Покраїнскa скупштинска одлука о покраїнскей управи

("Сл. новини АП Войводини", число 37/2014)

На основи члена 55. пасус 3. и члена 31. алинея 2. Статута Автономней Покраїни Войводини («Службени новини АПВ», число 20/14),

Скупштина Автономней Покраїни Войводини, на схадзки хтора отримана 23. септембра 2014. року, п р и н є с л а

ПОКРАЇНСКУ СКУПШТИНСКУ ОДЛУКУ О
ПОКРАЇНСКЕЙ УПРАВИ

Член 1.

Зоз тоту покраїнску скупштинску одлуку ше ушорює назву и дїлокруг роботи, роботи и орґанизацию покраїнских орґанох управи и други питаня значни за покраїнску управу.

Член 2.

Шицки меновнїки хтори ше хаснує у тей одлуки у хлопским роду, а маю и женски род, подрозумюю и источашнє облапяю исти меновнїки у женским роду.

Меновнїки хтори означую службени позициї и функциї у покраїнских орґанох управи ше хаснує у форми яка виражує пол особи хтора їх ношитель.

1. ПОЛОЖЕНЄ, СПОСОБ РОБОТИ И РОБОТИ ПОКРАЇНСКЕЙ УПРАВИ

Положенє, состав и одвичательносц покраїнскей управи

Член 3.

Покраїнски орґани управи то покраїнски секретарияти и покраїнски окремни управни орґанизациї.
За свою роботу покраїнска управа одвичательна Скупштини Автономней Покраїни Войводини (у дальшим тексту: Скупштина) и Покраїнскей влади.

Пре витворйованє контроли над роботу покраїнских орґанох управи, у складзе зоз Статутом Автономней Покраїни Войводини (у дальшим тексту: Статут), покраїнски орґани управи подноша звит о своєй роботи Покраїнскей влади.

Одвичательносц за чкоду

Член 4.

За чкоду хтору зоз свою нєзаконїту або нєправилну роботу покраїнски орґани управи спричиня физичним и правним особом, одвичательна АП Войводина.

Финансованє роботи

Член 5.

Средства за финансованє роботох покраїнскей управи ше обезпечує у буджету АП Войводини у складзе зоз законом и другима предписанями.

Начала дїйствованя покраїнскей управи

Член 6.

Покраїнски орґани управи самостойни у окончованю своїх роботох и робя у рамикох и на основи Устава, закона, Статута, покраїнских скупштинских одлукох и других общих актох Скупштини и Покраїнскей влади.

Член 7.

Покраїнски орґани управи длужни каждому обезпечиц єднаку правну защиту у витворйованю його правох и интересох.

Член 8.

Покраїнски орґани управи длужни оможлївиц странком швидке и дїлотворне витворйованє їх правох и интересох и у складзе зоз правилами фаху хасновац средства хтори за странку найвигоднєйши кед ше з нїма витворює циль и наменку предписаньох и почитовац особносц и достоїнство странки.

Член 9.

У покраїнских орґанох управи ше при обезпечованю роботи водзи рахунку о националним составе жительства и одвитуюцей заступеносци припаднїкох националних меншинох – националних заєднїцох, у складзе з Уставом и законом.

Член 10.

Робота покраїнскей управи доступна явносци.

Покраїнски орґани управи длужни оможлївиц увид до своєй роботи по закону зоз хторим ше ушорює шлєбодни приступ ґу информацийом од явней значносци.

Покраїнски орґани управи информую явносц о своєй роботи з даваньом информацийох прейґ средствох явного информованя, з отримованьом конференцийох за пресу и твореньом других условийох за упознаванє гражданох з роботу покраїнскей управи.

Роботи покраїнскей управи

Член 11.

Покраїнски орґани управи, у рамикох компетенцийох АП Войводини яки утвердзени з Уставом, законом и Статутом, окончую вивершни роботи, надпатраю, пририхтую предписаня яки приноша Скупштина и Покраїнска влада и приноша предписаня и поєдинєчни акти зоз своєй компетенциї, окончую фахово и розвойни роботи, провадза роботу явних службох, окончую зверени роботи державней управи и окончую други роботи у складзе зоз предписанями.

Член 12.

У окончованю вивершних роботох, покраїнски орґани управи запровадзую и применюю покраїнски скупштински одлуки, покраїнски уредби и други одлуки Скупштини и Покраїнскей влади зоз приношеньом предписаньох и поєдинєчних актох, водза явни евиденциї, видаваю явни документи и поднїмаю и окончую други роботи.

Покраїнски секретарияти окончую надпатрунок у рамикох овласценьох яки утвердзени у закону.

Покраїнски орґани управи пририхтую нариси и предлоги предписаньох яки приноша Скупштина и Покраїнска влада и приноша предписаня и поєдинєчни акти зоз своєй компетенциї.

У окончованю фахових и розвойних роботох, покраїнски орґани управи провадза и анализую стан у обласцох зоз свойого дїлокругу, пририхтую звити и информациї на основи утвердзеного стану, поднїмаю мири або предкладаю Покраїнскей влади поднїманє мирох за яки вона овласцена, пририхтую програмни, розвойни и плански документи у обласци зоз свойого дїлокругу.

Покраїнски орґани управи, у обласцох зоз свойого дїлокругу, провадза и помагаю у роботи явним службом, же би їх робота була у складзе зоз предписанями.

Покраїнски орґани управи окончую роботи державней управи кед им окончованє тих роботох зверене зоз законом.

Зверйованє роботох покраїнскей управи

Член 13.

Зоз покраїнску скупштинску одлуку мож звериц єдинком локалней самоуправи зоз териториї АП Войводини, явним подприємством и установом чий снователь АП Войводина (у дальшим тексту: маюци явних овласценьох) дзепоєдни роботи покраїнскей управи зоз жридловей компетенциї АП Войводини.

Покраїнска влада и покраїнски орґани управи и по зверйованю роботох покраїнскей управи затримую одвичательносц за їх вивершованє.

Средства за окончованє зверених роботох покраїнскей управи ше обезпечує у буджету АП Войводини.

Член 14.

Надпатрунок над роботу маюцих явних овласценьох у окончованю зверених роботох окончую покраїнски орґани управи зоз чийого дїлокругу тоти зверени роботи.

Надпатрунок над окончованьом зверених роботох покраїнски орґани управи окончую зоз сходним применьованьом одредбох Закона о державней управи, о овласценьох надпатраюцого орґана.

Акти покраїнскей управи

Член 15.

З цильом вивершованя законох, других предписаньох и общих актох Републики Сербиї, предписаньох Скупштини и Покраїнскей влади, покраїнски орґани управи приноша предписаня и поєдинєчни акти, кед су за таке овласцени.

Член 16.

Покраїнски орґани управи приноша правилнїки, розкази, упутства, ришеня и други акти, у складзе зоз законом, Статутом, покраїнску скупштинску одлуку и общим актом Покраїнскей влади.

Зоз правилнїком ше розрабя дзепоєдни одредби покраїнских скупштинских одлукох и других общих актох Скупштини и общих актох Покраїнскей влади.

Зоз розказом ше, пре вивершованє дзепоєдних одредбох закона и других предписаньох, розказує або забранює поступац у одредзеним случаю хтори ма общу значносц.

Зоз упутством ше предписує способ роботи и окончованє роботох покраїнских орґанох управи.

Зоз ришеньом ше одлучує о поєдинєчних стварох, у складзе зоз предписанями.

Член 17.

Акти зоз члена 16, хтори од интереса за вецей покраїнски орґани управи, приноша спорозумно руководителє тих орґанох.

Службене хаснованє язикох и писмох

Член 18.

Попри сербского язика и кирилского писма, у покраїнских орґанох управи у ровноправним службеним хаснованю и мадярски, словацки, горватски, румунски и руски язик и їх писма, у складзе зоз законом.
Заняти особи у орґанох покраїнскей управи длужни знац сербски язик, а язик националней меншини - националней заєднїци хтори ше службено хаснує кед тото утвердзене з актом о нукашнєй орґанизациї и систематизациї роботних местох.

Член 19.

Покраїнски орґани управи, кед су нє оспособени за комуникацию на одвитуюцим язику, можу хасновац услуги служби за прекладанє у составе покраїнского секретарияту компетентного за роботи управи.

Член 20.

Покраїнски орґани управи длужни обезпечиц финансийни, технїчни условия и людски ресурси пре обезпеченє службеного хаснованя язикох и писмох зоз члена 18. пасус 1. тей одлуки.

Член 21.

Покраїнска влада провадзи витворйованє службеного хаснованя язикох и писмох у покраїнских орґанох управи и поднїма мири обезпечованє язичней ровноправносци.

Заняти особи у покраїнских орґанох управи

Член 22.

Заняти особи у покраїнских орґанох управи окончую роботи з дїлокругу того орґана, як и провадзаци помоцно-технїчни роботи.

2. УШОРЕНЄ ПОКРАЇНСКЕЙ УПРАВИ

Покраїнски секретарият

Член 23.

Покраїнски секретарияти ше формує за окончованє роботох покраїнскей управи у єдней або вецей медзисобно повязаних обласцох.

Зоз покраїнским секретариятом руководзи покраїнски секретар.

Покраїнски секретар

Член 24.

Покраїнски секретар член Покраїнскей влади хтори задлужени за руководзенє зоз покраїнским секретариятом.

Покраїнски секретар представя покраїнски секретарият, орґанизує и обезпечує окончованє роботох на ефикасни способ, приноши акти за яки є овласцени, формує комисиї и роботни ґрупи за окончованє зложенших роботох з дїлокругу секретарияту и одлучує о правох, длужносцох и одвичательносцох занятих.

Заменїк покраїнского секретара

Член 25.

Покраїнски секретар може мац заменїка хторого вибера Скупштина на штири роки.

З преставаньом мандата Покраїнскей влади, престава мандат и заменїкови покраїнского секретара.

Заменїк покраїнского секретара заменює покраїнского секретара и помага покраїнскому секретарови у рамикох овласценьох яки му вон одредзи.

Кед покраїнски секретар длужей зопарти, цо ма констатовац Покраїнска влада, заменїк заменює одсутного покраїнского секретара и ма шицки овласценя покраїнского секретара.

Покраїнски секретар може овласциц заменїка покраїнского секретара же би присуствовал и участвовал у роботи на схадзкох Покраїнскей влади, без права гласу.

Подсекретар покраїнского секретарияту

Член 26.

Покраїнски секретарият може мац подсекретара, хтори за свою роботу одвичательни покраїнскому секретарови.

Подсекретар помага покраїнскому секретарови у управяню зоз кадровима, финансийнима, информатичнима и другима роботами, у ускладзованю роботи нукашнїх єдинкох покраїнского секретарияту и сотрудзує зоз другима орґанами.

Подсекретара поставя и розришує Покраїнска влада на штири роки, на предкладанє покраїнского секретара.

Помоцнїк покраїнского секретара

Член 27.

У покраїнским секретарияту мож поставяц помоцнїкох покраїнского секретара.

Помоцнїк покраїнского секретара руководзи з обласцу роботи покраїнского секретарияту за хтору ше формує сектор и за свою роботу є одвичательни покраїнскому секретарови.

Помоцнїка покраїнского секретара поставя и розришує Покраїнска влада на штири роки, на предкладанє покраїнского секретара.

Окремни совитнїк покраїнского секретара

Член 28.

Покраїнски секретар може мац окремного совитнїка.

Окремни совитнїк покраїнского секретара по налогу покраїнского секретара пририхтує предлоги актох, пише думаня и окончує други роботи за покраїнского секретара.

Права и обовязки окремного совитнїка покраїнского секретара ше ушорює з контрактом.

Число окремних совитнїкох покраїнского секретара ше одредзує з актом Покраїнскей влади за кажди покраїнски секретарият.

Покраїнски окремни управни орґанизациї

Член 29.

Покраїнски окремни управни орґанизациї ше формує за окончованє фахових и з нїма повязаних вивершних роботох.

Покраїнски окремни управни орґанизациї то заводи и дирекциї, а зоз предписаньом мож одредзиц и иншаки назви.

У сновательним акту орґанизациї зоз пасуса 2. того члена ше катеґорично назначує же ше роби о покраїнскей окремней управней орґанизациї хтора роботи зоз свойого дїлокругу и явни овласценя окончує у складзе зоз предписанями з якима ше ушорює роботу покраїнскей управи.

Зоз покраїнску окремну управну орґанизацию руководзи директор, хторого поставя Покраїнска влада на штири роки на предкладанє предсидателя Покраїнскей влади. Директор покраїнскей окремней управней орґанизациї одвичательни Покраїнскей влади.

Правилнїк о нукашнєй орґанизациї и систематизациї роботних местох

Член 30.

Нукашнє ушоренє покраїнских орґанох управи ше ушорює зоз правилнїком о нукашнєй орґанизациї и систематизациї роботних местох. Правилнїк о нукашнєй орґанизациї и систематизациї роботних местох у покраїнским секретарияту приноши покраїнски секретар, а у покраїнскей окремней управней орґанизациї директор.

Правилнїк о нукашнєй орґанизациї и систематизациї роботних местох ступа на моц зоз даваньом согласносци Покраїнскей влади.

Зраженє интересох

Член 31.

Покраїнски секретар, заменїк покраїнского секретара, подсекретар и помоцнїк покраїнского секретара, як и директор окремней управней орґанизациї подлєгую правилом предписаньох о зопераню зраженя интересох.

3. ПОКРАЇНСКИ СЕКРЕТАРИЯТИ И ЇХ ДЇЛОКРУГ

Покраїнски секретарияти

Член 32.

Покраїнски секретарияти тоти:

1. Покраїнски секретарият за польопривреду, водопривреду и лєсарство.
2. Покраїнски секретарият за образованє, предписаня, управу и национални меншини - национални заєднїци.
3. Покраїнски секретарият за културу и явне информованє.
4. Покраїнски секретарият за здравство, социялну политику и демоґрафию.
5. Покраїнски секретарият за финансиї.
6. Покраїнски секретарият за медзиреґионалне сотруднїцтво и локалну самоуправу.
7. Покраїнски секретарият за урбанизем, будовательство и защиту животного штредку.
8. Покраїнски секретарият за науку и технолоґийни розвой.
9. Покраїнски секретарият за енерґетику и минерални сировини.
10. Покраїнски секретарият за спорт и младеж.
11. Покраїнски секретарият за привреду, обезпечованє роботи и ровноправносц полох.

Покраїнски секретарият за польопривреду, водопривреду и лєсарство

Член 33.

Покраїнски секретарият за польопривреду, водопривреду и лєсарство, у складзе зоз законом и Статутом, окончує роботи покраїнскей управи у обласци польопривреди, водопривреди, лєсарства, лову, статкарства, аквакултури, пчоларства и ветеринарства, хтори ше одноша на пририхтованє актох за Скупштину або Покраїнску владу, зоз хторима ше: приноши Програму мирох за потримовку запровадзованя польопривредней политики; предписує условия и способ розподзельованя хаснованя средствох яки витворени од хаснованя польопривредней жеми; формує окремни буджет до хторого ше унапрямує средства од хаснованя польопривредней жеми; снує буджетни фонд за води, лєси и ловство; утвердзує фахово роботи за унапредзенє польопривредней продукциї; снує и пребера польопривредни совитодавни служби и окончує сновательни права над нїма; снує проґнозово-звитодавни служби и окончує сновательни права над нїма; предклада компетентному министерству условия вивоженя и увоженя одредзених польопривредних продуктох; приноши Длугорочну програму мирох за запровадзованє одховйовацкей програми за територию АП Войводини и рочну програму за єй запровадзованє; формує Науково-фахови совит за статкарство; приноши, запровадзує и надпатра рядово и позарядово мири одбрани од вонкашнїх и нукашнїх водох; управя зоз водовима ресурсами и штучнима и природнима водоцеками на териториї АП Войводини; приноши плански документи у обласци интеґралного управяня зоз водами; предклада снованє явних подприємствох з компетенциї секретарияту.

Покраїнски секретарият за польопривреду, водопривреду и лєсарство окончує и роботи яки предписани зоз законами з обласци польопривреди, водопривреди, лєсарства, лову, статкарства, аквакултури, пчоларства и ветеринарства, кед з тима законами предписане же роботи окончує компетентни орґан автономней покраїни.

Покраїнски секретарият за польопривреду, водопривреду и лєсарство окончує як зверени гевти роботи державней управи хтори зоз законами зоз пасуса 2. зверени покраїнским орґаном управи.

Покраїнски секретарият за польопривреду, водопривреду и лєсарство прима и обрабя документацию за дозельованє стимулуюцих и других средствох з буджету АП Войводини у обласци польопривреди, лєсарства, ловства, водопривреди и статкарства.

Покраїнски секретарият за польопривреду, водопривреду и лєсарство окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох зоз пасуса 1. того члена. У обласцох зоз свойого дїлокругу, провадзи, надпатра и помага у роботи явним подприємством и явним службом чий снователь АП Войводина.

Покраїнски секретарият за польопривреду, водопривреду и лєсарство окончує и други роботи кед му таке зверене зоз законом, покраїнску скупштинску одлуку або з другим предписаньом.

Покраїнски секретарият за културу и явне информованє

Член 34.

Покраїнски секретарият за културу и явне информованє, у складзе зоз законом и Статутом, окончує роботи покраїнскей управи у обласци култури, защити културних доброх, кинематоґрафиї, задужбинох, фондох и фондацийох, библиотецкей дїялносци, видаваня публикацийох, медзиреґионалного сотруднїцтва у обласци култури, як и защити правох интелектуалней власносци у обласци култури, хтори ше одноша на пририхтованє актох Скупштини або Покраїнскей влади зоз хторима ше: снує установи у обласци култури, утвердзує потреби и интерес гражданох на териториї АП Войводини у обласци култури; ушорює потреби и интерес у обласци култури националних меншинох - националних заєднїцох и обезпечує средства за їх витворйованє; снує архиви, музеї, библиотеки, театри, заводи и други установи у обласци култури и окончує сновательни права над нїма; предклада часц Стратеґиї културного розвою Републики Сербиї за територию АП Войводини; утвердзує Програму културного розвою АП Войводини, у складзе зоз Стратеґию културного розвою Републики Сербиї; утвердзує награди и ушорює способ и поступок їх додзельованя за стимулованє културней творчосци у дзепоєдних обласцох култури, односно за окремне доприношенє у обласци културней творчосци; обезпечує средства за роботу, инвестицийне и чечуце отримованє, односно финансованє часци програмох установох култури чий снователь АП Войводина; утвердзує мерадла, критериюми и поступок додзельованя средствох за установи и орґанизациї чий снователь нє АП Войводина, а доприноша розвою култури и уметносци у АП Войводини, або обезпечую розвой култури националних меншинох - националних заєднїцох и пририхтую акти з якима ше обезпечує средства за їх роботу, инвестицийне и чечуце отримованє и опреманє, односно програми; предписує дополнююци условия за роботу Архиву Войводини у Новим Садзе, Библиотеки Матици сербскей у Новим Садзе, Музею Войводини у Новим Садзе, Музею сучасней подобовей уметносци у Новим Садзе и Театралного музею Войводини; утвердзує сполньованє условийох за початок роботи и окончованє дїялносци установох защити култури на териториї АП Войводини.

Покраїнски секретарият за културу и явне информованє окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох зоз пасуса 1. того члена. У обласцох зоз свойого дїлокругу провадзи, надпатра и помага у роботи установом и явним службом чий снователь АП Войводина.

Покраїнски секретарият за културу и явне информованє, у обласци култури, витворює медзиреґионалне сотруднїцтво на проєктох од интереса за розвой култури на териториї АП Войводини.

Покраїнски секретарият за културу и явне информованє у обласци защити културних доброх: порушує поступок за утвердзованє нєрухомих културних доброх на териториї АП Войводини; утвердзує условия за поднїманє мирох технїчней защити и других роботох на нєрухомих културних доброх кед за територию АП Войводини проєкт и документацию за тоти роботи вирабя завод за защиту памятнїкох култури; обвисцує у законским термину Покраїнски Завод за защиту памятнїкох култури у Новим Садзе о утвердзених условийох, кед тоти условия утвердзує завод з териториї АП Войводини; дава согласносц на проєкт и документацию за поднїманє мирох технїчней защити и других роботох на нєрухомих културних доброх кед проєкт и документацию вирабя завод за защиту памятнїкох култури з териториї АП Войводини; дава думанє о нарисох просторних и урбанистичних планох за територию АП Войводини и обвисцує компетентни орґан кед план нє ма предписани змист.

Покраїнски секретарият за културу и явне информованє у обласци защити културних доброх, кинематоґрафиї, задужбинох, фондох и фондацийох, библиотецкей дїялносци, видаваня публикацийох и защити правох интелектуалней власносци и авторских и зродних правох и поднїманя мирох процив пиратериї, у складзе зоз законом, окончує зверени роботи державней управи хтори зоз законом зверени орґаном АП Войводини.

Покраїнски секретарият за културу и явне информованє, у складзе зоз законом и Статутом, окончує роботи покраїнскей управи у обласци явного информованя и медийох хтори ше одноша на пририхтованє актох за Скупштину або Покраїнску владу зоз хторима ше ушорює питаня од покраїнскей значносци; утвердзує явни интерес гражданох АП Войводини у обласци явного информованя и медийох и приноши стратеґию розвою у обласци явного информованя, на териториї АП Войводини, у складзе зоз републичну стратеґию у обласци явного информованя.

Покраїнски секретарият за културу и явне информованє провадзи и утвердзує стан у обласци явного информованя и окончує роботи хтори ше одноша на унапредзенє и стимулованє явного информованя на териториї АП Войводини; обезпечує средства и други условия за витворйованє явного интереса у обласци явного информованя – розпоредзує средства на основи запровадзених явних конкурсох и поєдинєчних даваньох, на основи принципу о додзельованю державней помоци и защити конкуренциї, без дискриминациї; обезпечує средства або други условия за роботу медийох хтори обявюю информациї на язикох меншинских националних заєднїцох у складзе зоз законом; обезпечує часц средствох або други условия за нєзавадзане хаснованє правох особох з окремнима потребами пре нєзавадзане приманє информацийох хтори наменєни явносци; обезпечує часц средствох за финансованє дїялносци явного медийского сервису и то за проєкти хтори наменєни за розвой нових технолоґийох, диґитализацию архивох, за проєкти диґитализациї технолоґийней опреми, розвой нових дистрибуцийних сервисох у складзе з можлївосцами хтори приноши диґитализация и други проєкти од окремней дружтвеней значносци у складзе зоз законом з яким ше реґулує явне информованє, и у складзе зоз законом, до Реґистру медийох доручує податки о сумох пенєжних средствох яки секретарият одобрел явним глашнїком.

Покраїнски секретарият за културу и явне информованє окончує роботи хтори ше одноша на обезпечованє явносци роботи покраїнских орґанох и орґанизацийох; провадзи медиї у писаней и електронскей форми, пририхтує и прави препатрунки їх змистох и прави анализи; видава публикациї о АП Войводини.

Покраїнски секретарият за културу и явне информованє окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох о явним информованю и медийох, як зверену роботу.

Покраїнски секретарият за културу и явне информованє витворює сотруднїцтво зоз републичнима орґанами и орґанами локалней самоуправи и окончує други роботи, кед му таке зверене зоз законом, покраїнску скупштинску одлуку або з другим предписаньом.

Покраїнски секретарият за здравство, социялну политику и демоґрафию

Член 35.

Покраїнски секретарият за здравство, социялну политику и демоґрафию, у складзе зоз законом и Статутом, окончує роботи покраїнскей управи у обласци здравства хтори ше одноша на пририхтованє актох за Скупштину або Покраїнску владу, зоз хторима ше: ушорює питаня од покраїнскей значносци у здравстве и здравственим осиґураню и унапредзує защиту здравя, здравствену и фармацеутну службу на териториї АП Войводини; утвердзує мири за обезпечованє и запровадзованє здравственей защити од интереса за гражданох на териториї АП Войводини, як и мири за обезпечованє и запровадзованє дїялносци у обласци явного здравя од интереса за гражданох АП Войводини; приноши окремни програми здравственей защити за дзепоєдни катеґориї жительства, односно файти хоротох хтори специфични за АП Войводину, а за нїх нє принєшена окремна програма здравственей защити на републичним уровню; приноши окремну програму з обласци явного здравя за територию АП Войводини; снує здравствени установи (общи шпиталї, специялни шпиталї, клинїки, институти, Клинїчни центер, Завод односно Институт за явне здравє, Завод за трансфузию креви и Завод за антирабичну защиту) и окончує сновательни права над нїма; предклада план мрежи здравствених установох за територию АП Войводини; дава думанє о утаргованю, злучованю и подзелєню здравствених установох чий снователь АП Войводина; утвердзує тижньови розпорядок роботи, початок и законченє роботного часу у здравственей установи чий є снователь; утвердзує тижньови розпорядок роботи, початок и законченє роботного часу здравствених установох и приватней пракси на териториї АП Войводини под час тирваня епидемиї и одстраньованя пошлїдкох яки спричинєли елементарни и други векши нєпогоди и позарядово обставини на териториї АП Войводини; утвердзує минимум процесу роботи под час тирваня штрайку здравствених установох на териториї АП Войводини; снує Здравствени совит Войводини и Етични одбор Войводини; предклада директора Покраїнского заводу за здравствене осиґуранє и приноши мири за обезпечованє и запровадзованє дїялносци у обласци явного здравя од интереса за гражданох АП Войводини.

Покраїнски секретарият за здравство, социялну политику и демоґрафию окончує вивершни, фахово и розвойни роботи покраїнскей управи, окончує надпатрунок и провадзи запровадзованє предписаньох зоз пасуса 1. того члена. У обласци зоз свойого дїлокругу, провадзи и помага у роботи здравственим установом чийо снователє орґани АП Войводини.

Покраїнски секретарият за здравство, социялну политику и демоґрафию: дава предкладанє министрови цо компетентни за роботи здравя за утвердзованє числа приправнїкох у здравствених установох зоз шедзиском на териториї АП Войводини хторих здравствени установи длужни прияц за окончованє приправнїцкого стажу на рочним уровню; дава предкладанє министрови цо компетентни за роботи здравя за План розвою кадрох у здравстве за установи хтори на териториї АП Войводини; дава предкладанє министрови цо компетентни за роботи здравя за утвердзованє референтних здравствених установох за дзепоєдни обласци здравственей дїялносци на териториї АП Войводини; дава думанє на предкладанє за доставанє назви примариюс за докторох медицини, докторох стоматолоґиї и дипломованих фармацеутох зоз териториї АП Войводини.

Покраїнски секретарият за здравство, социялну политику и демоґрафию сотрудзує з гуманитарнима и фаховима орґанизациями, союзами и здруженями у обласци здравства, формує бази податкох з обласци здравства, провадзи роботу здравственей служби на териториї АП Войводини.

Покраїнски секретарият за здравство, социялну политику и демоґрафию, у обласци санитарного надпатрунку, у складзе зоз законом, окончує зверени роботи державней управи, хтори зоз законом зверени орґаном АП Войводини. Приноши ришенє о одредзованю зонох санитарней защити жридлох на териториї АП Войводини.

Покраїнски секретарият за здравство, социялну политику и демоґрафию, у складзе зоз законом и Статутом, окончує роботи покраїнскей управи у обласци социялней защити, защити фамелиї и дзецох, ваготних женох, мацерох на положнїцким одсустве, самохраних родичох зоз дзецми, младежи, одроснутих и старих, правней защити фамелиї и старательства, пензийного осиґураня, борецкей и инвалидней защити и цивилних инвалидох войни, хтори ше одноша на пририхтованє актох за Скупштину або Покраїнску владу зоз хторима ше: ушорює питаня од покраїнскей значносци у социялней защити фамелиї, дзецох, младежи, одроснутих и старих, у складзе зоз законом; ушорює, у складзе з материялнима можлївосцами, вигоднєйши условия за витворенє социялней защити кед секретарият пред тим у буджету за тото обезпечел средства; утвердзує и обезпечує висши ступень защити фамелиї, правох дзецох, ваготних женох, мацерох на положнїцким одсустве и самохраних родичох зоз дзецми, у складзе з Програму демоґрафского розвою АП Войводини зоз мирами за єй запровадзованє; снує установи социялней защити на териториї АП Войводини у складзе зоз законом и актом Покраїнскей влади и окончує сновательни права над нїма; снує Покраїнски завод за социялну защиту; дава согласносц на пременку дїялносци и на статусни пременки установох социялней защити чий є снователь; дава согласносц на статут и акт о орґанизациї и систематизациї роботох установох социялней защити чий є снователь; приноши Програму за унапредзенє социялней защити; приноши Програму демоґрафского розвою АП Войводини зоз мирами за єй запровадзованє; дава думанє на предлог одлуки о мрежи установох социялней защити хтори даваю услуги змесценя у домох, социялно-здравствених установох и центрох за фамелийне змесценє и усвоєнє хтори снує Република Сербия, односно автономна покраїна, хтору утвердзує Влада Републики Сербиї, у часци хтора ше одноши на мрежу установох на териториї АП Войводини; дава согласносц на менованє директорох и окончовательох длужносци директорох центрох за социялну роботу на териториї АП Войводини; предклада директора Покраїнского фонду за пензийне и инвалидне осиґуранє.

Покраїнски секретарият за здравство, социялну политику и демоґрафию окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох зоз пасуса 6. того члена. У обласцох зоз свойого дїлокругу, провадзи, надпатра и помага у роботи установом, фондом и явним службом чий снователь АП Войводина и сотрудзує з орґанизациями и здруженями гражданох.

Покраїнски секретарият за здравство, социялну политику и демоґрафию провадзи применьованє конвенцийох хтори ше одноша на защиту дзецох, планованє фамелиї; обезпечує средства за реализацию Програми унапредзеня социялней защити у автономней покраїни, защити фамелиї, самохраних родичох зоз дзецми, за реализацию програмох и активносцох инвалидних, социялно-гуманитарних орґанизацийох и здруженьох гражданох зоз хторима ше доприноши унапредзеню социялно-економского и дружтвеного положеня, регабилитациї и социялизациї инвалидох и других особох у стану социялней потреби, обезпечує средства за реализацию програмох роботи установох чий є снователь, окрем установох за змесценє у домох и обезпечує средства за реализацию иновацийних услугох и услугох социялней защити од окремней значносци за автономну покраїну.

Покраїнски секретарият за здравство, социялну политику и демоґрафию утвердзує сполньованє условийох за початок роботи и окончованє дїялносци установох социялней защити за змесценє хасновательох.

Покраїнски секретарият за здравство, социялну политику и демоґрафию провадзи стан и предклада мири у обласци обезпечованя социялней сиґурносци вибеженцох, вигнаних и розселєних особох; провадзи запровадзованє Програми демоґрафского розвою АП Войводини; поднїма активносци на планованю фамелиї и предклада мири за стимулованє народзеня дзецох у АП Войводини.

Покраїнски секретарият за здравство, социялну политику и демоґрафию, у обласци социялней защити, правней защити фамелиї и старательства, дружтвеного стараня о дзецох, борецкей и инвалидней защити, защити цивилних инвалидох войни, у складзе зоз законом, окончує зверени роботи державней управи хтори зоз законом зверени орґаном АП Войводини.

Покраїнски секретарият за здравство, социялну политику и демоґрафию окончує и други роботи кед му таке зверене зоз законом, покраїнску скупштинску одлуку або з другим предписаньом.

Покраїнски секретарият за здравство, социялну политику и демоґрафию ришує по жалби процив ришеня инспектора социялней защити.

Покраїнски секретарият за финансиї

Член 36.

Покраїнски секретарият за финансиї, у складзе зоз законом и Статутом, окончує роботи покраїнскей управи у обласци финансийох и економиї, як и роботи буджету и трезору, у складзе зоз законом.

Покраїнски секретарият за финансиї, у складзе зоз законом и Статутом, обезпечує средства за финансованє капиталних проєктох од значносци за Автономну Покраїну Войводину.

Покраїнски секретарият за финансиї: окончує роботи фискалней и макроекономскей анализи; провадзи систему явних приходох и явних розходох як и законску реґулативу зоз хтору вони уведзени и по потреби порушує инициятиву за їх вименку; провадзи наплацованє явних приходох на териториї Автономней Покраїни Войводини и анализує фискални потенциял општинох и городох и о тим информує Покраїнску владу; провадзи и анализує положенє реґиону на основи економских и других указательох, сотрудзує з компетентнима републичнима, покраїнскима, општинскима и городскима орґанами, орґанизациями, установами и институциями пре реализацию ровномирного реґионалного розвою; участвує у медзиреґионалним сотруднїцтве и сотрудзує з одвитуюцима териториялнима заєднїцами других державох пре прицагованє странских инвестицийох, доставанє донацийох и других формох розвойней помоци и ускладзує активносци пре успишне хаснованє средствох зоз предприступних, структурних и когезийних фондох Европскей униї у Автономней Покраїни Войводини.

Покраїнски секретарият за финансиї надпатра применьованє одредбох Закона о явней власносци и на основи нього принєшених подзаконских предписаньох о прибавяню, хаснованю, управяню и розполаганю зоз стварами у власносци Автономней Покраїни Войводини.

Покраїнски секретарият за финансиї окончує буджетну инспекцийну контролу законїтого и наменкового трошеня средствох буджету Автономней Покраїни Войводини; окончує контролу применьованя законох у обласци материялно-финансийного дїлованя и наменкового и законїтого хаснованя средствох хасновательох буджетних средствох, орґанизацийох, подприємствох, правних особох и других субєктох хтори одредзени зоз законом цо ушорює буджетну систему. Покраїнски секретарият за финансиї пририхтує акти за Скупштину и Покраїнску владу у рамикох своєй компетенциї и окончує и други роботи хтори одредзени зоз законом, Статутом и другима предписанями.

Покраїнски секретарият за образованє, предписаня, управу и национални меншини – национални заєднїци

Член 37.

Покраїнски секретарият за образованє, предписаня, управу и национални меншини – национални заєднїци, у складзе зоз законом и Статутом, окончує роботи покраїнскей управи у обласци предшколского, основного и штреднього образованя и воспитаня, школярского стандарду, нєформалного образованя одроснутих и образованя националних меншинох - националних заєднїцох, хтори ше одноша на пририхтованє актох за Скупштину або Покраїнску владу зоз хторима ше: ушорює питаня од покраїнскей значносци у обласци предшколского, основного и штреднього образованя и воспитаня; снує установи предшколского, основного и штреднього образованя и воспитаня на териториї АП Войводини и окончує сновательни права над нїма; ушорює питаня од покраїнскей значносци у обласци школярского стандарду; утвердзує способ и поступок розподзельованя местох у домох; блїжей ушорює питаня од покраїнскей значносци цо ше одноша на орґанизоване и институцийне образованє звонка школскей системи пре фахове оспособйованє и обуку одроснутих на териториї АП Войводини; ушорює питаня од покраїнскей значносци у обезпечованю витворйованя права припаднїкох националних меншинох - националних заєднїцох на териториї АП Войводини на образованє на мацеринским язику на уровню предшколского, основного и штреднього образованя и воспитаня.

Покраїнски секретарият за образованє, предписаня, управу и национални меншини – национални заєднїци окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох зоз пасуса 1. того члена. У обласци образованя, провадзи, надпатра и помага у роботи установом на териториї АП Войводини.

Покраїнски секретарият за образованє, предписаня, управу и национални меншини – национални заєднїци, у обласци предшколского, основного и штреднього образованя и воспитаня: сотрудзує зоз министерством цо компетентне за роботи образованя у поступку формованя школскей управи; спорозумно зоз компетентним министром одобрує учебнїки и наставни средства за дзепоєдни предмети од интереса за национални меншини - национални заєднїци; спорозумно зоз компетентним министром приноши наставни плани и програми зоз дзепоєдних предметох од интереса за национални меншини - национални заєднїци и утвердзує условия и способ орґанизованя настави на язикох националних меншинох - националних заєднїцох; одобрує учебнїки и наставни средства за язики националних меншинох - националних заєднїцох; дава думанє у поступку приношеня наставних планох и програмох и приноши наставни програми за язики националних меншинох - националних заєднїцох.

Покраїнски секретарият за образованє, предписаня, управу и национални меншини – национални заєднїци, у складзе зоз законом, окончує роботи покраїнскей управи хтори ше одноша на пририхтованє актох за Скупштину або Покраїнску владу зоз хторима ше: ушорює орґанизацию и роботу покраїнскей управи; блїжей ушорює змист и випатрунок печацох орґанох АП Войводини, орґанох єдинкох локалней самоуправи и маюцих явних овласценьох чийо шедзиско на териториї АП Войводини; доприноши розвою интеркултурализма, афирмациї мултикултурализма, толеранциї и соживота националних меншинох – националних заєднїцох хтори жию на териториї АП Войводини; стара ше о витворйованю правох у обласци людских правох и правох припаднїкох националних меншинох - националних заєднїцох и утвердзує додатни права припаднїкох националних меншинох - националних заєднїцох; обезпечує средства за финансованє, односно софинансованє националних совитох националних меншинох, здруженьох и орґанизацийох националних меншинох - националних заєднїцох, церквох и вирских заєднїцох, як и унапредзеня витворйованя правох припаднїкох националних меншинох - националних заєднїцох зоз териториї АП Войводини; ушорює хаснованє назви АП Войводини у назвох здруженьох; ушорює и запровадзує преверйованє знаня язикох хтори ше хаснує у роботи орґанох и орґанизацийох покраїнскей управи. Покраїнски секретарият за образованє, предписаня, управу и национални меншини – национални заєднїци пририхтує и гевти акти чий виробок нє у дїлокругу других покраїнских орґанох управи.

Покраїнски секретарият за образованє, предписаня, управу и национални меншини – национални заєднїци провадзи усоглашеносц предписаньох и общих актох у правней системи у поступку їх приношеня и стара ше о їх нормативно-технїчней и язичней исправносци (лекторованє).

Покраїнски секретарият за образованє, предписаня, управу и национални меншини – национални заєднїци видаватель «Службених новинох Автономней Покраїни Войводини» и стара ше о обявйованю предписаньох и других актох Скупштини, Покраїнскей влади, покраїнских орґанох управи и других орґанох и орґанизацийох.

Покраїнски секретарият за образованє, предписаня, управу и национални меншини – национални заєднїци обезпечує, у складзе з потребами покраїнских и других орґанох, писане и усне прекладанє зоз сербского язика на язики националних меншинох - националних заєднїцох и процивно, як и прекладанє з других язикох на сербски язик и процивно.

Покраїнски секретарият за образованє, предписаня, управу и национални меншини – национални заєднїци провадзи и спатра стан у обласци вирох, церквох и вирских заєднїцох, витворює сотруднїцтво з нїма и поднїма мири хтори помагаю їх дїялносц яку окончую у явним интересу, у складзе зоз законом.

Покраїнски секретарият за образованє, предписаня, управу и национални меншини – национални заєднїци провадзи, аналитично спатра стан у обласци защити и витворйованя людских правох и правох националних меншинох – националних заєднїцох и предклада поднїманє мирох у тей обласци.

Покраїнски секретарият за образованє, предписаня, управу и национални меншини – национални заєднїци у обласци службеного хаснованя язикох и писмох, правосудного испиту, державного фахового испиту, судских толмачох, експроприяциї и печацох, у складзе зоз законом, окончує роботи державней управи, хтори зоз законом зверени орґаном АП Войводини.

Покраїнски секретарият за образованє, предписаня, управу и национални меншини – национални заєднїци пририхтує акти за Скупштину и Покраїнску владу у обласцох зоз свойого дїлокругу, кед є за таке овласцени з окремним предписаньом.

Покраїнски секретарият за образованє, предписаня, управу и национални меншини – национални заєднїци окончує и други роботи кед му таке зоз законом, покраїнску скупштинску одлуку або з другим предписаньом зверене.

Покраїнски секретарият за медзиреґионалне сотруднїцтво и локалну самоуправу

Член 38.

Покраїнски секретарият за медзиреґионалне сотруднїцтво и локалну самоуправу, у складзе зоз законом, Статутом и у рамикох вонкашнєй политики Републики Сербиї, окончує роботи покраїнскей управи хтори ше одноша на: медзиреґионалне сотруднїцтво и отримованє одношеньох АП Войводини з одвитуюцима териториялнима заєднїцами других державох; иницированє и отримованє членства у европских и шветових здруженьох реґионох; пририхтованє, заключованє и провадзенє запровадзованя спорозуменьох з одвитуюцима териториялнима заєднїцами других державох; пририхтованє нащивох представительох териториялних заєднїцох и других формох автономиї других державох; пририхтованє участвованя представительох АП Войводини на конференцийох европских и шветових здруженьох реґионох; виробок, призберованє, чуванє и обявйованє информацийох о сотруднїцтве з одвитуюцима териториялнима заєднїцами других державох; пририхтованє звитох и информацийох и предкладанє програмох и планох розвою зоз свойого дїлокругу; координованє активносцох шицких покраїнских орґанох управи у процесу програмованя инструментох Европскей униї; творенє условийох за реализацию проєктох хтори ше финансує зоз фондох Европскей униї, донацийох, и других формох розвойней помоци; участвованє у пририхтованю и запровадзованю макрореґионалних стратеґийох; участвованє у формованю окремних єдинкох у рамикох дипломатично-конзуларних представительствох Републики Сербиї, у складзе зоз законом, хтори буду представяц и унапредзовац привредни, образовни и туристични капацитети АП Войводини; провадзенє витворйованя дипломатичних и конзуларних активносцох на териториї АП Войводини; учасц у стараню о ровномирним розвою на териториї АП Войводини, у складзе зоз законом.

Покраїнски секретарият за медзиреґионалне сотруднїцтво и локалну самоуправу, у складзе зоз законом и Статутом, окончує роботи покраїнскей управи у обласци локалней самоуправи хтори ше одноша на: пририхтованє предлогох актох за Покраїнску владу зоз хторима ше Влади Републики Сербиї предклада розпущиц скупштину єдинки локалней самоуправи на териториї АП Войводини; пририхованє звитох и информацийох за Покраїнску владу и Скупштину и предкладанє програмох и планох розвою з дїлокругу секретарияту; даванє предходней согласносци скупштини єдинки локалней самоуправи на териториї АП Войводини, при утвердзованю шветох и одлучованю о назвох улїцох, площох, городских квартох, валалчикох и других часцох населєних местох на териториї єдинки локалней самоуправи; унапрямованє и потримовку єдинком локалней самоуправи и месней самоуправи у обезпечованю законїтосци и ефикасносци роботи; ускладзованє и стимулованє сотруднїцтва АП Войводини и єдинкох локалней самоуправи на єй териториї у обласци вибудови ефикасней и сучасней локалней самоуправи; предкладанє и потримованє мирох у обласци вибудови системи локалней самоуправи, медзиопштинского повязованя, виєдначованя капацитетох и модернизациї роботи локалней администрациї; провадзенє витворйованя месней самоуправи у єдинкох локалней самоуправи у Войводини, як и других формох нєпоштредного участвованя гражданох у приношеню одлукох на локалним уровню; даванє фахових правних и совитодавних думаньох у вязи з применованьом законох и других предписаньох хтори маю нєпоштредни уплїв на розвой и витворйованє локалней самоуправи и на роботу орґанох єдинкох локалней самоуправи; порушованє поступкох за оцену уставносци и законїтосци статута або других общих актох єдинкох локалней самоуправи, кед секретарият трима же тото предписанє нє у согласносци зоз покраїнским предписаньом; контролу усоглашеносци общих актох орґанох єдинки локалней самоуправи зоз єй статутом, поднїманє мирох и даванє фаховей помоци у єй запровадзованю; контролу усоглашеносци поєдинєчного акту процив якого нє обезпечена судска защита, зоз законом або общим актом єдинки локалней самоуправи и поднїманє одвитуюцих мирох; провадзенє применьованя предписаньох о нєпоштредним участвованю гражданох у витворйованю локалней самоуправи; провадзенє поступкох и процедурох при запровадзованю локалних виберанкох.

Покраїнски секретарият за медзиреґионалне сотруднїцтво и локалну самоуправу окончує и други роботи кед му таке зоз законом, покраїнску скупштинску одлуку або з другим предписаньом зверене.

Покраїнски секретарият за урбанизем, будовательство и защиту животного штредку

Член 39.

Покраїнски секретарият за урбанизем, будовательство и защиту животного штредку, у складзе зоз законом и Статутом, окончує роботи покраїнскей управи у обласци просторного и урбанистичного планованя и вибудови обєктох хтори ше одноша на пририхтованє актох за Скупштину або Покраїнску владу, зоз хторима ше: вирабя, приноши и запровадзує документи просторного розвою АП Войводини; вирабя, приноши и запровадзує реґионални просторни плани и просторни плани окремней наменки; предклада мири и активносци Програми имплементациї Просторного плану Републики Сербиї за територию АП Войводини, реґионалних просторних планох и просторних планох подручох окремней наменки и провадзи їх запровадзованє; снує и окончує сновательни права явного подприємства за просторне и урбанистичне планованє и проєктованє.

Покраїнски секретарият за урбанизем, будовательство и защиту животного штредку окончує вивершни, фахово и розвойни роботи покраїнскей управи, окончує надпатрунок и провадзи запровадзованє предписаньох зоз пасуса 1. того члена. У обласцох зоз свойого дїлокругу, провадзи, надпатра и помага у роботи явним подприємством и явним службом чий снователь АП Войводина.

Покраїнски секретарият за урбанизем, будовательство и защиту животного штредку дава фахову помоц и обезпечує средства за финансованє, односно софинансованє локалним самоуправом на виробку просторней и урбанистичней документациї, технїчней документациї за обєкти инфраструктури, проєктох фаховних и нєвладових орґанизацийох з обласци просторного планованя, урбанизма, архитектури и будовательства; окончує фахову контролу и явни увид до реґионалних просторних планох и просторних планох окремней наменки за подруча на териториї АП Войводини; дава предходну согласносц и согласносц у поступку виробку и приношеня просторних и урбанистичних планох єдинкох локалней самоуправи з териториї АП Войводини и предклада трецину членох комисиї за фахову контролу просторних и урбанистичних планох у єдинки локалней самоуправи; участвує у окончованю фаховей контроли технїчней документациї обєктох за хтори видава дозволу за вибудов у складзе зоз законом; провадзи розвой комуналней инфраструктури и комуналней дїялносци на териториї АП Войводини; участвує у роботи комисийох и роботних целох хтори формує министер цо компетентни за роботи урбанизма и будовательства и дава думанє на статут и общи акти Републичней аґенциї за просторне планованє и Инженєрскей комори Сербиї.

Покраїнски секретарият за урбанизем, будовательство и защиту животного штредку, у обласци просторного и урбанистичного планованя, вибудови обєктох и биваня, у складзе зоз законом, окончує роботи державней управи, хтори зоз законом зверени орґаном АП Войводини.

Покраїнски секретарият за урбанизем, будовательство и защиту животного штредку, у складзе зоз законом и Статутом, окончує роботи покраїнскей управи у обласци защити животного штредку, хтори ше одноша на пририхтованє актох за Скупштину або Покраїнску владу зоз хторима ше: природне добро кладзе под защиту; приноши програму защити животного штредку за територию АП Войводини; приноши програму мониторинґу, екстерни план защити од нєщесцох и плани и програми управяня з природнима ресурсами и добрами; снує буджетни фонд; снує и окончує сновательни права Покраїнского заводу за защиту природи; преглашує стан загроженосци животного штредку на териториї АП Войводини.

Покраїнски секретарият за урбанизем, будовательство и защиту животного штредку окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох зоз пасуса 5. того члена. У обласцох зоз свойого дїлокругу, провадзи, надпатра и помага у роботи явним подприємством, установом и явним службом чий снователь АП Войводина.

Покраїнски секретарият за урбанизем, будовательство и защиту животного штредку: контролує хаснованє и защиту природних ресурсох и доброх на териториї АП Войводини; обезпечує континуовану контролу и провадзенє стану животного штредку (мониторинґ); дава условия за обезпеченє мирох и условийох защити животного штредку, на вимаганє орґана цо компетентни за пририхтованє и приношенє просторних и урбанистичних планох, а на основи условийох и думаня компетентних фахових орґанизацийох; участвує у поступку пририхтованя и приношеня просторних, урбанистичних и других планох (плани ушореня и основи хаснованя польопривредней жеми, лєсово, водопривредни, ловнопривредни основи и програми унапредзеня рибарства на рибарских подручох и други плани).

Покраїнски секретарият за урбанизем, будовательство и защиту животного штредку у обласци унапредзеня животного штредку, рибарства и управяня зоз рибовим фондом у риболовних водох, у складзе зоз законом, окончує зверени роботи державней управи, хтори зоз законом зверени орґаном АП Войводини. Покраїнски секретарият за урбанизем, будовательство и защиту животного штредку окончує и други роботи кед му таке зоз законом, покраїнску скупштинску одлуку або з другим предписаньом зверене.

Покраїнски секретарият за науку и технолоґийни розвой

Член 40.

Покраїнски секретарият за науку и технолоґийни розвой, у складзе зоз законами з якима ше дефинує тоти обласци и Статутом, окончує роботи покраїнскей управи у обласци науки, технолоґийного розвою и високого образованя и студентского стандарду, хтори ше одноша на пририхтованє актох за Скупштину або Покраїнску владу, зоз хторима ше: снує, односно соснує и окончує сновательни права наукових институтох и виглєдовацко-розвойних центрох; ушорює питаня од покраїнскей значносци у високим образованю; предклада члена Националного совиту за високе образованє; ушорює питаня од покраїнскей значносци у обласци студентского стандарду.

Покраїнски секретарият за науку и технолоґийни розвой, у складзе зоз Програму од общого интереса за Републику Сербию, окончує роботи покраїнскей управи у вязи зоз: ришованьом квартельного питаня младих, наставних и наукових роботнїкох; стимулованьом медзинародного сотруднїцтва и иновацийней дїялносци; обезпечованьом финансийних средствох за софинансованє окремних програмох иновацийней дїялносци и инфраструктури на териториї АП Войводини; софинансованьом програмох Конарчка Сербскей академиї наукох и уметносцох у Новим Садзе, Матици сербскей, Матици словацкей и других установох хтори окончую наукововиглєдовацку дїялносц, а значни су за АП Войводину; обезпечованьом средствох за софинансованє програмох основних виглєдованьох и програмох виглєдованьох у обласци технолоґийного розвою у АП Войводини, за софинансованє участвованя наукововиглєдовацких роботнїкох и студентох на наукових сходох и усовершованьох у иножемстве и за орґанизацию наукових сходох на териториї АП Войводини.

Покраїнски секретарият за науку и технолоґийни розвой окончує вивершни, фахово и розвойни роботи покраїнскей управи у обласцох зоз свойого дїлокругу и провадзи, надпатра и помага у роботи установом и явним службом чий снователь АП Войводина.

Покраїнски секретарият за науку и технолоґийни розвой у обласци високого образованя и студентского стандарду, у складзе зоз законом, окончує роботи державней управи, хтори зоз законом зверени орґаном АП Войводини.

Покраїнски секретарият за науку и технолоґийни розвой окончує и други роботи кед му таке зоз законом, покраїнску скупштинску одлуку або з другим предписаньом зверене.

Покраїнски секретарият за енерґетику и минерални сировини

Член 41.

Покраїнски секретарият за енерґетику и минерални сировини, у складзе зоз законом и Статутом, окончує роботи покраїнскей управи у обласци енерґетики, рационалного хаснованя енерґиї и цивоводного транспорту ґазовитих и чечних угльоводонїкох и дистрибуцию ґазовитих угльоводонїкох, як и роботи у обласци ґеолоґиї и рударства, хтори ше одноша на вивершованє законох, як и на пририхтованє актох за Скупштину або Покраїнску владу.

Покраїнски секретарият за енерґетику и минерални сировини окончує вивершни, фахово и розвойни роботи покраїнскей управи и надпатра запровадзованє предписаньох зоз пасуса 1. того члена.

Покраїнски секретарият за енерґетику и минерални сировини провадзи стан у секторе енерґетики и минералних сировинох: провадзи сиґурносц подмирйованя з енерґию и енерґентами; розвой и применьованє шицких формох примарней и секундарней енерґиї; инвестицийни и розвойно-виглєдовацки програми у обласци угля, нафти, дериватох нафти и биогорива, природного ґазу, цеплотней и електричней енерґиї, ґеотермалних и минералних водох и шицких формох обновююцих жридлох енерґиї; енерґетску ефикасносц и рационалне хаснованє енерґиї; чечуцу политику розвою енерґетики и минералних сировинох и функционованє енерґетскей системи, продукциї и трошеня шицких формох енерґиї. Покраїнски секретарият за енерґетику и минерални сировини софинансує проєкти у обласци енерґетики, окреме тоти хтори ше одноша на применьованє обновююцих жридлох енерґиї и енерґетскей ефикасносци, як и проєкти у обласци хаснованя минералних сировинох на подручу покраїни; информує и едукує зоз свойого дїлокругу з орґанизованьом схадзкох, конференцийох и саямских манифестацийох; сотрудзує з потенциялнима инвеститорами и институциями зоз свойого дїлокругу.

Покраїнски секретарият за енерґетику и минерални сировини у обласци енерґетики, за територию автономней покраїни: вирабя Предлог часци Програми витворйованя Стратеґиї за розвой енерґетики; вимага од енерґетских и других субєктох податки за виробок енерґетского билансу; планує потреби за енерґию у планох розвою, як и условия и способ обезпечованя нєобходних енерґетских капацитетох; запровадзує Акцийни план за енерґетску ефикасносц, у рамикох своїх компетенцийох; утвердзує окремни финансийни и други стимулациї за реализацию активносцох за ефикасне хаснованє енерґиї на своєй териториї.

Покраїнски секретарият за енерґетику и минерални сировини у обласци ґеолоґиї и рударства, за територию автономней покраїни: предклада часц Програми за витворйованє Стратеґиї управяня зоз минералнима ресурсами и часц Длугорочней програми розвою основних ґеолоґийних виглєдованьох; приноши и запровадзує Рочну програму основних ґеолоґийних виглєдованьох; водзи евиденцию о одобрених виглєдованьох и катастер одобрених виглєдовацких просторох; розпатра и евидентує утвердзени ресурси и резерви минералних сировинох и под’жемних водох, як и утвердзени потенцияли ґеотермалних ресурсох; з ришеньом видава потвердзенє о ресурсох и резервох минералних сировинох и под’жемних водох, односно утвердзеним потенциялу ґеотермалних ресурсох, як и одобреня за виводзенє рударских роботох и одобренє за хаснованє рударского обєкту (хасновательну дозволу); приноши ришеня: о утаргованю и о преставаню одобреня за експлоатацию резервох минералних сировинох и ґеотермалних ресурсох, як и о одобреню за пущанє обєктох до пробней роботи; вирабя биланси ресурсох и резервох минералних сировинох, под’жемних водох и ґеотермалних ресурсох; формує комисию кед придзе до подполного и тирвацого застановйованя експлоатациї хтора випитує причини застановйованя роботох, пошлїдки того застановйованя и предклада одредзени мири; дава согласносц на програму мирох хтору приноши компетентни орґан єдинки локалней самоуправи за хаснованє средствох од надополнєньох за хаснованє минералних сировинох и ґеотермалних ресурсох; водзи катастри виглєдовацких и експлоатацийних польох, активних и санированих рударских обєктох, лєжискох и билансох минералних сировинох и ґеотермалних ресурсох, польох рударского одпаду, як и напущених рудокопох и рударских обєктох; водзи кнїжку документох и евиденцию привредних субєктох хторим видате одобренє за виводзенє ґеолоґийних виглєдованьох и експлоатацию.

Покраїнски секретарият за енерґетику и минерални сировини, за територию автономней покраїни: форумує комисиї и орґанизує покладанє фахового испиту пре окончованє роботох технїчного руководзеня, рукованя и отримованя: нафтоводу и нукашнїх ґазових инсталацийох; у обєктох за транспорт и дистрибуцию природного ґазу; у обєктох за продукцию, преношенє и дистрибуцию електричней енерґиї; окончує инспекцийни надпатрунок прейґ електроенерґетских инспекторох и инспекторох опреми под прициском; окончує и финансує основни ґеолоґийни виглєдованя; формує комисию и орґанизує покладанє фахового испиту за окончованє роботох у обласци ґеолоґийних виглєдованьох и рударства; з ришеньом видава одобренє за: применєни ґеолоґийни виглєдованя; експлоатацию резервох минералних сировинох и ґеотермалних ресурсох; виводзенє рударских роботох; хаснованє рударских обєктох; окончує инспекцийни надпатрунок прейґ ґеолоґийних и рударских инспекторох.

Покраїнски секретарият за енерґетику и минерални сировини окончує и други роботи кед му таке зоз законом, покраїнску скупштинску одлуку або з другим предписаньом зверене.

Покраїнски секретарият за спорт и младеж

Член 42.

Покраїнски секретарият за спорт и младеж, у складзе зоз законом и Статутом, окончує роботи покраїнскей управи у обласци спорта и младежи, хтори ше одноша на пририхтованє актох за Скупштину або Покраїнску владу зоз хторима ше: ушорює питаня од покраїнскей значносци у спорту, физичней култури и у обласцох у вязи з интересом младих. У обласци спорта: обезпечує витворйованє потребох и интересох гражданох у обласци спорта яки утвердзени зоз законом; утвердзує спортски обєкти и програми медзинародних спортских змаганьох хтори значни за АП Войводину, снує и окончує сновательни права орґанизацийох за окончованє спортских дїялносцох од интереса за АП Войводину; блїжей ушорює условия за окончованє спортских дїялносцох орґанизацийох у обласци спорта и хаснованя явних спортских теренох; утвердзує прейґ хторих ше покраїнских спортских союзох задоволює потреби и интереси гражданох на териториї АП Войводини, кед у єдним спортским конаре реґистровани вецей покраїнски конарски спортски союзи и утвердзує хтори спортски конари окреме значни за АП Войводину; водзи евиденциї у обласци спорта; утвердзує виполнєнє условийох за орґанизованє спортских програмох и обезпечує условия за роботу, односно окончованє дїялносци Покраїнского заводу за спорт и медицину спорта и других орґанизацийох у обласци спорта.

Покраїнски секретарият за спорт и младеж окончує вивершни, фахово и розвойни роботи покраїнскей управи и окончує инспекцийни надпатрунок над запровадзованьом предписаньох з обласци спорта. У обласцох зоз свойого дїлокругу, провадзи, надпатра и помага у роботи установом и явним службом чий снователь АП Войводина.

Покраїнски секретарият за спорт и младеж провадзи и потримує роботу здруженьох младих и за младих, союзох, як и локалних канцеларийох за младих; снує Совит за младих АПВ и координує його роботу, у складзе зоз законом; пририхтує програми и предклада мири за унапредзенє положеня младих, у складзе з Акцийним планом политики за младих; потримує проєкти з обласцох хтори значни за младих; предклада установйованє наградох з обласци спорта и младежи, наградзує спортистох за витворени спортски резултати, додзелює стипендиї перспективним спортистом и наградзує талантовани и успишни дзеци и младеж у АП Войводини и континуовано потримує їх розвой.

Покраїнски секретарият за спорт и младеж у обласци спорта, у складзе зоз законом, окончує зверени роботи державней управи, хтори зоз законом зверени орґаном АП Войводини.

Покраїнски секретарият за спорт и младеж окончує други роботи кед му таке зоз законом, покраїнску скупштинску одлуку або з другим предписаньом зверене.

Покраїнски секретарият за привреду, обезпечованє роботи и ровноправносц полох

Член 43.

Покраїнски секретарият за привреду, обезпечованє роботи и ровноправносц полох, у складзе зоз законом и Статутом, окончує роботи покраїнскей управи у обласци привредного и реґионалного розвою, туризма, погосцительства, купельох и лїчилїщох, индустриї и ремеселства, драгового, ричного и гайзибанского транспорту, розвою лоґистики и интермодалного транспорту, державних драгох II шора на териториї АП Войводини, безпечносци транспорту на драгох, електронских комуникацийох, саймох и других привредних манифестацийох, хтори ше одноша на пририхтованє актох за Скупштину або Покраїнску владу зоз хторима ше: ушорює и обезпечує ровномирни реґионални розвой у обласци привреди; снує и окончує сновательни права орґанизацийох хтори запровадзую ровномирни реґионални розвой у обласци привреди; утвердзує и приноши стратеґийни и други документи реґионалного розвою у обласци привреди; ушорює питаня од покраїнскей значносци у обласци туризма; ушорює планованє и розвой туризма; утвердзує и приноши стратеґию розвою туризма; предклада преглашенє туристичного простору на териториї АП Войводини; предклада члена Комисиї за катеґоризацию туристичних местох; предклада снованє и окончує сновательни права орґанизацийох за унапредзенє и розвой туризма; ушорює хаснованє минералних и термалних водох, балнеолоґийних и климатских ресурсох; ушорює питаня од покраїнскей значносци у обласци индустриї; утвердзує план и програму ровномирного привредного розвою; утвердзує стари ремесла хтори характеристични за подруче АП Войводини, як и мири за їх унапредзенє и розвой; ушорює питаня од покраїнскей значносци у драговим, ричним и гайзибанским траспорту, у розвою лоґистики и интермодалного транспорту, безпечносци транспорту на драгох; ушорює питаня од покраїнскей значносци у обласци електронских комуникацийох и ушорює планованє и розвой електронских комуникацийох и информацийного дружтва на териториї АП Войводини; ушорює и обезпечує способ управяня, защити, отримованя державних драгох II шора на териториї АП Войводини, у складзе зоз законом; ушорює и обезпечує нукашню плївбу на державних водних драгох на териториї АП Войводини; ушорює сайми и други привредни манифестациї од покраїнскей значносци; ушорює снованє, катеґоризацию и способ роботи саямских центрох; утвердзує мрежу саямских и других привредних манифестацийох на териториї АП Войводини.

Покраїнски секретарият за привреду, обезпечованє роботи и ровноправносц полох провадзи запровадзованє програмох, мирох и активносцох за ровномирни реґионални розвой; предклада єдного члена тендерскей и аукцийней комисиї кед субєкт приватизациї з териториї АП Войводини; участвує у пририхтованю стратеґийних документох и акцийних планох з якима ше утвердзує начала, цилї и приоритети розвою електронских комуникацийох у Републики Сербиї; участвує у приношеню Плану наменки радио-фреквенцийних обсягох и Плану розподзельованя радио-фреквенцийох; участвує у утвердзованю способу хаснованя обсягу радио-фреквенцийох цо остал, а хтори наменєни за жемову диґиталну радиодифузию, як и у даваню широкопоясових сервисох (диґитална дивиденда).

Покраїнски секретарият за привреду, обезпечованє роботи и ровноправносц полох у обласци туризма, державних драгох, драгового, ричного и гайзибанского транспорту, защити авторских и зродних правох у продукциї и обтоку роби и електронских комуникацийох, у складзе зоз законом, окончує роботи державней управи хтори зоз законом зверени орґаном АП Войводини.

Покраїнски секретарият за привреду, обезпечованє роботи и ровноправносц полох окончує вивершни, фахово и розвойни роботи покраїнскей управи и окончує надпатрунок пре запровадзованє предписаньох у обласцох зоз свойого дїлокругу; провадзи роботу установох и явних службох чий снователь АП Войводина.

Покраїнски секретарият за привреду, обезпечованє роботи и ровноправносц полох, у складзе зоз законом и Статутом, окончує роботи покраїнскей управи у обласци роботи и обезпечованя роботи, хтори ше одноша на пририхтованє актох за Скупштину, Покраїнску владу; снує и окончує сновательни права фондох и других правних особох у тих обласцох; прави Предлог Плану активней политики обезпечованя роботи у Покраїни; пририхтує покраїнски акцийни плани за обезпечованє роботи; запровадзує мири активней политики обезпечованя роботи у Покраїни у складзе зоз законом, акцийним планом и стратеґию обезпечованя роботи у АП Войводини; провадзи пременьованє предписаньох и стратеґийних документох з обласци обезпечованя роботи, роботи, безпечносци и здравя на роботи; пририхтує акти о снованю орґанизацийох од интереса за АП Войводину у наведзених обласцох; дава правни думаня и упутства за применьованє законских предписаньох и других актох орґанизацийом, установом, институцийом и гражданом; провадзи стан и применьованє предписаньох у обласци безпечносци и здравя на роботи у покраїнских орґанох управи; предклада активносци и мири за ришованє проблемох у обласци безпечносци и здравя на роботи; провадзи стан и применьованє предписаньох у вязи з роботно-правним статусом особох з инвалидитетом; предклада активносци и мири за унапредзенє роботно-правного статуса особох з инвалидитетом; стимулує обезпечованє роботи особом з инвалидитетом и други катеґориї гражданох хтори чежше доставаю роботу; провадзи реализацию антидискриминацийней политики у обласци роботи и обезпечованя роботи; провадзи субвенционованє привредних субєктох у Покраїни и трансферу нїзшим орґаном власци у обласци обезпечованя роботи; пририхтує презентациї у жеми и иножемстве за представянє потенциялох Покраїни у обласци роботи и обезпечованя роботи; провадзи стан и рушаня на тарґовищу роботи у АП Войводини; провадзи применьованє ратификованих конвенцийох и препорукох Медзинародней орґанизациї роботи и прави звити о їх применьованю; сотрудзує з медзинароднима, реґионалнима и домашнїма орґанами, орґанизациями и здруженями у обласци обезпечованя роботи, роботи, безпечносци и здравя на роботи; координує роботу и дава потримовку у роботи Покраїнскому социялно-економскому совиту, Покраїнскому совиту за обезпечованє роботи, Покраїнскому совиту за безпечносц и защиту на роботи и другим роботним целом з обласци роботи и обезпечованя роботи, предклада директора Покраїнскей служби за обезпечованє роботи; стимулує розвой трипартитного социялного диялоґу у Покраїни, провадзи институцийни социялни диялоґ и важаци законски рамики; провадзи дїйствованє социялного партнерства у условийох кризи (нєудатни приватизациї, штрайки, найзагроженши привредни конари); з покраїнским социялно-екномским совитом и другима заинтересованима субєктами порушує инициятиви за вименки роботного законодавства и социялней политики; иницирує активносци за гармонизацию роботного и социялного законодавства з нормативно-институцийнима рамиками и праксу социялного диялоґу; поднїма активносци на дзвиганю капацитетох социялних партнерох (синдикатох и роботодавательох) за ровноправну учасц у социялним диялоґу; провадзи уплїв макроекономских елементох (привредни рушаня, тарґовище роботи, политику обезпечованя роботи) на функционованє социялного диялоґу у Покраїни; афирмує о предносци розвитого социялного диялоґу прейґ константного информованя явносци о актерох, змистох и инструментох социялного диялоґу; сотрудзує зоз синдикалнима орґанизациями, орґанизациями роботодавательох и здруженями; участвує у ришованю питаньох од значносци за витворйованє економских шлєбодох и правох занятих, материялного и социялного положеня роботодавательох и занятих; афирмує розвой култури прегваркох и стимулує мирне ришованє колективних роботних спорох; провадзи социялни диялоґ на локалним уровню и роботу мрежи совитох за обезпечованє роботи у Покраїни; провадзи умрежованя учашнїкох социялного диялоґу у Покраїни; провадзи заключованя колективних контрактох у Покраїни; провадзи одношенє явносци и медийох ґу социялному диялоґу.

Покраїнски секретарият за привреду, обезпечованє роботи и ровноправносц полох, у складзе зоз законом и Статутом, окончує роботи покраїнскей управи, хтори ше одноша на: пририхтованє аналитичних и других материялох у вязи з применьованьом предписаньох з обласци ровноправносци полох за Скупштину и Покраїнску владу; активносци за унапредзованє обласци ровноправносци полох у Покраїни; промоцию принципох єднаких можлївосцох за жени и хлопох; провадзенє стану и предкладанє мирох за унапредзенє положеня женох и витворйованє єднаких можлївосцох у Покраїни; провадзенє применьованя ратификованих конвенцийох и препорукох медзинародних орґанизацийох у тей обласци; витворйованє сотруднїцтва з нєвладовима орґанизациями, синдикатами и другима асоцияциями и медиями; предкладанє и запровадзованє мирох афирмативней акциї пре злєпшанє економского и дружтвеного положеня женох, окреме ранївих ґрупох женох, як и елиминацию насилства над женми и насилства у фамелиї; сотруднїцтво з републичнима и покраїнскима орґанами управи и орґанами єдинкох локалней самоуправи з обласци ровноправносци полох; активносци ґу интеґрованю принципох родней ровноправносци до шицких обласцох роботи покраїнских орґанох и даванє фаховей потримовки. Як зверену роботу, окончує ше надпатрунок над применьованьом Закона о ровноправносци полох на териториї АП Войводини.

У Покраїнским секретарияту за привреду, обезпечованє роботи и ровноправносц полох, окончує ше роботи покраїнскей управи хтори ше одноша на: имплементацию и применьованє стратеґийох за интеґрацию Ромох и реализацию акцийних планох на териториї Покраїни; координацию розличних проєктох за интеґрацию Ромох на териториї Покраїни; витворйованє координациї з ромскима совитами у Покраїни и з одвитуюцима орґанизациями и орґанами на медзинародним уровню; потримованє и унапредзенє женских и людских правох Ромох и Ромкиньох на териториї Покраїни; пририхтованє аналитичней документациї за планованє и програмованє активносцох у вязи з интеґрацию Ромох у Покраїни; витворйованє сотруднїцтва и консултацийох з владовима и нєвладовима орґанизациями и орґанами у обласци интеґрациї Ромох и унапредзеня їх положеня; реализацию проєктох хтори засновани на цильох яки дефиновани у стратеґийох и акцийних планох; координованє применьованя и витворйованя домашнїх и медзинародних програмох за интеґрацию и унапредзованє положеня Ромох; информацийно-документацийну дїялносц и водзенє евиденцийох у поглядзе интеґрациї Ромох на териториї Покраїни; провадзенє и зберанє информацийох у вязи з мирами хтори ше у Републики Сербиї и других жемох поднїма пре унапредзованє фаховей роботи у поглядзе интеґрациї Ромох, як и провадзенє оспособйованя и усовершованя фаховцох у обласци интеґрациї Ромох.

Покраїнски секретарият за привреду, обезпечованє роботи и ровноправносц полох окончує и други роботи кед му таке зоз законом, покраїнску скупштинску одлуку або з другим предписаньом зверене.

4. РОБОТИ ХТОРИ ЗАЄДНЇЦКИ ЗА ШИЦКИ ПОКРАЇНСКИ СЕКРЕТАРИЯТИ

Реґионалне и медзиопштинске сотруднїцтво

Член 44.

Покраїнски секретарияти у рамикох свойого дїлокругу, у складзе зоз Статутом и законом, витворюю реґионалне и медзиопштинске сотруднїцтво и стараю ше о його унапредзеню.

Медзиреґионалне сотруднїцтво

Член 45.

Покраїнски секретарияти, у рамикох свойого дїлокругу, у складзе зоз Статутом и законом, витворюю медзиреґионалне сотруднїцтво з териториялнима заєднїцами и другима формами автономиї других державох, у рамикох вонкашнєй политики Републики Сербиї, стараю ше о його унапредзеню и окончую роботи покраїнскей управи хтори ше одноша на пририхтованє, заключованє и применьованє спорозуменьох.

Покраїнски секретарияти творя условия за приступ и реализацию проєктох хтори ше финансує зоз средствох предприступних фондох ЕУ, донацийох и других формох помоци з компетенциї секретариятох.

5. ОДНОШЕНЄ ПОКРАЇНСКЕЙ УПРАВИ З ДРУГИМА ОРҐАНАМИ И ГРАЖДАНАМИ

Одношенє ґу Скупштини и Покраїнскей влади

Член 46.

Покраїнски орґани управи обовязни дац Скупштини обвисценя, пояшнєня и податки зоз свойого дїлокругу.

Покраїнски орґани управи окончую роботи у складзе зоз напрямками за роботу яки приноши Покраїнска влада.

Покраїнска влада унапрямує и ускладзує роботу орґанох покраїнскей управи.

Медзисобни одношеня покраїнских орґанох управи

Член 47.

Покраїнски орґани управи медзисобно сотрудзую у окончованю роботох од заєднїцкого интереса, даваю податки и обвисценя яки нєобходни за роботу, доручую акти и витворюю други форми зєднїцкей роботи и сотруднїцтва.

Пре окончованє зложенших роботох хтори вимагаю заєднїцку роботу занятих зоз вецей покраїнских орґанох управи, мож формовац комисиї и роботни ґрупи, чий состав и роботу утвердзую руководителє спорозумно.

Руководителє покраїнских орґанох управи, кед су овласцени спорозумно приношиц предписаня а нє посцигню спорозуменє, о тим обвисцую Покраїнску владу.

Одношеня покраїнских орґанох управи и орґанох локалней самоуправи

Член 48.

Покраїнски орґани управи и орґани локалней самоуправи медзисобно сотрудзую и информую ше о питаньох од зєднїцкого интереса.

Покраїнски орґани управи даваю фахову помоц орґаном локалней самоуправи у вивершованю законох.

Одношеня ґу гражданом и правним особом

Член 49.

Покраїнски орґани управи длужни, у рамикох своїх правох и длужносцох, оможлївиц физичним и правним особом нєзавадзане витворйованє їх правох и обовязкох, давац им потребни податки и обвисценя, сотрудзовац з нїма и чувац угляд покраїнскей управи.

Член 50.

Покраїнски орґани управи длужни розпатрац представки, петициї и предкладаня яки им физични и правни особи подноша, поступац по нїх и о тим их обвисцовац.

Физични або правни особи ше можу обрациц ґу покраїнскому орґану управи пре даванє думаня о применьованю одредбох покраїнских скупштинских одлукох и других общих актох. Думаня покраїнских орґанох управи нє обовязуюци.

Одношенє покраїнскей управи и Покраїнского защитнїка гражданох - омбудсмана

Член 51.

Покраїнски орґани управи длужни оможлївиц нєзавадзани приступ Покраїнского защитнїка гражданох - омбудсмана ґу податком од интереса за витворйованє правох гражданох.

Покраїнски орґани управи длужни розпатриц указованя, предкладаня и препоруки Покраїнского защитнїка гражданох - омбудсмана хтори поступа у интересу гражданох.

Пре оможлївйованє нєзавадзаней роботи Покраїнского защитнїка гражданох - омбудсмана, покраїнски орґани управи длужни поднїмац шицки потребни мири и активносци.

6. ПРЕХОДНИ И ЗАКОНЧУЮЦИ ОДРЕДБИ

Член 52.

Покраїнски орґани управи длужни свойо акти о нукашнєй орґанизациї и систематизациї роботних местох ускладзиц з одредбами тей одлуки по 31.12.2014. року.

Член 53.

Зоз ступаньом на моц тей одлуки престава важиц Покраїнска скупштинска одлука о покраїнскей управи («Службени новини АПВ», число 4/12 – пречисцени текст).

Член 54.

Тота одлука ступа на моц осми дзень по обявйованю у «Службених новинох Автономней Покраїни Войводини».

СКУПШТИНА АВТОНОМНЕЙ ПОКРАЇНИ ВОЙВОДИНИ

Нови Сад, 23. септембра 2014. року

ПОДПРEДСИДАТEЛЬКА
СКУПШТИНЕ АП ВОЈВОДИНЕ

Ана Томанова Маканова, с.р.

Акти

Посланїки, зволанє 2012-