Нови Сад/Бачка Тополя, 21. септембер – Предсидатель Скупштини АП Войводини Балинт Югас присуствовал нєшка на конференциї «Дома, вєдно з вами», хтору орґанизує Союз фамелийних орґанизацийох Карпатскей реґиї и Здруженє вельких фамелийох 3+ зоз Бачкей Тополї.
Привитуюци присутних, предсидатель Югас гварел же жиєме у спокусних часох у хторих од велькей значносци даванє моцней институционалней и власней потримовки очуваню фамелиї, як и творенє условийох за їх лєпше економске и социялне положенє.
«Очуванє фамелиї доприноши моцнєню дружтва як цалосци, фамелия дава сиґурносц и потримовку, преноши и пестує вредносци, традициї и норми хтори будую моцни фундаменти за здравшу заєднїцу и дружтво у цалосци», гварел предсидатель Югас.
Вон визначел же фамелия ма барз значну улогу у формованю идентитету и чувства припадносци и наглашел же векше число дзецох у фамелийох, попри демоґрафского и економского аспекту, доприноши моцнєню вязох у локалних заєднїцох, алє помага и у очуваню култури, язика и традициї хтору ше преноши на нови ґенерациї.
«Жиєме у чаше у хторим наталитет опадує, жительство вше старше, а млади напущую менши штредки глєдаюци еґзистенцию. Прето наша длужносц и обовязка же бизме зробели шицко цо у нашей моци же би вони могли остац у своїх штредкох, основац фамелиї, розвивац роботи и жиц живот истого квалитету як и у векших штредкох», гварел предсидатель Югас.
Югас додал же покраїнска администрация по тераз зробела вельо по питаню даваня потримовки младим малженским паром, як и паром зоз троїма и штверима дзецми, та, медзи иншим, Покраїнски секретарият за социялну политику, демоґрафию и ровноправносц полох рядово розписує конкурси за купованє хижох и злєпшанє животних условийох у смислу адаптациї и реновираня квартельних обєктох.
Союз фамелийних орґанизацийох Карпатскей реґиї основал вецей як дзешец здруженя зоз цильом даваня потримовки фамелийом и ширеня приятельских одношеньох у Карпатскей реґиї и ширше, як и стимулованя сотруднїцтва медзи фамелийнима орґанизациями и цивилнима здруженями хтори маю исти цилї.
На конференциї, попри представительох орґанизаторох и фамелийних здруженьох, бешедовали и народни посланїк Балинт Пастор, предсидатель Националного совиту мадярскей националней меншини Арпад Фремонд и предсидатель Општини Бачка Тополя Адриан Сатмари.