Нови Сад, 20. септембер – Предсидатель Скупштини АП Войводини Балинт Югас и подпредсидатель Скупштини АПВ Александра Малетич присуствовали нєшка на шветочним означованю 20 рокох иснованя и успишней роботи Покраїнского заводу за ровноправносц полох.
Визначуюци же АП Войводина була зачатнїк у вибудови родней демократиї, предсидатель Югас здогаднул на тото же Скупштина АП Войводини 2004. року, пейц роки пред приношеньом Закона о ровноправносци полох, основала Покраїнски завод за ровноправносц полох и принєсла Одлуку зоз хтору по перши раз у нашим норамативно-правним рамику предвидзени каребни одредби у случаю потупеня права на родну ровноправносц.
«У наступних двох деценийох, Скупштина АПВ ше у процесу приношеня числених документох, у сотруднїцтве зоз Покраїнску владу, тримала ключного принципу: же женски права то людски права и же людски права вше и без винїмку женски права», визначел Югас и здогаднул на други значни основани институциї и принєшени стратеґиї хтори мали за циль моцнєнє механїзмох за витворйованє родней ровноправносци и людских правох у АП Войводини.
Предсидатель Югас наглашел стратеґийне значенє проєктох Заводу за ровноправносц полох у афирмациї женского поднїмательства, дзекуюци хторим жени обачлївши и хтори помагаю и потримую їх економску самостойносц.
«Барз важна институцийна потримовка Заводу поднїмательом як прейґ проєктох инвестованя до продукцийного процесу, так и прейґ едукациї и насампредз прейґ дїловного повязованя женох у прейґгранїчних реґионох», гварел Югас и наглашел потримовку моцнєйшому и активнєйшому участвованю женох у явним и политичним живоце. 
На шветочносци присуствовал и подпредсидатель Покраїнскей влади Роберт Отот, а присутних привитала и покраїнска секретарка за финансиї Смилька Йованович хтора указала на добре сотруднїцтво Покраїнскей влади и Заводу за ровноправносц полох дзекуюци хторому успишно реализовани числени заєднїцки проєкти и мири. З аспекту финансийох, вона окреме наглашела значносц запровадзованя родного буджетованя, як и творенє предусловийох за реализацию мирох хтори доприноша родней ровноправносци.
Госци на преслави велького ювилею привитала и директорка Заводу за ровноправносц полох Ивана Крсманович хтора бешедовала о дїлокругу Заводу и виглєдовацких, едукативних и промотивних програмох дзекуюци хторим Завод, вєдно зоз своїма хаснователями, будує швет єднаких можлївосцох.
На концу шветочносци емитовани и документарни филм о 20 рокох роботи тей значней институциї.