи у обезпечованю законїтосци и ефикасносци роботи; ускладзованє и стимулованє сотруднїцтва АП Войводини и єдинкох локалней самоуправи на єй териториї у обласци вибудови ефикасней и сучасней локалней самоуправи; предкладанє и потримованє мирох у обласци вибудови системи локалней самоуправи, медзиопштинского повязованя, виєдначованя капацитетох и модернизациї роботи локалней администрациї; провадзенє витворйованя месней самоуправи у єдинкох локалней самоуправи у Войводини, як и других формох нєпоштредного участвованя гражданох у приношеню одлукох на локалним уровню; даванє фахових правних и совитодавних думаньох у вязи зоз применьованьом законох и других предписаньох хтори маю нєпоштредни уплїв на розвой и витворйованє локалней самоуправи и на роботу орґанох єдинки локалней самоуправи; порушованє поступкох за оцену уставносци и законїтосци статута, або других общих актох єдинкох локалней самоуправи, кед секретарият трима же тото предписанє нє у согласносци зоз покраїнским предписаньом; контролу усоглашеносци общих актох орґанох єдинкох локалней самоуправи зоз єй статутом, поднїманє мирох и даванє фаховей помоци у єй запровадзованю; контролу усоглашеносци поєдинєчного акта процив якого нє обезпечена судска защита, зоз законом або общим актом єдинки локалней самоуправи и поднїманє одвитуюцих мирох; провадзенє применьованя предписаньох о нєпоштредним участвованю гражданох у витворйованю локалней самоуправи; провадзенє поступку и процедурох запровадзованя локалних виберанкох.
Покраїнски секретарият за реґионални розвой, медзиреґионалне сотруднїцтво и локалну самоуправу окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох у обласцох зоз свойого дїлокругу; провадзи роботу установох и явних службох чий снователь АП Войводина.
Покраїнски секретарият за реґионални розвой, медзиреґионалне сотруднїцтво и локалну самоуправу окончує и други роботи кед му таке зоз законом, покраїнску скупштинску одлуку або другим предписаньом зверене.»
Член 7.
Наслов над членом 39. Одлуки и член 39. ше меня и вони глаша:
«Покраїнски секретарият за урбанизем и защиту животного штредку
Член 39.
Покраїнски секретарият за урбанизем и защиту животного штредку, у складзе зоз законом и Статутом, окончує роботи покраїнскей управи у обласци просторного и урбанистичного планованя яки ше одноша на пририхтованє актох за Скупштину або Покраїнску владу, а з якима ше: вирабя, приноши и запровадзує документи просторного розвою АП Войводини; вирабя, приноши и запровадзує реґионални просторни плани и просторни плани окремней наменки; предклада мири и активносци програмох имплементациї просторного плана Републики Сербиї за територию АП Войводини, реґионалних просторних планох и просторних планох подручох окремней наменки и провадзи їх запровадзованє; снує явне подприємство за просторне и урбанистичне планованє и проєктованє и окончує сновательни права над нїм.
Покраїнски секретарият за урбанизем и защиту животного штредку окончує вивершни, фахово и розвойни роботи покраїнскей управи, окончує надпатрунок и провадзи запровадзованє предписаньох зоз пасуса 1. того члена. У обласцох зоз свойого дїлокругу, провадзи, надпатра и помага роботу явних подприємствох и явних службох чий снователь АП Войводина.
Покраїнски секретарият за урбанизем и защиту животного штредку дава фахову помоц и обезпечує средства за финансованє, односно софинансованє локалних самоуправох за виробок просторней и урбанистичней документациї, проєктох фаховних и нєвладових орґанизацийох з обласци просторного планованя, урбанизма, окончує фахову контролу и явни увид реґионалних просторних планох и просторних планох окремней наменки за подруча на териториї АП Войводини; дава предходну согласносц и согласносц у поступку виробку и приношеня просторних и урбанистичних планох єдинкох локалней самоуправи зоз териториї АП Войводини и предклада єдну трецину членох комисиї за фахову контролу просторних и урбанистичних планох у єдинки локалней самоуправи; участвує у роботи комисийох и роботних целох хтори формує министер цо компетентни за роботи урбанизма и дава думанє на статут и общи акти Републичней аґенциї за просторне планованє и Инженєрскей комори Сербиї.
Покраїнски секретарият за урбанизем и защиту животного штредку, у обласци просторного и урбанистичного планованя, у складзе зоз законом, окончує роботи державней управи, хтори зоз законом зверени орґаном АП Войводини.
Покраїнски секретарият за урбанизем и защиту животного штредку, у складзе зоз законом и Статутом, окончує роботи покраїнскей управи у обласци защити животного штредку хтори ше одноша на пририхтованє актох за Скупштину або Покраїнску владу, з якима ше: природне добро кладзе под защиту; приноши програму защити животного штредку за територию АП Войводини; приноши програму мониторинґу, екстерни план защити од нєщесцох и плани и програми управяня з природнима ресурсами и добрами; снує буджетни фонд; снує Покраїнски завод за защиту природи и окончує сновательни права над нїм; преглашує стан загроженосци животного штредку на териториї АП Войводини.
Покраїнски секретарият за урбанизем и защиту животного штредку окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох зоз пасуса 5. того члена. У обласцох зоз свойого дїлокругу, провадзи, надпатра и помага у роботи явним подприємством, установом и явним службом чий снователь АП Войводина.
Покраїнски секретарият за урбанизем и защиту животного штредку: контролує хаснованє и защиту природних ресурсох и доброх на териториї АП Войводини; обезпечує континуовану контролу и провадзенє стану животного штредку (мониторинґ); дава условия за обезпеченє мирох и условийох защити животного штредку, на вимаганє орґана цо компетентни за пририхтованє и приношенє просторних и урбанистичних планох, а на основи условийох и думаньох компетентних фахових орґанизацийох; участвує у поступку пририхтованя и приношеня просторних, урбанистичних и других планох (плани ушореня и основи хаснованя польопривредней жеми, лєсово, водопривредни, ловнопривредни основи и програми унапредзеня рибарства на рибарских подручох и други плани).
Покраїнски секретарият за урбанизем и защиту животного штредку у обласци унапредзеня животного штредку, рибарства и управяня з рибним фондом у риболовних водох, у складзе зоз законом, окончує зверени роботи державней управи, хтори зоз законом зверени орґаном АП Войводини. Покраїнски секретарият за урбанизем и защиту животного штредку окончує други роботи кед му таке зоз законом, покраїнску скупштинску одлуку або другим предписаньом зверене.»
Член 8.
Наслов над членом 40. Одлуки и член 40. ше меня и вони глаша:
«Покраїнски секретарият за високе образованє и наукововиглєдовацку дїялносц
Член 40.
Покраїнски секретарият за високе образованє и наукововиглєдовацку дїялносц, у складзе зоз законима з якима ше дефинує тоти обласци и у складзе зоз Статутом, окончує роботи покраїнскей управи у обласци високого образованя и студентского стандарду хтори ше одноша на пририхтованє актох за Скупштину або Покраїнску владу, а з якима ше: снує, односно соснує науково институти и виглєдовацко-розвойни центри и окончує сновательни права над нїма; ушорює питаня од покраїнскей значносци у високим образованю; предклада член Националного совиту за високе образованє; ушорює питаня од покраїнскей значносци у обласци студентского стандарду.
Покраїнски секретарият за високе образованє и наукововиглєдовацку дїялносц, у складзе зоз Програму од общого интереса за Републику Сербию, окончує роботи покраїнскей управи у вязи зоз: ришованьом квартельного питаня младих, наставних и наукових роботнїкох; стимулованьом медзинародного сотруднїцтва, технолоґийного розвою и иновацийней дїялносци; обезпечованьом финансийних средствох за софинансованє окремних програмох иновацийней дїялносци и инфраструктури на териториї АП Войводини; софинансованьом програмох Конарчка Сербскей академиї наукох и уметносцох у Новим Садзе, Матици сербскей, Матици словацкей и других установох хтори окончую наукововиглєдовацку дїялносц, а хтори значни за АП Войводину; обезпечованьом средствох за софинансованє програмох основних виглєдованьох и програмох виглєдованьох у обласци технолоґийного розвою у АП Войводини за софинансованє участвованя наукововиглєдовацких роботнїкох и студентох на наукових сходох и усовершованьох у иножемстве и за орґанизованє наукових сходох на териториї АП Войводини.
Покраїнски секретарият за високе образованє и наукововиглєдовацку дїялносц окончує вивершни, фахово и розвойни роботи покраїнскей управи у обласцох зоз свойого дїлокругу и провадзи, надпатра и помага роботу установох и явних службох чий снователь АП Войводина.
Покраїнски секретарият за високе образованє и наукововиглєдовацку дїялносц у обласци високого образованя и студентского стандарду, у складзе зоз законом, окончує роботи державней управи, хтори зоз законом зверени орґаном АП Войводини.
Покраїнски секретарият за високе образованє и наукововиглєдовацку дїялносц окончує и други роботи кед му таке зоз законом, покраїнску скупштинску одлуку або другим предписаньом зверене.»
Член 9.
Наслов над членом 41. Одлуки и член 41. ше меня и вони глаша:
«Покраїнски секретарият за енерґетику, будовательство и транспорт
Член 41.
Покраїнски секретарият за енерґетику, будовательство и транспорт, у складзе зоз законом и Статутом, окончує роботи покраїнскей управи у обласци енерґетики, рационалного хаснованя енерґиї и цивоводного транспорту ґазовитих и чечних угльоводонїкох и дистрибуцию ґазовитих угльоводонїкох, як и роботи у обласци ґеолоґиї и рударства, хтори ше одноша на вивершованє законох, як и на пририхтованє актох за Скупштину або Покраїнску владу.
Покраїнски секретарият за енерґетику, будовательство и транспорт окончує вивершни, фахово и розвойни роботи покраїнскей управи и окончує надпатрунок над запровадзованьом предписаньох зоз пасуса 1. того члена.
Покраїнски секретарият за енерґетику, будовательство и транспорт провадзи стан у секторе енерґетики и минералних сировинох: провадзи сиґурносц подмирйованя з енерґию и енерґентами; розвой и применьованє шицких формох примарней и секундарней енерґиї; инвестицийни и розвойно-виглєдовацки програми у обласци угля, нафти, дериватох нафти и биогорива, природного ґазу, цеплотней и електричней енерґиї, ґеотермалних и минералних водох и шицких формох обновююцих жридлох енерґиї; енерґетску ефикасносц и рационалне хаснованє енерґиї; чечуцу политику розвою енерґетики и минералних сировинох и функционованє енерґетскей системи, продукциї и трошеня шицких файтох енерґиї. Покраїнски секретарият за енерґетику, будовательство и транспорт софинансує проєкти у обласци енерґетики, окреме тоти хтори ше одноша на применьованє обновююцих жридлох енерґиї и енерґетскей ефикасносци, як и проєкти у обласци хаснованя минералних сировинох на подручу Покраїни; информує и едукує зоз свойого дїлокругу з орґанизованьом схадзкох, конференцийох и саямских манифестацийох; сотрудзує з потенциялнима инвеститорами и институциями зоз свойого дїлокругу.
Покраїнски секретарият за енерґетику, будовательство и транспорт, у обласци енерґетики, за територию автономней покраїни: вирабя Предлог часци Програми витворйованя Стратеґиї розвою енерґетики; вимага од енерґетских и других субєктох податки за виробок енерґетского билансу; планує потреби за енерґию у планох розвою, як и условия и способ обезпечованя нєобходних енерґетских капацитетох; запровадзує Акцийни план за енерґетску ефикасносц, у рамикох своїх компетенцийох; утвердзує окремни финансийни и други стимулациї за реализацию активносцох за ефикасне хаснованє енерґиї на своєй териториї.
Покраїнски секретарият за енерґетику, будовательство и транспорт, у обласци ґеолоґиї и рударства, за територию автономней покраїни: предклада часц Програми за витворйованє Стратеґиї управяня з минералнима ресурсами и часц Длугорочней програми розвою основних ґеолоґийних виглєдованьох; приноши и запровадзує Рочну програму основних ґеолоґийних виглєдованьох; водзи евиденцию о одобрених виглєдованьох и катастер одобрених виглєдовацких просторох; розпатра и евидентує утвердзени ресурси и резерви минералних сировинох и под’жемних водох, як и утвердзени потенцияли ґеотермалних ресурсох; з ришеньом видава потвердзенє о ресурсох и резервох минералних сировинох и под’жемних водох, односно утвердзеним потенциялу ґеотермалних ресурсох, як и одобреня за виводзенє рударских роботох и одобренє за хаснованє рударского обєкту (хасновательну дозволу); приноши ришеня: о утаргованю и о преставаню одобреня за експлоатацию резервох минералних сировинох и ґеотермалних ресурсох, як и о одобреню за пущанє обєктох до пробней роботи; вирабя биланси ресурсох и резервох минералних сировинох, под’жемних водох и ґеотермалних ресурсох; формує комисию у случаю подполного и тирвацого застановйованя експлоатациї хтора випитує причини застановйованя роботох, пошлїдки того застановйованя и предклада одредзени мири; дава согласносц на програму мирох хтору приноши компетентни орґан єдинки локалней самоуправи за хаснованє средствох од надополнєньох за хаснованє минералних сировинох и ґеотермалних ресурсох; водзи катастри виглєдовацких и експлоатацийних польох, активних и санированих рударских обєктох, лєжскох и билансох минералних сировинох и ґеотермалних ресурсох, польох рударского одпаду, як и напущених рудокопох и рударских обєктох; водзи кнїжку документох и евиденцию привредних субєктох хторим видате одобренє за виводзенє ґеолоґийних виглєдованьох и експлоатацию.
Покраїнски секретарият за енерґетику, будовательство и транспорт, за територию автономней покраїни: формує комисиї и орґанизує покладанє фахового испиту пре окончованє роботох технїчного руководзеня, рукованя и отримованя: нафтоводу и нукашнїх ґазових инсталацийох; у обєктох за транспорт и дистрибуцию природного ґазу; у обєктох за продукцию, преношенє и дистрибуцию електричней енерґиї; окончує инспекцийни надпатрунок прейґ електроенерґетских инспекторох и инспекторох опреми под прициском; окончує и финансує основни ґеолоґийни виглєдованя; формує комисию и орґанизує покладанє фахового испиту за окончованє роботох у обласци ґеолоґийних виглєдованьох и рударства; з ришеньом видава одобренє за: применєни ґеолоґийни виглєдованя; експлоатацию резервох минералних сировинох и ґеотермалних ресурсох; виводзенє рударских роботох; хаснованє рударских обєктох; окончує инспекцийни надпатрунок прейґ ґеолоґийних и рударских инспекторох.
Покраїнски секретарият за енерґетику, будовательство и транспорт, у складзе зоз законом и Статутом, окончує роботи покраїнскей управи у обласци вибудови обєктох, а хтори ше одноша на вивершованє законох, як и на пририхтованє актох за Скупштину або Покраїнску владу. Покраїнски секретарият за енерґетику, будовательство и транспорт дава фахову помоц и обезпечує средства за финансованє, односно софинансованє локалним самоуправом за виробок технїчней документациї за обєкти инфраструктури, проєкти фаховних и нєвладових орґанизацийох з обласци архитектури и будовательства; участвує у окончованю фаховей контроли технїчней документациї обєктох за яки видава дозволу за вибудов, у складзе зоз законом; провадзи розвой комуналней инфраструктури и комуналней дїялносци на териториї АП Войводини; участвує у роботи комисийох и роботних целох хтори формує министер цо компетентни за роботи будовательства.
Покраїнски секретарият за енерґетику, будовательство и транспорт, у обласци вибудови обєктох и биваня, у складзе зоз законом, окончує роботи державней управи хтори зоз законом зверени орґаном АП Войводини.
Покраїнски секретарият за енерґетику, будовательство и транспорт, у складзе зоз законом и Статутом, окончує роботи покраїнскей управи у обласци драгового, ричного и гайзибанского транспорту, розвою лоґистики и интермодалного транспорту, державних драгох II шора на териториї АП Войводини, безпечносци транспорту на драгох, а хтори ше одноша на пририхтованє актох за Скупштину або Покраїнску владу, з якима ше: ушорює питаня од покраїнскей значносци у драговим, ричним и гайзибанским транспорту, у розвою лоґистики и интермодалного транспорту, безпечносци транспорту на драгох; ушорює и обезпечує способ управяня, защити, отримованя державних драгох II шора на териториї АП Войводини у складзе зоз законом; ушорює и обезпечує нукашню плївбу на державних водних драгох на териториї АП Войводини.
Покраїнски секретарият за енерґетику, будовательство и транспорт, у обласци державних драгох, драгового, ричного и гайзибанского транспорту, у складзе зоз законом, окончує роботи державней управи хтори зоз законом зверени орґаном АП Войводини.
Покраїнски секретарият за енерґетику, будовательство и транспорт окончує и други роботи кед му таке зоз законом, покраїнску скупштинску одлуку або другим предписаньом зверене.»
Член 10.
Наслов над членом 43. Одлуки и член 43. ше меня и вони глаша:
«Покраїнски секретарият за привреду и туризем
Член 43.
Покраїнски секретарият за привреду и туризем, у складзе зоз законом и Статутом, окончує роботи покраїнскей управи у обласци привредного розвою, туризма, погосцительства, купельох и лїчилїщох, индустриї и ремеселства, електронских комуникацийох, саймох и других привредних манифестацийох, хтори ше одноша на пририхтованє актох за Скупштину або Покраїнску владу з якима ше: ушорює и обезпечує ровномирни реґионални розвой у обласци привреди; ушорює питаня од покраїнскей значносци у обласци туризма; ушорює планованє и розвой туризма; утвердзує и приноши стратеґию розвою туризма; предклада проглашенє туристичного простору на териториї АП Войводини, предклада члена Комисиї за катеґоризацию туристичних местох; предклада снованє орґанизацийох за унапредзенє и розвой туризма и окончує сновательни права над нїма; ушорює хаснованє минералних и термалних водох, балнеолоґийних и климатских ресурсох; ушорює питаня од покраїнскей значносци у обласци индустриї; утвердзує план и програму ровномирного привредного розвою; утвердзує стари ремесла хтори характеристични за подруче АП Войводини, як и мири за їх унапредзенє и розвой, ушорює питаня од покраїнскей значносци у обласци електронских комуникацийох и ушорює планованє и розвой електронских комуникацийох и информацийного дружтва на териториї АП Войводини; ушорює сайми и други привредни манифестациї од покраїнскей значносци; ушорює снованє, катеґоризацию и способ роботи саямских центрох; утвердзує мрежу саямских и других привредних манифестацийох на териториї АП Войводини.
Покраїнски секретарият за привреду и туризем, у обласци туризма, защити авторских и зродних правох у продукциї и обтоку роби и електронских комуникацийох, у складзе зоз законом, окончує роботи державней управи хтори зоз законом зверени орґаном АП Войводини.
Покраїнски секретарият за привреду и туризем окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох у обласцох зоз свойого дїлокругу; провадзи роботу установох и явних службох чий снователь АП Войводина.
Покраїнски секретарият за привреду и туризем, у складзе зоз законом и Статутом, окончує роботи покраїнскей управи у обласци роботи и обезпечованя роботи хтори ше одноша на пририхтованє актох за Скупштину, Покраїнску владу, снованє фондох и других правних особох у тих обласцох и окончованє сновательних правох над нїма; прави Предлог плану активней политики обезпечованя роботи у Покраїни; пририхтує покраїнски акцийни плани за обезпечованє роботи; запровадзує мири активней политики обезпечованя роботи у Покраїни у складзе зоз законом, акцийним планом и стратеґию обезпечованя роботи у АП Войводини; Покраїнски секретарият за привреду и туризем провадзи применьованє предписаньох и стратеґийних документох з обласци обезпечованя роботи, роботи, безпечносци и здравя на роботи; пририхтує акти о снованю орґанизацийох од интереса за АП Войводину у наведзених обласцох; дава правни думаня и упутства за применьованє законских предписаньох и других актох орґанизацийом, установом, институцийом и гражданом; провадзи стан и применьованє предписаньох у обласци безпечносци и здравя на роботи у покраїнских орґанох управи; предклада активносци и мири за ришованє проблемох у обласци безпечносци и здравя на роботи; провадзи стан и применьованє предписаньох у вязи з роботно-правним статусом особох з инвалидитетом; предклада активносци и мири за унапредзенє роботно-правного статуса особох з инвалидитетом; стимулує обезпечованє роботи особом з инвалидитетом и других катеґорийох гражданох хтори чежше доставаю роботу; провадзи реализацию антидискриминацийней политики у обласци роботи и обезпечованя роботи; провадзи субвенционованє привредних субєктох у Покраїни и трансферу нїзшим орґаном власци у обласци обезпечованя роботи; пририхтує презентациї у жеми и иножемстве за представянє потенциялох Покраїни у обласци роботи и обезпечованя роботи; провадзи стан и рушаня на тарґовищу роботи у АП Войводини; провадзи применьованє ратификованих конвенцийох и препорукох Медзинародней орґанизациї роботи и прави звити о їх применьованю; сотрудзує з медзинароднима, реґионалнима и домашнїма орґанами, орґанизациями и здруженями у обласци обезпечованя роботи, роботи, безпечносци и здравя на роботи; координує роботу и дава потримовку у роботи Покраїнскому социялно-економскому совиту, Покраїнскому совиту за обезпечованє роботи, Покраїнскому совиту за безпечносц и защиту на роботи и другим роботним целом з обласци роботи и обезпечованя роботи; предклада директора Покраїнскей служби за обезпечованє роботи; стимулує розвой трипартитного социялного диялоґу у Покраїни, провадзи институционални социялни диялоґ и важаци законски рамики; провадзи дїйствованє социялного партнерства у условийох кризи (нєудатни приватизациї, штрайки, найзагроженши привредни конари); з покраїнским социялно-економским совитом и другима заинтересованима субєктами, порушує инициятиви за вименки роботного законодавства и социялней политики; иницирує активносци за гармонизацию роботного и социялного законодавства з нормативно-институционалнима рамиками и праксу социялного диялоґу; поднїма активносци на дзвиганю капацитетох социялних партнерох (синдикатох и роботодавательох) за ровноправну учасц у социялним диялоґу; провадзи уплїв макроекономских елементох (привредни рушаня, тарґовище роботи, политику обезпечованя роботи) на функционованє социялного диялоґу у Покраїни; афирмує предносци розвитого социялного диялоґу прейґ нєпреривного информованя явносци о актерох, змистох и инструментох социялного диялоґу; сотрудзує зоз синдикалнима орґанизациями, орґанизациями роботодавательох и здруженями; участвує у ришованю питаньох од значносци за витворенє економских шлєбодох и правох занятих, материялного и социялного положеня роботодавательох и занятих; афирмує розвой култури прегваркох и стимулує мирне ришованє колективних роботних спорох; провадзи социялни диялоґ на локалним уровню и роботу мрежи совитох за обезпечованє роботи у Покраїни; провадзи умрежованя учашнїкох социялного диялоґу у Покраїни; провадзи заключованя колективних контрактох у Покраїни; провадзи одношенє явносци и медийох ґу социялному диялоґу.
Покраїнски секретарият за привреду и туризем окончує и други роботи кед му таке зоз законом, покраїнску скупштинску одлуку або другим предписаньом зверене.»
ПРЕХОДНИ И ЗАКОНЧУЮЦИ ОДРЕДБИ
Член 11.
З дньом ступаня на моц тей одлуки, у складзе з дїлокругом яки утвердзени з Одлуку, з роботу предлужую:
1. Покраїнски секретарият за польопривреду, водопривреду и лєсарство;
2. Покраїнски секретарият за финансиї;
3. Покраїнски секретарият за спорт и младеж.
Член 12.
Зоз ступаньом на моц тей одлуки, у складзе з дїлокругом яки утвердзени з тоту одлуку, почина з роботу Покраїнски секретарият за социялну политику, демоґрафию и ровноправносц полох.
Член 13.
Покраїнски секретарият за културу и явне информованє, з дньом ступаня на моц тей одлуки, у складзе з дїлокругом яки утвердзени з тоту одлуку, предлужує з роботу як Покраїнски секретарият за културу, явне информованє и одношеня з вирскима заєднїцами.
Член 14.
Покраїнски секретарият за здравство, социялну политику и демоґрафию, з дньом ступаня на моц тей одлуки, у складзе з дїлокругом яки утвердзени з тоту одлуку, предлужує з роботу як Покраїнски секретарият за здравство.
Член 15.
Покраїнски секретарият за медзиреґионалне сотруднїцтво и локалну самоуправу, з дньом ступаня на моц тей одлуки, у складзе з дїлокругом яки утвердзени з тоту одлуку, предлужує з роботу як Покраїнски секретарият за реґионални розвой, медзиреґионалне сотруднїцтво и локалну самоуправу.
Член 16.
Покраїнски секретарият за урбанизем, будовательство и защиту животного штредку, з дньом ступаня на моц тей одлуки, у складзе з дїлокругом яки утвердзени з тоту одлуку, предлужує з роботу як Покраїнски секретарият за урбанизем и защиту животного штредку.
Член 17.
Покраїнски секретарият за науку и технолоґийни розвой, з дньом ступаня на моц тей одлуки, у складзе з дїлокругом яки утвердзени з тоту одлуку, предлужує з роботу як Покраїнски секретарият за високе образованє и наукововиглєдовацку дїялносц.
Член 18.
Покраїнски секретарият за енерґетику и минерални сировини, з дньом ступаня на моц тей одлуки, у складзе з дїлокругом яки утвердзени з тоту одлуку, предлужує з роботу як Покраїнски секретарият за енерґетику, будовательство и транспорт.
Член 19.
Покраїнски секретарият за привреду, обезпечованє роботи и ровноправносц полох, з дньом ступаня на моц тей одлуки, у складзе з дїлокругом яки утвердзени з тоту одлуку, предлужує з роботу як Покраїнски секретарият за привреду и туризем.
Член 20.
Покраїнски секретарият за културу, явне информованє и одношеня з вирскима заєднїцами од Покраїнского секретарияту за образованє, предписаня, управу и национални меншини ‒ национални заєднїци пребера занятих, як и права, обовязки, предмети, опрему, средства за роботу и архиву яки потребни за окончованє роботох зоз превжатей часци дїлокругу покраїнского секретарияту.
Член 21.
Покраїнски секретарият за социялну политику, демоґрафию и ровноправносц полох од Покраїнского секретарияту за здравство, социялну политику и демоґрафию, односно Покраїнского секретарияту за привреду, обезпечованє роботи и ровноправносц полох пребера занятих, як и права, обовязки, предмети, опрему, средства за роботу и архиву яки потребни за окончованє роботох зоз превжатей часци дїлокругу покраїнских секретариятох.
Член 22.
Покраїнски секретарият за реґионални розвой, медзиреґионалне сотруднїцтво и локалну самоуправу од Покраїнского секретарияту за привреду, обезпечованє роботи и ровноправносц полох пребера занятих, як и права, обовязки, предмети, опрему, средства за роботу и архиву яки потребни за окончованє роботох зоз превжатей часци дїлокругу покраїнского секретарияту.
Член 23.
Покраїнски секретарият за енерґетику, будовательство и транспорт од Покраїнского секретарияту за урбанизем, будовательство и защиту животного штредку, односно Покраїнского секретарияту за привреду, обезпечованє роботи и ровноправносц полох пребера занятих, як и права, обовязки, предмети, опрему, средства за роботу и архиву яки потребни за окончованє роботох зоз превжатей часци дїлокругу покраїнского секретарияту.
Член 24.
Покраїнска влада акти за запровадзованє тей одлуки принєше у чаше 60 дньох по ступаню на моц тей одлуки.
Покраїнски секретарияти зоз члена 1. тей одлуки принєшу правилнїки о нукашнєй орґанизациї и систематизациї роботних местох, у складзе з одредбами тей одлуки у чаше 90 дньох по ступаню на моц тей одлуки.
Член 25.
Тота одлука ступа на моц по обявйованю у «Службених новинох Автономней Покраїни Войводини».
СКУПШТИНА АВТОНОМНЕЙ ПОКРАЇНИ ВОЙВОДИНИ
Нови Сад, 20. юния 2016. року
ПРЕДСИДАТЕЛЬ
СКУПШТИНИ АП ВОЙВОДИНИ
Иштван Пастор, с.р.
(Pásztor István, s.k.)