Бачка Тополя, 12. септембер – Предсидатель Скупштини АП Войводини Балинт Югас присуствовал нєшка на шветочней схадзки Скупштини општини Бачка Тополя, зоз хтору, вєдно з традицийну вецейдньову манифестацию Днї Општини Бачка Тополя, означене швето тей општини.
Винчуюци руководству и гражданом Днї Општини Бачка Тополя предсидатель Скупштини АП Войводини Балинт Югас наглашел же Бачка Тополя добри приклад меншого штредку хтори добре розвити и богати зоз змистами, хтори своїм жительом може обезпечиц добри условия за живот и на таки способ их затримац у тим месце.
«Розвита индустрийна зона, два основни и три штреднї школи, рижни културни змисти, як и вигодне ґеоґрафске положенє обезпечую Бачкей Тополї одличну основу за дальши розвой и напредованє. Прешвечени сом же и блїзкосц автодраги хтора злучує Сербию и Мадярску и гранїчного преходу и законченє швидкей гайзибанскей драги Беоґрад - Будапешт допринєшу тому же би тото место з рока на рок прицагло ище вецей инвестициї хтори жительом обезпеча ище лепши условия за живот и же млади людзе буду оставац у Бачкей Тополї и зоз своїм знаньом и идеями допринєшу єй просперитету», поручел предсидатель Югас. Вон визначел и вельку значносц законченя даскелїх капиталних инвестицийох и за Бачку Тополю и за околни места.
Предсидатель Општини Бачка Тополя Адриан Сатмари привитал госцох и подзековал им на присустве визначуюци же лєм зоз заєднїцку роботу и дзеку можу далєй робиц на розвою и унапредзеню тей општини хтора по тераз дожила вельки културни, привредни и инфраструктурни препород.
Тогорочни «Днї Општини Бачка Тополя» тирваю од 11. по 15. септембер, а под час пейцох дньох жителє тей општини и вельочислени госци буду мац нагоду уживац у числених културних, ґастрономских, концертних, спортских и других змистох.
На шветочней схадзки предшедовал предсидатель СО Бачка Тополя Саша Срдич.