Нови Сад, 24. септембер – У Скупштини АП Войводини нєшка отворени XVII Медзинародни форум о чистих енерґетских технолоґийох под назву «Стратеґийни пременки националней и енерґетскей политики», хтори традицийно орґанизую Институт за европски роботи (ИНЕА) и Факултет технїчних наукох у Новим Садзе, и зоз покровительством Скупштини АП Войводини и Покраїнского секретарияту за енерґетику, будовательство и транспорт.
Отвераюци тогорочни Форум, предсидатель Скупштини АП Войводини Балинт Югас визначел же з рока на рок тот фахови сход указує на значносц повязованя науки, политики и економиї як и на важносц заєднїцкей роботи на вибудови енерґетско безпечней, отримуюцей, желєней и чистей енерґетскей будучносци Сербиї.
Кед слово о националней енерґетскей политики, прешвечени сом же ше Сербия, зоз формованьом Стратеґийного совиту за сотруднїцтво зоз Мадярску и насампредз зоз подписованьом числених спорозуменьох зоз обласци енерґетики, позиционовала як сиґурни партнер и активни учашнїк у процесох енерґетскей транзициї», гварел Югас и здогаднул на тото же на першей схадзки Стратеґийного совиту за сотруднїцтво Сербиї и Мадярскей подписани «Меморандум о розуменю о вибудови нафтоводу Мадярска – Република Сербия од Алдї по Нови Сад» з планом же би вибудов того нафтоводу була закончена по 2028.
Югас наглашел же Сербия з вибудову нового нафтоводу ґу Мадярскей обезпечи сиґурнєйше подмирйованє домашнього
тарґовища и новосадскей рафинериї нафти зоз 5,5 милиони тони рочнє и на тот способ обезпечи диверсификацию жридлох и напрямох подмирйованя.
Предшедаюци на Форуму Тихомир Симич наглашел же з отримованьом того Форуму Нови Сад по седемнасти раз представя енерґетску ґравитацийну точку юговосточней Европи.
«Наша заєднїцка визия, зоз предлогами нових енерґетских политикох, прикладами добрей пракси и з применьованьом нових технолоґийних ришеньох, стимуловац конкретнєйше хаснованє розполагаюцих потенциялох у нашей жеми», гварел Симич и додал же ше зоз тим звекша сотруднїцтво и розвой енерґетики у жемох реґиону и унапрями будучносц ґу проєкцийом Европскей униї у тей обласци.
На Форуму додзелєни и припознаня «TOP ENERGY 2024» за найуспишнєйши проєкти зоз обласци енерґетики. Тогорочни лауреати – «INTRA LIGHTING» ДОО, Техномаркет ДОО и Фонет ДОО, як и поєдинци Бошко Вучуревич, заменїк предсидателя Привредней комори Войводини и Любо Мачич, совитнїк министра за рудокопство и енерґетику у Влади Републики Сербиї.
На Форуму були присутни и подпредсидатель Скупштини АП Войводини Борис Новакович и ґенерална секретарка др Сандра Стойкович, а присутним бешедовали и предсидатель Совиту Аґенциї за енерґетику Сербиї Деян Попович, директор Науково-технолоґийного парку Деян Колакович, декан Факултету технїчних наукох Борис Думнич, заменїца шефа Делеґациї ЕУ у Републики Сербиї Пламена Халачева, амбасадор Мадярскей у Беоґраду Йожеф Мадяр, помоцнїца министра рудокопства и енерґетики Йована Йоксимович и покраїнски секретар за енерґетику, будовательство и транспорт Боян Вранькович.