Нови Сад/Сента, 17. септембер – Предсидатель Скупштини АП Войводини Балинт Югас присуствовал нєшка у Сенти на шветочним отвераню академского року и додзельованю дипломох Консултативного центру Мадярского универзитету за польопривреду и животни науки.
Привитуюци професорох, студентох и госцох предсидатель Югас визначел значенє польопривредних и животних наукох за економску, дружтвену и еколоґийну отримуюцосц нашей реґиї и жеми бо розвой тих обласцох поставя фундаменти стабилней будучносци.
«Нєшка, кед додзелюєме дипломи, нє славиме лєм индивидуални успихи, алє и заєднїцки усиловносци заєднїци, институциї, наставнїкох, студентох и родичох у здобуваню знаня. Потримовка образованю од винїмковей значносци за мадярску заєднїцу у Войводини, насампредз у обласци польопривреди и животних наукох. Применьованє модерних технолоґийох и виглєдовацких резултатох у польопривреди и защити животного штредку ключна за отримуюци розвой, а ви, нови дипломци, можеце тоти пременки применїц у реалносци. Насампредз, жадам винчовац дипломованим студентом, инженєром гортикултури, польопривредним инженєром и аґрономом за рурални розвой», гварел предсидатель Югас и визначел одвичательносц дипломцох хтори треба же би здобуте знанє вихасновали за добробут заєднїци и своєй жеми.
Югас визначел прешвеченє же тота институция, як и по тераз, предлужи повязовац традицию прешлосци зоз иновациями хтори приноши будучносц и же студенти буду здобувац нови знаня хтори унапредза польопривредни и наукови розвой Войводини.
Студийна програма за заградкарство ше континуовано реализує у Сенти од 1996. року, насампредз прейґ цивилней орґанизациї Здруженє заградкарох, а од 2009. року прейґ Фондациї Pro Scientia Naturae. Моментално Фондация орґанизує наставу за два основни (Заградкар BSc и Польопривредни инженєр BSc) и два мастер програми (Аґрарни инженєр за розвой валалу MSc и Заградкар MSc). По тераз вецей як 532 студенти з Войводини успишно закончели образованє, а векшина здобуте знанє хаснує у своїх фамелийних ґаздовствох або у польопривредних подприємствох у реґионє. Оспособйованє ше запровадзує у форми позарядового студираня, цо оможлївює успишне закончованє студийох коло фамелийних и роботних обовязкох.