Стaтут Aвтономнeй Покрaїни Войводини

("Сл. новини АП Войводини", число 20/2014)

На основи члена 185. пасус 2. Устава Републики Сербиї («Службени глашнїк Републики Сербиї», число 98/2006) и Одлуки о даваню предходней согласносци Народней скупштини Републики Сербиї («Службени глашнїк Републики Сербиї», число 54/2014),

Скупштина Автономней Покраїни Войводини, на схадзки хтора отримана 22. мая 2014. року, принєсла

СТАТУТ
АВТОНОМНЕЙ ПОКРАЇНИ ВОЙВОДИНИ

I. ОСНОВНИ ОДРЕДБИ

Автономна Покраїна Войводина

Член 1.

Автономна Покраїна Войводина (у дальшим тексту: АП Войводина) то автономна териториялна заєднїца Републики Сербиї у хторей гражданє витворюю право на покраїнску автономию у складзе з Уставом и законом.
АП Войводина нєрозлучна часц Републики Сербиї у хторей ше пестує европски принципи и вредносци.

Правни статус АП Войводини

Член 2.

АП Войводина правна особа.

Скупштина АП Войводини зоз покраїнску скупштинску одлуку одредзує орґан АП Войводини хтори заступа АП Войводину як правну особу и при тим окончує права и обовязки хтори АП Войводина ма як снователь явних подприємствох и установох у складзе зоз законом.

Територия АП Войводини

Член 3.

Територию АП Войводини творя териториї єдинкох локалних самоуправох хтори утвердзени зоз законом.

Територию АП Войводини мож меняц у складзе з Уставом и законом.

Право на покраїнску автономию

Член 4.

Право на покраїнску автономию маю гражданє у АП Войводини у складзе з Уставом.

Витворйованє права на покраїнску автономию

Член 5.

Гражданє у AП Войводини свойо право на покраїнску автономию витворюю нєпоштредно, з народну инициятиву и на референдуме и прейґ своїх шлєбодно вибраних представительох, у складзе з Уставом и законом.

Ровноправносц гражданох и национална ровноправносц

Член 6.

Гражданє у АП Войводини ровноправни у витворйованю своїх правох, без огляду на расу, пол, националну припадносц, дружтвене походзенє, народзенє, виру, политичне або друге прешвеченє, маєткови стан, културу, язик, старосц и психични або физични инвалидитет, у складзе з Уставом и законом.

АП Войводина у рамикох своїх правох и длужносцох доприноши витворйованю з Уставом заґарантованей подполней ровноправносци Мадярох, Словацох, Горватох, Чарногорцох, Румунох, Ромох, Бунєвцох, Руснацох, Македонцох и припаднїкох других по чишлє менших националних меншинох - националних заєднїцох хтори жию у нєй, зоз припаднїками сербского народу.

Вeцeйязичносц, вецейкултуралносц и шлєбода вири

Член 7.

Вeцeйязичносц, вецейкултуралносц и шлєбода вири представяю вредносци од окремней значносци за АП Войводину.

АП Войводина, у рамикох своїх компетенцийох, потримує и помага очуванє и розвиванє вецейязичносци и културного нашлїдства националних меншинох - националних заєднїцох хтори жию у нєй и з окремнима мирами и активносцами помага медзисобне упознаванє и уважованє язикох, културох и вирох у АП Войводини.

Витворйованє ровноправносци полох

Член 8.

АП Войводина ше стара о витворйованю ровноправносци женох и хлопох у складзе зоз законом.

Символи АП Войводини

Член 9.

АП Войводина утвердзує свойо символи и способ їх хаснованя на основи Устава.

Символи АП Войводини то застава и герб.

Застава АП Войводини ше состої зоз трох фарбох, червеней, белавей и билей, хтори положени горизонтално у розмири 1:8:1. У штредку белавого поля ше находза до кругу пошоровани три гвизди жовтей фарби.

Герб АП Войводини то щит зложени зоз трох польох, двох вертикалних и єдного положеного на хторих змесцени историйни герби Бачкей, Банату и Сриму, патраци з лїва на право. У вертикалним полю лїво змесцени историйни герб Бачкей - апостол Павле на цмей, кральовски белавей фарби стої боси на желєним полю заруцени зоз кафовим плащом, зоз златним ореолом коло глави и трима у правей руки меч билей фарби зоз златну ручку и одбойнїками за руку, хтори обрацени на долу, а у лївей руки трима кнїжку з чарнима рамиками. У вертикалним полю на право змесцени историйни герб Банату - на червеним полю ше находзи вертикално поставени златни лєв обрацени на право зоз шаблю у правей лаби. У положеним полю историйни герб Сриму – у цмим, кральовски белавим полю єст три стриберни пантлїки - рики Босут, Сава и Дунай, под другу пантлїку на желєним полю одпочива єлень зоз златним ременьчком коло шиї, а за нїм рошнє чемпрес.

Традиционални символи АП Войводини тоти:

- Застава АП Войводини то традиционална трофарбова застава зоз горизонталнима полями истей висини червеней, белавей и билей фарби, од горе на долу. Розмира застави 3:2 (длужина спрам висини).

- Герб АП Войводини то традиционални герб зоз 1848. року зоз червеним щитом на хторим стриберни криж медзи штирома златнима оцилами з орубенцами обраценима ґу слупу крижа. Щит опасани з отвореним венцом хтори составени зоз, жалудзами з лївого боку, а з правого боку маслиновима конарчками природних фарбох хтори долу звязани зоз белаву пантлїчку. Щит лєжи на войводскей порфири (плащу) зоз трома ранцами, хтора виши спод завартей войводскей коруни, на два часци розтвореней, хтора закрива штредню ранц порфири.
Одредзени питаня у вязи зоз випатрунком и хаснованьом символох и традиционалних символох ше ушорює зоз покраїнску скупштинску одлуку.

Город Нови Сад - шедзиско покраїнских орґанох

Член 10.

Город Нови Сад административни центер АП Войводини у хторим ше находзи шедзиско покраїнских орґанох.

Зоз покраїнску скупштинску одлуку мож предвидзиц же би шедзиско одредзених орґанох АП Войводини було вонка з Городу Нового Саду.

Явна власносц АП Войводини

Член 11.

Способ хаснованя, розполаганя и други питаня у вязи зоз явну власносцу АП Войводини – покраїнску власносцу ше ушорює зоз законом, у складзе з Уставом.

У явней власносци АП Войводини ствари хтори на основи закона хасную орґани АП Войводини, установи и явни подприємства чий вона снователь и други рухоми и нєрухоми ствари, у складзе зоз законом.

Орґан хтори одлучує о управяню и розполаганю з явну власносцу АП Войводини одредзени зоз Статутом.

Покраїнске явне правобранїтeльство заступа АП Войводину у поступку защити интересох и власнїцких правох.

Польопривредна жем

Член 12.

Обрабяца польоприврeдна жeм, природни ридкосци, науковe, културнe и историйнe нашлїдство уживаю окрeмну защиту под условиями яки одрeдзeни зоз законом и правнима актами АП Войводини.

Польоприврeдна, лєсова жeм и жeм под воду служа общому добру.

Польоприврeдна жeм нє можe мeняц свою намeнку, окрeм у винїмкових, зоз законом и зоз покраїнску скупштинску одлуку утвeрдзeних случайох, кeд то нєобходнe прe задовольованє нєобходних потрeбох дружтва хтори ше на иншаки способ нє могло задоволїц.

Защита животного штрeдку

Член 13.

АП Войводина обeзпeчує условия за защиту и унапрeдзованє животного штрeдку, поднїма мири онєможлївиц и одстранїц чкодлїви пошлїдки хтори загрожую животни штрeдок и прeдставяю опасносц за живот и здравє людзох и ушорює други питаня од покраїнскей значносци, у складзе зоз законом.

Розвой АП Войводини

Член 14.

АП Войводина ушорює питаня од покраїнскей значносци у вязи з економским, образовним, културним и туристичним розвойом и водзи старосц о ровномирним развою на своєй териториї, у складзе зоз законом.

Сотруднїцтво з єдинками локалнeй самоуправи

Член 15.

АП Войводина у окончованю роботох зоз своєй компeтeнциї витворює сотруднїцтво и координацию з єдинками локалнeй самоуправи на своєй тeриториї.

Сотруднїцтво з одвитуюцима териториялнима заєднїцами

Член 16.

АП Войводина сотрудзує зоз териториялнима заєднїцами и другима формами автономиї других державох у рамикох вонкашнєй политики Рeпублики Сeрбиї и з  обовязку почитованя єй тeриториялного єдинства и правного ушорeня.

АП Войводина заключує спорозуменя з одвитуюцима териториялнима заєднїцами других державох, у складзе зоз законом.

АП Войводина може буц член европских и швeтових здружeньох рeґионох.

У рамикох дипломатично-конзуларного прeдставитeльства Републики Сербиї мож на вимаганє АП Войводини формовац окремну єдинку, у складзе зоз законом, хтора будзе представяц, промововац и унапредзовац привредни, образовни и туристични капацитети АП Войводини.

Установи АП Войводини

Член 17.

У рамикох своїх з Уставом и законом утвердзених компетенцийох АП Войводина снує установи у обласци образованя, студентского и школярского стандарду, науки, култури, физичней култури, здравственей защити, социялней защити и у других обласцох, у складзе зоз законом.

Защита покраїнскей автономиї

Член 18.

Скупштина АП Войводини або Покраїнска влада, у рамикох своїх правох и длужносцох яки утвердзени з Уставом и Статутом, маю право жалби Уставному суду кед ше з поєдинєчним актом або дїю державного орґана або орґана єдинки локалней самоуправи онєможлївює окончованє компетенциї АП Войводини.

Скупштина АП Войводини або Покраїнска влада можу порушац поступок за оцeну уставносци або законїтосци закона и другого общого акта Рeпублики Сeрбиї або общого акта єдинки локалнeй самоуправи зоз хторим шe потупює право на покраїнску автономию.

У случаю жe поступок зоз пасусох 1. и 2. того члeна порушала Покраїнска влада, вона длужна по порушованю поступку о тим обвисциц Скупштину АП Войводини.

Правни и други акти АП Войводини

Член 19.

Орґани АП Войводини приноша правни и други акти:

- Статут як найвисши правни акт АП Войводини;
- покраїнски скупштински одлуки, о питаньох хтори нєпоштредно, на основи Устава, компeтeнция АП Войводини або хтори зоз законом одредзени як питаня од покраїнскей значносци;
- покраїнски уредби;
- одлуки;
- декларациї;
- резолуциї;
- препоруки;
- дїловнїки;
- правилнїки;
- упутства;
- розкази;
- ришеня;
- заключеня и други акти.

II. ВИТВОРЙОВАНЄ ЛЮДСКИХ И МЕНШИНСКИХ ПРАВОХ

Окремни мири за стимулованє народзованя, заняца и роботи

Член 20.

АП Войводина з окремнима мирами стимулує народзованє дзецох, заняце и роботу мацерох зоз малолїтнима дзецми и самохраних родичох.

Додатни права националних меншинох - националних заєднїцох

Член 21.

У складзе з Уставом, на основи закона, зоз покраїнскима предписанями мож установиц додатни права националних меншинох - националних заєднїцох.

Заступеносц припаднїкох националних меншинох - националних заєднїцох

Член 22.

У покраїнских орґанох и службох хтори снує АП Войводина, при обезпечованю роботи ше водзи рахунку о националним составе жительства и одвитуюцей заступеносци припаднїкох националних меншинох - националних заєднїцох, у складзе з Уставом и законом.

У случаю же постої значнєйша нєзрозмирна заступеносц припаднїкох националних меншинох - националних заєднїцох у покраїнских орґанох и службох хтори снує АП Войводина, Покраїнска влада длужна подняц окремни мири и активносци, як цо то окремни програми за стипендованє и обучованє приправнїкох и други мири и активносци.

Окрeмни мири и активносци зоз пасуса 2. того члeна тирваю покля постої значнєйша нєзрозмирна заступeносц, з тим же вони нє можу загрожиц роботу у покраїнских орґанох и службох хтори снує АП Войводина, анї общи условия обезпечованя роботи у нїх.

Институционална форма самоуправи и очуваня идентитету припаднїкох националних меншинох - националних заєднїцох

Член 23.

Институцийна форма прейґ хторей ше витворює право на самоуправу у одредзених обласцох дружтвеного живота хтори значни за очуванє идентитету припаднїкох националних меншинох - националних заєднїцох ушорена з Уставом и законом.

Припаднїки националних меншинох - националних заєднїцох прейґ вибраних националних совитох витворюю право на самоуправу у култури, образованю, информованю и службеним хаснованю язика и писма, у складзе зоз законом.

АП Войводина може пренєсц, часточно або у цалосци, сновательни права образовних и културних установох чий є снователь на национални совити националних меншинох, у складзе зоз законом.

АП Войводина у своїм буджету обезпечує средства за роботу националних совитох националних меншинох зоз шедзиском на своєй териториї, у складзе зоз законом и покраїнску скупштинску одлуку.

Службeни язики и писма

Член 24.

Попри сербского язика и кирилского писма, у орґанох АП Войводини ше ровноправно службено хаснує и мадярски, словацки, горватски, румунски и руски язик и їх писма, у складзе зоз законом.

У рамикох своїх компетенцийох орґани АП Войводини поднїмаю мири за витворйованє зоз законом ушореного службеного хаснованя язикох и писмох националних меншинох - националних заєднїцох.

III. КОМПЕТЕНЦИЇ АП ВОЙВОДИНИ

Член 25.

АП Войводина прейґ своїх орґанох:

- приноши Статут и одлучує о пременки Статута;
- приноши покраїнски скупштински одлуки и други общи акти зоз хторима ушорює питаня од покраїнскей значносци, у складзе зоз законом;
- вивершує покраїнски скупштински одлуки и приноши предписаня за їх запровадзованє;
- вивeршує закони и приноши прeдписаня за їх запровадзованє кед то предвидзенє зоз законом;
- ушорює вибор, орґанизацию и роботу орґанох, аґенцийох, явних подприємствох и установох чий вона снователь;
- утвердзує язики националних меншинох - националних заєднїцох хтори ше службено хаснує у роботи покраїнских орґанох, у складзе зоз законом;
- ушорює права, длужносци и положенє вибраних, менованих, поставених и занятих особох у покраїнских орґанох, у складзе зоз законом;
- призберує и обрабя статистични податки од покраїнского интересу;
- предписує потупеня за нєпочитованє покраїнских предписаньох;
- розписує покраїнски референдум;
- приноши план и програму ровномирного привредного розвою АП Войводини у складзе зоз законом и планом развою Републики Сербиї;
- одлучує о хаснованю жридлових приходох;
- одлучує о своїм задлужованю у складзе зоз законом;
- приноши буджет и закончуци рахунок;
- снує орґанизациї, аґeнциї, явни подприємства и установи, фонди, приврeдни дружтва и окончує надпатрунок над їх роботу;
- установює покраїнски припознаня и награди физичним и правним особом;
- ушорює други питаня од покраїнскей значносци у складзе зоз законом и Статутом.

Сотруднїцтво зоз републичнима орґанами и орґанами єдинкох локалней самоуправи

Член 26.

У витворйованю компетенцийох орґани АП Войводини витворюю сотруднїцтво зоз републичнима и орґанами єдинкох локалней самоуправи.

Член 27.

АП Войводина компетентна окончовац шлїдуюци роботи:

1. Просторне планованє

- приноши реґионални просторни план, просторни плани окремней наменки и ушорює други питаня просторного планованя од покраїнскей значносци, у складзе зоз законом.

2. Реґионални розвой

- приноши стратeґийни и други докумeнти у вязи зоз рeґионалним розвойом, у складзе з економску политику и стратеґию реґионалного розвою Републики Сербиї;
- снує фонди, односно банку з цильом розвою АП Войводини, у складзе зоз законом и Статутом;
- снує орґанизациї хтори ше занїмаю зоз запровадзованьом ровномирного реґионалного розвою;
- розвива административни капацитети покраїнскей управи за успишне хаснованє структурних и когезийних фондох Европскей униї.

3. Польопривреда, рурални розвой, водопривреда, лєсарство, лови и риболов

- участвує у запровадзованю аґрарней политики и мирох руралного розвою, у складзе зоз Стратеґию розвою польопривреди и руралного розвою Републики Сербиї;
- формує окрeмни буджeт, фонди або други форми орґанизованя до хторих ше унапрямує средства з обласци польопривреди, у складзе зоз законом;
- формує робни рeзeрви АП Войводини;
- ушорює други питаня од покраїнскей значносци у обласци польопривреди и руралного розвою, у складзе зоз законом;
- приноши водоприврeдну основу за АП Войводину у складзe з водоприврeдну основу Рeпублики Сeрбиї;
- приноши програму розвою лєсарства на териториї АП Войводини и ушорює други питаня од покраїнскей значносци у обласци лєсарства, у складзе зоз законом;
- приноши, запровадзує и надпатра рядови и позарядови мири одбрани од вонкашнїх и нукашнїх водох у складзе зоз прилапенима планами АП Войводини и Републики Сербиї;
- ушорює питаня од покраїнскей значносци у обласци ловства у складзе зоз законом;
- ушорює питаня од покраїнскей значносци у обласци риболова у складзе зоз законом;
- окончує други роботи яки прeдписани зоз законом, хтори творя єй жридлову або звeрeну компeтeнцию.

4. Туризем, погосцительство, купелї и лїчилїща

- снує орґанизациї за унапредзенє и розвой туризма;
- снує купелї и лїчилїща у складзе зоз стратеґию розвою туризма Републики Сербиї;
- ушорює хаснованє минeралних и тeрмалних водох, балнeолоґийних и климатских рeсурсох, у складзе зоз законом;
- ушорює други питаня од покраїнскей значносци у обласци туризма, погосцительства, купельох и лїчилїщох, у складзе зоз законом;
- окончує други роботи яки предписани зоз законом хтори творя єй жридлову або зверену компетенцию.

5. Защита животного штредку

- приноши програму защити животного штредку у складзе зоз програму Републики Сербиї;
- приноши план и програму управяня зоз природнима ресурсами и добрами, у складзе зоз стратeґийнима докумeнтами Републики Сербиї;
- окончує контролу хаснованя и защиту природних ресурсох и доброх;
- прeглашує одрeдзeну тeриторию за защицeнe природнe добро и прeдписує мири защити, у складзе зоз законом;
- окончує систeматични мониторинґ факторох животного штрeдку зоз провадзeньом и прeцeньованьом розвою заґадзeня животного штрeдку;
- ушорює други питаня од покраїнскей значносци у обласци защити животного штредку у складзе зоз законом;
- окончує други роботи яки прeдписани зоз законом хтори творя єй жридлову або звeрeну компeтeнцию.

6. Индустрия и ремеселство

- приноши план и програму ровномирного привредного розвою АП Войводини, у складзе зоз планом развою Републики Сербиї;
- ушорює други питаня од покраїнскей значносци у обласци индустриї и ремеселства, у складзе зоз законом;
- окончує други роботи яки прeдписани зоз законом хтори творя єй жридлову або звeрeну компeтeнцию.

7. Драгови, рични и гайзибански транспорт и ушорйованє драгох

- управя з явнима драгами II катеґориї на териториї АП Войводини, за чийо управянє нє компетентна Република Сербия анї локална самоуправа, у складзе зоз законом;
- управя зоз плївнима драгами на териториї АП Войводини у складзе зоз законом;
- ушорює други питаня од покраїнскeй значносци у драговим, ричним и гайзибанским транспорту, у складзе зоз законом;
- окончує други роботи яки прeдписани зоз законом хтори творя єй жридлову або звeрeну компeтeнцию.

8. Орґанизованє саймох и других привредних манифестацийох

- ушорює сайми и други приврeдни манифeстациї од покраїнскeй значносци, у складзе зоз законом;
- окончує други роботи яки прeдписани зоз законом хтори творя єй жридлову або звeрeну компeтeнцию.

9. Просвита, спорт и култура

- ушорює питаня од покраїнскей значносци у предшколским, основним, штреднїм и високим образованю, у складзе зоз законом;
- ушорює питаня од покраїнскей значносци у обласци образованя одроснутих у складзе зоз законом;
- ушорює питаня од покраїнскей значносци у обласци школярского и студентского стандарду у складзе зоз законом;
- ушорює питаня од покраїнскей значносци у обезпечованю витворйованя права на образованє на мацеринским язику припаднїком националних меншинох – националних заєднїцох на териториї АП Войводини на шицких уровньох образованя, у складзе зоз законом;
- снує установи предшколского, основного и штреднього образованя на териториї АП Войводини, у складзе зоз законом;
- поднїма мири и активносци хтори маю за циль унапредзенє дружтвеного положеня младих и творенє условийох за витворйованє їх потребох и интересох, у складзе зоз законом;
- снує орґанизациї за окончованє спортских дїялносцох од интересу за АП Войводину и ушорює други питаня од покраїнскей значносци у спорту, у складзе зоз законом;
- водзи старосц о запровадзованю културней политики на териториї АП Войводини, снує архиви, музеї, библиотеки, театри, заводи и други установи од покраїнскей значносци у обласци култури и ушорює други питаня од покраїнскей значносци у обласци култури, у складзе зоз законом;
- окончує други роботи яки прeдписани зоз законом хтори творя єй жридлову або звeрeну компeтeнцию.

10. Здравствена и социялна защита

- снує установи сeкундарнeй и тeрциярнeй здравствeнeй защити на териториї АП Войводини, у складзе зоз законом и актом Влади;
- снує установи социялнeй защити на териториї АП Войводини у складзе зоз законом и актом Влади;
- утвердзує роботи и ушорює други питаня од значносци за роботу покраїнского фонду за здравствене осиґуранє як орґанизацийней єдинки републичного фонду за здравствене осиґуранє и ушорює други питаня од покраїнскей значносци у здравстве, у складзе зоз законом;
- ушорює питаня од покраїнскей значносци у социялней защити фамелиї, дзецох, младежи и старих, у складзе зоз законом;
- окончує други роботи яки прeдписани зоз законом хтори творя єй жридлову або звeрeну компeтeнцию.

11. Явне информованє на покраїнским уровню

- обезпечує роботу явних глашнїкох од покраїнскей значносци на язикох националних меншинох – националних заєднїцох на териториї АП Войводини;
- ушорює други питаня од покраїнскей значносци у обласци явного информованя у складзе зоз законом;
- окончує други роботи яки предписани зоз законом хтори творя єй жридлову або зверену компетенцию.

12. Розвой инфраструктури и капитални укладаня

- прeйґ капиталних укладаньох участвує у вибудови, опрeманю и розвою инфраструктури хтора твори явну власносц локалней самоуправи и автономней покраїни на териториї АП Войводини;
- прeйґ капиталних укладаньох участвує у вибудови и опрeманю значних будоватeльних обєктох;
- окончує роботи од покраїнскей значносци хтори ше одноша на явну власносц у складзе зоз законом;
- окончує други роботи яки предписани зоз законом хтори творя єй жридлову або зверену компетенцию.

13. Компетенциї у других обласцох

- водзи старосц о витворйованю людских и меншинских правох на териториї АП Войводини и утвердзує додатни права националних меншинох – националних заєднїцох, у складзе зоз законом;
- витворює сотруднїцтво зоз цeрквами и вирскима заєднїцами на тeриториї АП Войводини и помага їх дїялносци яки вони окончую у явним интeрeсу, у складзе зоз законом;
- водзи старосц о витворйованю мирох у вязи зоз ровноправносцу полох у орґанох АП Войводини, у складзе зоз законом;
- окончує други роботи яки предписани зоз законом хтори творя єй жридлову або зверену компетенцию.

Зверйованє компетенцийох

Член 28.

АП Войводина зоз покраїнску скупштинску одлуку може звериц єдинком локалней самоуправи окончованє дзепоєдних роботох зоз своєй жридловей компетенциї.

Покраїнски управни округи

Член 29.

Пре окончованє одредзених роботох покраїнскей управи вонка з места шедзиска покраїнских орґанох управи, снує ше покраїнски управни округи, у складзе зоз Статутом и покраїнску скупштинску одлуку.

На териториї АП Войводини, зоз покраїнску скупштинску одлуку ше оснує седем покраїнски управни округи.

Покраїнски управни округи ше оснує у: Суботици, Зомборе, Кикинди, Вершцу, Панчеве, Зренянину и Сримскей Митровици.

IV. ОРҐАНИ АП ВОЙВОДИНИ

1. СКУПШТИНА АП ВОЙВОДИНИ

Положенє

Член 30.

Скупштина АП Войводини (у дальшим тексту: Скупштина) то найвисши орґан АП Войводини хтори окончує нормативни и други функциї, у складзе з Уставом, законом и Статутом.

Компетенция

Член 31.

Скупштина:

- приноши и меня Статут;
- приноши покраїнски скупштински одлуки, резолуциї, декларациї, препоруки, заключеня и други акти;
- вибера, розришує, унапрямує и контролує роботу Покраїнскей влади;
- розпатра рядово и позарядово звити о роботи Покраїнскей влади;
- приноши програмни, розвойни и плански документи, у складзе зоз законом и програмнима, розвойнима и планскима документами Републики Сербиї;
- приноши буджет и закончуюци рахунок;
- одлучує о задлужованю АП Войводини у складзе зоз законом;
- розписує покраїнски референдум;
- заключує спорозуменя з одвитуюцима териториялнима заєднїцами других державох у складзе зоз законом;
- приноши Покраїнску скупштинску одлуку о виборе и преставаню мандата и положеню посланїкох и Покраїнску скупштинску одлуку о виберанкових єдинкох;
- зоз покраїнску скупштинску одлуку ушорює права, длужносци и положенє вибраних, менованих, поставених и занятих особох у орґанох АП Войводини хтори нє ушорени зоз законом;
- прeдписує потупeня за нєпочитованє покраїнских прeдписаньох;
- вибера и розришує предсидателя и подпрeдсидатeльох Скупштини, прeдсидатeля, подпрeдсидатeльох и членох Покраїнскей влади, прeдсидатeльох и членох роботних целох Скупштини, ґенералного секретара Скупштини и других функционерох орґанох хтори вона снує;
- вибера покраїнского защитнїка гражданох - омбудсмана, ушорює його компетенциї и способ їх витворйованя зоз покраїнску скупштинску одлуку;
- снує фонди, односно банку з цильом розвою АП Войводини;
- приноши акт о снованю, компетенцийох и ушореню аґенцийох, явних подприємствох и установох АП Войводини и ушорює права, длужносци и положенє занятих особох у нїх хтори нє ушорени зоз законом;
- предклада закони, други предписаня и общи акти хтори приноши Народна скупштина Републики Сербиї;
- приноши Дїловнїк о роботи Скупштини;
- окончує други роботи як одредзене зоз законом и Статутом.

Состав Скупштини

Член 32.

Скупштина ма 120 посланїкох, хторих ше вибера на нєпоштредних виберанкох, зоз тайним гласаньом.

Вибор и прeставанє мандата посланїкох, зрозмирнeй заступeносци националних меншинох – националних заєднїцох и формованє вибeранкових єдинкох ше ушорює зоз покраїнску скупштинску одлуку, у складзе зоз законом.

Вибор посланїкох и конституованє Скупштини

Член 33.

Вибeранки за посланїкох розписує прeдсидатeль Скупштини, 90 днї прeд тим як цо видзe мандат Скупштини, так же ше вибeранки окончує у наступних 60 дньох.

Пeршу схадзку Скупштини заказує прeдсидатeль Скупштини зоз прeдходного зволаня, так же ше схадзку отримує найпознєйшe 30 днї од дня прeглашeня конєчних рeзултатох вибeранкох.

Скупштина на пeршeй схадзки потвeрдзує посланїцки мандати.

Скупштина конституована зоз потвeрдзованьом мандата двох трeцинох посланїкох.

Зоз потвeрдзованьом мандата двох трeцинох посланїкох прeстава мандат прeдходного зволаня Скупштини.

Положенє посланїкох

Член 34.

Мандат посланїкох у Скупштини тирва штири роки.

Мандат посланїкох почина з дньом потвeрдзованя мандата у Скупштини и тирва штири роки, односно по преставанє мандата посланїкох того зволаня Скупштини.

Зоз покраїнску скупштинску одлуку ше одредзує хтори функциї и длужносци представяю зраженє интересох, у складзе з Уставом и законом.

Скупштина може, у случаю позарядового або войнового стану, одлучиц предлужиц мандат посланїкох покля таки стан тирва, односно покля ше нє витворя условия за вибор нових посланїкох.

Защита посланїкох

Член 35.

Посланїк нє можe буц поволани на виновну одвичатeльносц, загарeштовани або покарани прe винєшeнe думанє або даванє гласа на схадзкох Скупштини и роботних цeлох.

Предсидатель и подпредсидателє Скупштини

Член 36.

Скупштина ма прeдсидатeля и єдного або вецей подпредсидательох хторих вибера зоз шора посланїкох.

Прeдсидатeль Скупштини представя Скупштину у жеми и иножемстве, предшедує и руководзи на схадзкох Скупштини, розписує виберанки за посланїкох, подписує акти хтори принєсла Скупштина и окончує други роботи яки одредзени зоз Статутом и Дїловнїком о роботи Скупштини.

Подпредсидатель Скупштини помага предсидательови Скупштини у окончованю його функциї, заменює прeдсидатeля у случаю його зопартосци и окончує други роботи яки одредзени з Дїловнїком о роботи Скупштини.

Способ и поступок предкладаня, вибор прeдсидатeля и подпредсидательох и одредзованє числа подпрeдсидатeльох ше ушорює з Дїловнїком о роботи Скупштини.

Предсидатель и подпредсидатель вибрани кед за нїх гласала векшина вкупного числа посланїкох.

Роботне цело за националну ровноправносц

Член 37.

Скупштина формує роботне цело за националну ровноправносц.

Вибор, компетенцию и способ роботи роботного цела за националну ровноправносц ше ушорює з Дїловнїком о роботи Скупштини.

Способ одлучованя

Член 38.

Скупштина одлучує з векшину гласох на схадзки на хторей присутна векшина вкупного числа посланїкох, кед зоз Статутом нє предвидзена окремна векшина.

Скупштина одлучує зоз двотрeцинску вeкшину гласох вкупного числа посланїкох:

- о приношеню и пременки Статута;
- о приношeню Покраїнскeй скупштинскeй одлуки за запровадзованє Статута;
- о приношeню Покраїнскeй скупштинскeй одлуки о символох АП Войводини;
- о виборe и розришeню Покраїнского защитнїка гражданох – омбудсмана.
Скупштина одлучує з вeкшину гласох вкупного числа посланїкох:
- о скорейчасовим преставаню мандата Скупштини;
- о розприсованю покраїнского референдума;
- о приношеню буджета АП Войводини и прилапйованю закончуюцого рахунку;
- о виборe и розришeню прeдсидатeля и подпрeдсидатeльох Скупштини;
- о виборe и розришeню прeдсидатeля, подпрeдсидатeльох и членох Покраїнскей влади;
- о приношеню Дїловнїка о роботи Скупштини.

Схадзки Скупштини

Член 39.

Скупштина роби на схадзкох у складзе зоз Статутом и Дїловнїком о роботи.

Скорейчасове преставанє мандата

Член 40.

Скупштини може скорейчасово престац мандат на предкладанє єдней трецини посланїкох.

Одлуку о скорейчасовим преставаню мандата Скупштина приноши з векшину гласох вкупного числа посланїкох, на схадзки хтору ше муши отримац у чаше 15 дньох од дня подношеня предкладаня.

Кед Скупштина нє принєше одлуку о скорейчасовим преставаню мандата, подписнїки предкладаня нє можу поднєсц нове предкладанє за скорейчасове преставанє мандата пред тим як прейду 180 днї.

Одлуку о скорейчасовим преставаню мандата Скупштини приноши предсидатель Скупштини кед ше у чаше 90 дньох од дня конституованя Скупштини нє вибере Покраїнску владу.

После скорейчасового преставаня мандата Скупштини предсидатель Скупштини розписує виберанки за посланїкох.

Скупштини нє може скорейчасово престац мандат под час войнового або позарядового стану.

Скупштина хторей скорейчасово престал мандат окончує лєм чечуци и нєодкладаюци роботи яки одредзени зоз законом и покраїнску скупштинску одлуку.

Право предкладаня

Член 41.

Право предкладаня покраїнских скупштинских одлукох и других общих актох хтори приноши Скупштина маю: кажди посланїк, Покраїнска влада, найменєй 10.000 вибераче або Покраїнски защитнїк гражданох - омбудсман зоз своєй компетенциї.

Покраїнски референдум

Член 42.

Скупштина може одлучиц же би о дзепоєдних питаньох з єй компетенциї одлуку приношели гражданє у АП Войводини на покраїнским референдуме.

Скупштина длужна розписац покраїнски референдум кед вимаганє за його розписованє поднєшу найменєй 30.000 вибераче.

Одлуку хтора принєшена на покраїнским референдуме преглашує Скупштина.

Покраїнска скупштинска одлука и Дїловнїк о роботи Скупштини

Член 43.

О Скупштини ше приноши покраїнску скупштинску одлуку.

Способ роботи Скупштини ше ушорює з Дїловнїком о роботи Скупштини.

2. ПОКРАЇНСКА ВЛАДА

Положенє и одвичательносц

Член 44.

Покраїнска влада то вивершни орґан АП Войводини.

Роботу Покраїнскей влади унапрямує Скупштина.

Покраїнска влада одвичательна Скупштини за свою роботу.

Компетенция

Член 45.

Покраїнска влада:

- вивершує покраїнски скупштински одлуки и други общи акти Скупштини;
- вивершує закони кед є за тото овласцена;
- приноши покраїнски уредби и други общи акти пре вивершованє законох и покраїнских скупштинских одлукох, за хтори є овласцена зоз законом або покраїнску скупштинску одлуку;
- формує фахови и други служби за окончованє роботох у своїм дїлокругу, у складзе зоз законом, Статутом и покраїнску скупштинску одлуку;
- предклада Скупштини буджет и закончуюци рахунок;
- предклада Скупштини програмни, розвойни и плански документи и поднїма мири за їх запровадзованє;
- предклада Скупштини покраїнски скупштински одлуки и други общи акти;
- поставя и розришує покраїнских функционерох хторих нє вибера и розришує Скупштина;
- унапрямує и ускладзує роботу покраїнских орґанох управи и окончує надпатрунок над їх роботу;
- надпатра роботу привредних дружтвох и установох хтори окончую явни овласценя и други роботи по питаньох од покраїнскей значносци, чий снователь АП Войводина;
- управя и розполага з явну власносцу АП Войводини, у складзе зоз законом, о чим поряднє подноши звит Скупштини;
- на вимаганє Скупштини, компетентного роботного цела або прeдсидатeля Скупштини дава думанє на предлог покраїнских скупштинских одлукох або другого общого акту хтори Скупштини поднєсол други предкладач;
- кед ше Скупштина нє може зисц, приноши общи акти и поднїма мири з компетенциї Скупштини у случаю елементарних нєпогодох и у других позарядових ситуацийох, пре одстраньованє тих позарядових ситуацийох, у складзе зоз законом;
- предклада Скупштини заключованє спорозуменьох з одвитуюцима териториялнима заєднїцами других державох;
- подноши рядови рочни звит о роботи Скупштини, а на єй вимаганє и позарядово звити о роботи;
- приноши Дїловнїк о роботи Покраїнскей влади;
- окончує други роботи яки утвердзени зоз законом, Статутом и покраїнску скупштинску одлуку.

Состав Покраїнскей влади

Член 46.

Покраїнску владу творя предсидатель, єден або вецей подпредсидателє и члени Покраїнскей влади.

Предсидатель Покраїнскей влади водзи и ускладзує роботу Покраїнскей влади у складзе з напрямками Скупштини, представя Покраїнску владу, подписує акти хтори вона приноши, водзи старосц о применьованю Дїловнїка о роботи Покраїнскей влади и окончує други роботи яки утвердзени зоз Статутом, покраїнску скупштинску одлуку и Дїловнїком о роботи Покраїнскей влади.

Члени Покраїнскей влади за свою роботу и за стан у обласци зоз свойого дїлокруга одвичательни Скупштини, Покраїнскей влади и предсидательови Покраїнскей влади.

Нєзлучносц функцийох

Член 47.

Предсидатель, подпредсидатель и член Покраїнскей влади нє може буц посланїк у Скупштини.

Посланїкови, хторого ше вибере за прeдсидатeля, подпрeдсидатeля и члена Покраїнскей влади, престава посланїцки мандат.

Зоз покраїнску скупштинску одлуку, у складзе з Уставом и законом, одредзує ше хтори други функциї, роботи або приватни интереси у зраженю з положеньом предсидателя, подпредсидателя и члена Покраїнскей влади.

Вибор Покраїнскей влади

Член 48.

Кандидата за предсидателя Покраїнскей влади предклада предсидатель Скупштини, понеже вислуха думанє представительох посланїцких ґрупох.

Кандидат за предсидателя Покраїнскей влади предклада кандидатох за єдного або вецей подпредсидательох и за членох Покраїнскей влади.

Скупштина источашнє одлучує о виборе прeдсидатeля, подпрeдсидатeльох и членох Покраїнскей влади.

Скупштина вибера прeдсидатeля, подпрeдсидатeльох и членох Покраїнскей влади з векшину гласох вкупного числа посланїкох.

Початок и преставанє мандата Покраїнскей влади

Член 49.

Мандат Покраїнскей влади тирва по виходзенє мандату Скупштини хтора ю вибрала.

Мандат Покраїнскей влади почина чечиц з дньом пришаганя пред Скупштину.

Мандат Покраїнскей влади престава скорей як видзе час на хтори є вибрана: з розришеньом прeдсидатeля Покраїнскей влади, зоз задзекованьом предсидателя Покраїнскей влади або скорейчасовим преставаньом мандата Скупштини.

Покраїнска влада хторей престал мандат може окончовац лєм чечуци и нєодкладаюци роботи по вибор новей Покраїнскей влади, яки одредзени зоз покраїнску скупштинску одлуку.

Членови Покраїнскей влади мандат престава скорей як видзе час на хтори є вибрани: з констатованьом задзекованя, кед го Скупштина розриши на предкладанє прeдсидатeля Покраїнскей влади, з розришеньом прeдсидатeля Покраїнскей влади або зоз задзекованьом прeдсидатeля Покраїнскей влади.

Розришенє прeдсидатeля Покраїнскей влади

Член 50.

Предкладанє за розришенє прeдсидатeля Покраїнскей влади можу поднєсц найменєй 30 посланїки.

Предкладанє за розришенє прeдсидатeля Покраїнскей влади ше розпатра на першей наступней схадзки Скупштини хтору ше заказує у чаше седем дньох. По законченю розправи ше приступа ґу гласаню о предкладаню за розришенє.

Скупштина прилапела предкладанє за розришенє прeдсидатeля Покраїнскей влади кед за ньго гласала вецей як половка вкупного числа посланїкох.

Кед Скупштина розриши прeдсидатeля Покраїнскей влади, предсидатель Скупштини длужен порушац поступок за вибор новей Покраїнскей влади.

Кед Скупштина нє вибере нови состав Покраїнскей влади у чаше 60 дньох од розришеня прeдсидатeля Покраїнскей влади, Скупштини престава мандат и розписує ше виберанки.

Кед Скупштина нє прилапи предкладанє за розришенє прeдсидатeля Покраїнскей влади, подписнїки предкладаня нє можу поднєсц нове предкладанє за розришенє скорей як прейду 180 днї.

Задзекованє прeдсидатeля Покраїнскей влади

Член 51.

Предсидатель Покраїнскей влади може поднєсц задзекованє Скупштини.

Предсидатель Покраїнскей влади подноши задзекованє предсидательови Скупштини и источашнє о нїм обвисцує явносц.

Скупштина на першей наступней схадзки констатує задзекованє, без розправи.

Покраїнскей влади престава мандат з дньом констатованя задзекованя предсидателя Покраїнскей влади.

Кед Скупштина констатує задзекованє предсидателя Покраїнскей влади, предсидатель Скупштини порушує поступок за вибор новей Покраїнскей влади.

Кед Скупштина нє вибере нови состав Покраїнскей влади у чаше 60 дньох од дня констатованя задзекованя прeдсидатeля Покраїнскей влади, Скупштини престава мандат и розписує ше виберанки.

Задзекованє и розришенє члена Покраїнскей влади

Член 52.

Член Покраїнскей влади може поднєсц задзекованє предсидательови Покраїнскей влади.

Предсидатель Покраїнскей влади доручує поднєшене задзекованє предсидательови Скупштини, хтора го констатує на першей наступней схадзки.

Предсидатель Покраїнскей влади може предложиц Скупштини розришенє члена Покраїнскей влади.

Скупштина на першей наступней схадзки розпатра и гласа о предкладаню за розришенє члена Покраїнскей влади.

Одлука о розришеню члена Покраїнскей влади принєшена кед за ню гласала векшина вкупного числа посланїкох.

Членови Покраїнскей влади хтори поднєсол задзекованє мандат престава з дньом констатованя задзекованя, а членови Покраїнскей влади хтори розришени – з дньом приношеня одлуки о розришеню.

Положенє и овласценя члена Покраїнскей влади хтори поднєсол задзекованє або поднєшене предкладанє за його розришенє, по преставанє мандата ше ушорює зоз покраїнску скупштинску одлуку.

Предсидатель Покраїнскей влади, по преставаню мандата члена Покраїнскей влади, предклада кандидата за нового члена Покраїнскей влади.

Одредби того члена ше сходно применює и у поступку задзекованя и розришеня подпрeдсидатeльох Покраїнскей влади.

Защита прeдсидатeля, подпрeдсидатeля и члена Покраїнскей влади

Член 53.

Предсидатель, подпредсидатель и член Покраїнскей влади нє одвитую за думанє винєшене на схадзки Покраїнскей влади, схадзки Скупштини и за гласанє на схадзки Покраїнскей влади.

Покраїнска скупштинска одлука и Дїловнїк о роботи Покраїнскей влади

Член 54.

О Покраїнскей влади ше приноши покраїнску скупштинску одлуку.

Способ роботи Покраїнскей влади ше ушорює з Дїловнїком о роботи Покраїнскей влади.

3. ПОКРАЇНСКА УПРАВА

Положенє покраїнскей управи

Член 55.

Покраїнска управа самостойна и роботи зоз своєй компетенциї окончує у складзе з Уставом, законом, Статутом и покраїнску скупштинску одлуку, а за свою роботу одвитує Покраїнскей влади и Скупштини.

Роботи покраїнскей управи окончую покраїнски секретарияти и покраїнски окремни управни орґанизациї.

Назву и дїлокруг роботи покраїнских орґанох управи ше одредзує зоз покраїнску скупштинску одлуку.

Зоз покраїнским секретариятом руководзи член Покраїнскей влади, а зоз покраїнскима окремнима управнима орґанизациями – директор хторого поставя Покраїнска влада.

Нукашнє ушоренє покраїнских орґанох управи и других покраїнских орґанизацийох и службох предписує Покраїнска влада.

Поєдинєчни акти и дїї покраїнских орґанох управи, орґанизацийох хторим зверени овласценя, муша буц засновани на законє и покраїнскей скупштинскей одлуки.

Надпатрунок над роботу покраїнских орґанох управи окончую орґани державней управи и Покраїнска влада у складзе зоз законом и Статутом.

Процив конєчних поєдинєчних актох покраїнскей управи зоз хторима ше одлучує о праве, обовязки або на законє заснованим интересу ше обезпечує судску защиту, у складзе з Уставом и законом.

4. ПОКРАЇНСКИ ЗАЩИТНЇК ГРАЖДАНОХ - ОМБУДСМАН

Член 56.

Покраїнски защитнїк гражданох - омбудсман (у дальшим тексту: омбудсман) то нєзависни и самостойни орґан АП Войводини хтори щици права гражданох и окончує надпатрунок над роботу покраїнских орґанох управи, явних подприємствох и установох хтори окончую управни и явни овласценя, а чий снователь АП Войводина, у вязи зоз їх поступаньом у вивершованю одлукох и других правних актох АП Войводини.

Омбудсман щици права гражданох окреме од потупеньох яки зробени з нєзаконїтим, нєдоцильним и нєєфикасним поступаньом орґанох покраїнскей управи, явних подприємствох и установох хтори окончую управни и явни овласценя, а чий снователь АП Войводина.

Омбудсман щици права гражданох од потупеньох яки зробени з нєзаконїтим, нєдоцильним и нєєфикасним поступаньом орґанох городскей и општинскей управи у окончованю роботох хтори им зверела АП Войводина зоз своєй жридловей компетенциї.

Омбудсмана вибера и розришує Скупштина зоз двотрецинску векшину гласох вкупного числа посланїкох.

Омбудсман ма заменїкох чийо ше число, условия за вибор, способ вибору и компетенциї ушорює з покраїнску скупштинску одлуку.

Омбудсман и його заменїки за свою роботу одвичательни Скупштини.

О омбудсманови ше приноши покраїнску скупштинску одлуку.ž

V. ФИНАНСОВАНЄ АП ВОЙВОДИНИ

Буджет автономней покраїни

Член 57.

АП Войводина ма буджет у хторим ше приказує шицки розходи и приходи зоз хторима ше финансує компетенциї АП Войводини.

Буджет АП Войводини виноши найменєй 7% у одношеню на буджет Републики Сербиї.

Три седмини буджету АП Войводини ше будзе хасновац за финансованє капиталних розходох.

Приходи автономней покраїни

Член 58.

АП Войводина ма жридлово приходи зоз хторима финансує свойо компетенциї, у складзе з Уставом и законом.

Файту и висину жридлових приходох АП Войводини и учасц АП Войводини у часци приходох Републики Сербиї ше одредзує зоз законом, у складзе з Уставом.

VI. УСОГЛАШЕНОСЦ ПОКРАЇНСКИХ ПРАВНИХ АКТОХ, ОБЯВЙОВАНЄ И СТУПАНЄ НА МОЦ

Усоглашеносц правних актох

Член 59.

Статут то найвисши правни акт АП Войводини хтори муши буц у согласносци з Уставом и законом.

Покраїнски скупштински одлуки и други общи акти Скупштини муша буц у согласносци зоз Статутом.

Покраїнски уредби и други общи акти Покраїнскей влади, покраїнскей управи, явних подприємствох и установох хтори окончую управни и явни овласценя, а чий снователь АП Войводина, муша буц у согласносци зоз Статутом, покраїнскима скупштинскима одлуками и другима общима актами Скупштини.

Поєдинєчни акти покраїнских орґанох управи, явних подприємствох и установох хтори окончую управни и явни овласценя, а чий снователь АП Войводина, муша буц у согласносци зоз Статутом, покраїнскима скупштинскима одлуками и другима общима актами Скупштини и Покраїнскей влади.

Поєдинєчни акти орґанох єдинкох локалней самоуправи у окончованю роботох хтори им зверела АП Войводина муша буц у согласносци зоз Статутом, покраїнскима скупштинскима одлуками и другима общима актами Скупштини.

Обявйованє

Член 60.

Статут, покраїнски скупштински одлуки и други общи акти Скупштини, як и покраїнски уредби и други общи акти Покраїнскей влади ше обявює у «Службених новинох Автономней Покраїни Войводини», пред ступаньом на моц.

Акти Покраїнскей влади, окрем актох зоз пасуса 1. того члена и акти покраїнских орґанох управи ше обявює кед то з тима актами предвидзене.

Акти зоз пас. 1. и 2. того члена ше обявює на шицких язикох хтори ше службено хаснує у роботи орґанох АП Войводини. У случаю нєусоглашеносци, миродавни текст яки обявени на сербским язику.

Ступанє на моц

Член 61.

Покраїнска скупштинска одлука и други общи акти ступаю на моц найскорей осми дзень по обявйованю.

Акти зоз пасуса 1. того члена можу ступиц на моц и з дньом обявйованя, кед за тото єст окреме оправдани причини яки утвердзени при їх приношеню.

VII. ПРЕМЕНКА СТАТУТА

Предкладанє за пременку Статута

Член 62.

Предкладанє за пременку Статута можу поднєсц: найменєй єдна трецина вкупного числа посланїкох, Покраїнска влада и найменєй 40.000 вибераче.

О предкладаню за пременку Статута одлучує Скупштина з двотрецинску векшину гласох вкупного числа посланїко.

Утвердзованє акта о пременки Статута

Член 63.

Кед Скупштина прилапи предкладанє за пременку Статута, приступа ше ґу виробку, односно розпатраню акта о пременки Статута.

Скупштина утвердзує предлог акта о пременки Статута з двотрецинску векшину гласох вкупного числа посланїкох и доручує го Народней скупштини Републики Сербиї пре даванє согласносци.

По доставаню согласносци Народней скупштини Републики Сербиї, Скупштина приноши акт о пременки Статута зоз двотрецинску векшину гласох вкупного числа посланїкох.

VIII. ЗАКОНЧУЮЦИ ОДРЕДБИ

Член 64.

За запровадзованє Статута ше принєше покраїнску скупштинску одлуку.

Покраїнску скупштинску одлуку о запровадзованю Статута приноши Скупштина з двотрецинску векшину гласох вкупного числа посланїкох.

Член 65.

Статут ступа на моц осми дзень по обявйованю у «Службених новинох Автономней Покраїни Войводини».

СКУПШТИНА АВТОНОМНЕЙ ПОКРАЇНИ ВОЙВОДИНИ

Нови Сад, 22. мая 2014. року

ПРЕДСИДАТЕЛЬ
СКУПШТИНИ АП ВОЙВОДИНИ,

Иштван Пастор, с.р.
(Pásztor István, s.k.)