Суботица/Нови Сад, 25. септембер – Предсидатель Скупштини АП Войводини Балинт Югас обишол нєшка закончени роботи и инвестициї на Паличу и у Суботици хтори финансовани з буджету АП Войводини.
Обиходзаци нововибудовани тротоар у Викенд населєню, зоз хторим ше предлужує проєкт ушорйованя дакеди запущеней часци Паличу, предсидатель Югас визначел важносц реализованих инвестицийох и ушорйованє того населєня пре звекшанє туристичного потенциялу.
«Зоз задовольством сом нєшка констатовал же ґу концу приведзени роботи на побрежю Палицкого озера, хтори финансовани з покраїнского буджету, за хтори ше закладал наш почитовани покойни предсидатель Иштван Пастор. Роботи ше уж одвивали под час нашей нєдавней нащиви зоз покраїнску премиєрку Маю Ґойкович, а тераз су закончени як и було плановане», визначел предсидатель Югас.
Югас додал и же ше наздава вибудови дражки за беганє и бициґлистичней дражки коло цалого озера, цо сиґурно звекша туристичну атрактивносц и прицагнє часц туристох хтори заинтересовани за активни одпочивок.
«Постоя ище даскельо обєкти чию реконструкцию плануєме и хтори би звекшали капацитети тей туристичней дестинациї, алє и Суботици и єй околїска», наглашел Югас.
Директорка подриємства «Парк Палич» Валерия Денч визначела же у остатнїх двох рокох, з помоцу покраїнскей администрациї рализовани вельки проєкти хтори Паличу дали подполно нови випатрунок. Вона окреме наглашела важносц ушореня Викенд населєня хторе було цалком запущене и нарушовало випатрунок цалого Паличу за чийо ушоренє з буджету АП Войводини видвоєни 36.480.000 динари.
Предсидатель Скупштини АП Войводини Балинт Югас обишол нєшка и Основну школу «Майшанска драга» у Суботици, у хторей зоз средствами з покраїнского буджету у суми 13,1 милон динари у подполносци обновени спортски бавилїща.
«Барз зме задовольни же школяре тей школи тераз буду мац вельо лєпши условия за занїманє зоз спортом бо терени за тенис и кошарку достали нову тартан подлогу и ограду».
ОШ «Майшанска драга» у Суботици нащивюю скоро 600 школяре, а наставу ше у 29 оддзелєньох отримує на двох язикох, у 16 оддзелєньох на сербским и у 13 на мадярским язику.
У обиходзеню тих двох значних инвестицийох участвовали заменїца городоначалнїка Суботици Чила Ґоли и предсидатель Скупштини городу Суботица Даниел Дїванович.