Сента, 11. септембер – Предсидатель Скупштини АП Войводини Балинт Югас присуствовал нєшка на шветочней схадзки Скупштини општини Сента, хтору ше традицийно отримує з нагоди Дня городу, пред 327. рочнїцу Сентянскей битки.
Винчуюци швето представительом локалней самоуправи и шицким Сентяном, предсидатель Скупштини АПВ Балинт Югас визначел же тота општина ма вельо потенциялу и плани за дальши стратеґийни инфраструктурни, економски и дружтвени розвой. Вон наглашел же го нова предсидателька Општини Сента Гайналка Бурань упознала зоз цилями и планованима проєктами, хтори отвераю вельки можлївосци и перспективи за Сенту.
«Прешвечени сом же нова енерґия, пошвецена робота и амбиоциозни плани допринєшу же би Сента пошвидшано напредовала у инфраструктурним, привредним, туристичним и каждим другим смислу», визначел Югас и наглашел же покраїнска администрация и убудуце будзе отворена и порихтана за сотруднїцтво и потримовку општинским проєктом. 
На шветочней схадзки традицийно уручени и найпрестижнєйши городски припознаня, хтори достали визначни поєдинци и орґанизациї хтори зоз своїм анґажманом и досягами допринєсли вкупному дружтвеному, спортскому и културному розвою Сенти. На шветочней схадзки присуствовал и покраїнски секретар за образованє, предписаня, управу и национални меншини – национални заєднїци Роберт Отот, на схадзки предшедовал предсидатель СО Сента Веселин Петрович, а предсидателька Општини Сента Гайналка Бурань з привитну бешеду виражела подзековносц численим госцом хтори пришли вєдно з домашнїма означиц тот датум.